Frontier Myanmar သတင်းထောက် မြဝတီမှာ အဖမ်းခံရ

ရန်ကုန်အခြေစိုက် Frontier Myanmar မဂ္ဂဇင်းရဲ့ သတင်းထောက် နော်ဘက်တီဟန် ဟာ ကရင်ပြည်နယ်အတွင်း ဖမ်းဆီးခံရတယ်လို့ Frontier မဂ္ဂဇင်းရဲ့ အမှုဆောင်အရာရှိချုပ် ဦးဆန်နီဆွေက RFA ကို ဒီမနက်မှာ အတည်ပြု ပါတယ်။

"ကျနော်တိုရဲ့ သတင်းထောက်က မြဝတီကို သတင်းယူဖို့ရောက်နေတာ ရှိပါတယ်။ ကျနော်တို့ မနေ့ ညနေပိုင်းက တည်းက ကျနော်တို့ သူနဲ့အဆက်အသွယ် ပြတ်သွားပါတယ်။ သူ့ရဲ့ လုံခြုံရေးကို ကျနော်တို့ စိုးရိမ်မိပါတယ်။ သူဘယ်မှာရှိတယ်၊ လုံခြုံမှုရှိရဲ့လားဆိုတာ ကျနော်တို့ဆက်ပြီး စုံစမ်းနေပါတယ်" လို့ Frontier မဂ္ဂဇင်းရဲ့ အယ်ဒီတာချုပ် သောမတ်စ် ကိန်းကလည်း RFA ကို အတည်ပြုရှင်းပြပါတယ်။

Frontier  က ထုတ်ပြန်တဲ့ကြေညာချက်မှာတော့ နောင်ဘက်တီဟန်က Frontier သတင်းဌာနကို ဖုန်းမတ်ဆေ့ ပေးပို့ချက်အရ  သူဟာ မြဝတီမြို့ အမှတ် ၁ နယ်စပ်ဂိတ်အနီးမှာ ကရင်ပြည်နယ် နယ်ခြားစောင့်တပ်ဖွဲ့ BGF က ဖမ်းဆီးတာခံခဲ့ရတယ်လို့ ဆိုပါတယ်။

နော်ဘက်တီဟန်ဟာ မြဝတီမြို့မှာ မနေ့တုန်းက ဖမ်းခံခဲ့ရတာလို့ ဆိုပါတယ်။ ကရင်နယ်ခြားစောင့်တပ်ရဲ့ ပြောခွင့်ရ ဗိုလ်မှူး နိုင်မောင်ဇော် ကတော့ သတင်းထောက် နော်ဘက်တီဟန်ကို သူတို့ အဖွဲ့က ဖမ်းထားတာ ဟုတ် မဟုတ် အတည်မပြုနိုင်ဘူးလို့ ဆိုပါတယ်။ သတင်းထောက် နော်ဘက်တီဟန်ဟာ ၂၀၁၉ ဒီဇင်ဘာနဲ့ ၂၀၂၀ ဖေဖော်ဝါရီလတုန်းက နယ်ခြားစောင့်တပ်ဖွဲ့ (BGF) ထိန်းချုပ်ရာနယ်မြေမှာ မြေအရောင်းအဝယ်ဖြစ်နေတာတွေ၊ BGF နဲ့ တရုတ်တို့ရဲ့ စီးပွားရေး ရင်းနှီးမြှုပ်နှံမှုတွေကို ဖော်ထုတ်ရေးသားခဲ့ပါတယ်။

သတင်‌းထောက်နှစ်ယောက်ကို ပြန်လွှတ်ပေးဖို့ ကရင်ပြည်နယ်ဝန်ကြီးချုပ် ဒေါ်နန်းခင်ထွေးမြင့်က ညွှန်ကြားလာတာကြောင့် ဒီနေ့ညနေ ၅ နာရီခန့်မှာ ပြန်လွှတ်ပေးလိုက်ပြီလို့ BGF ခေါင်းဆောင် ဗိုလ်မှူးကြီး စောချစ်သူက RFA ကို ဖုန်းနဲ့ ပြောပါတယ်။