ဒေါ်အောင်ဆန်းစုကြည် BBC Reith Lectures အစီအစဉ်မှာ ဟောပြောမည်
2011.06.11
၂ဝ၁၁ ခုနှစ် ဇန်နဝါရီလ ၂၈ ရက်နေ့က ဆွစ်ဇာလန်နိုင်ငံ ဒါဗို့စ်မြို့၌ ပြုလုပ်သည့် ကမ္ဘာ့စီးပွားရေး ညီလာခံတွင် မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည် ပေးပို့သည့် သဝဏ်လွှာမိန့်ခွန်း အသံသွင်းတိတ်ခွေကို ဖွင့်ပြခဲ့ပါသည်။ (Photo: AFP)
ဒီဟောပြောချက်တွေကို ရန်ကုန်မြို့မှာ ကြိုတင် အသံသွင်းယူထားပြီး အခုလ ၂၈ ရက်နေ့မှာ ပထမဆုံး ဟောပြောချက်ကို အသံလွှင့်မယ်လို့ သိရပါတယ်။
ဘီဘီစီ သောတရှင်တွေကို ရေဒီယိုကနေ ဟောပြောခွင့်ရတာဟာ သူ့အတွက် အလွန်ထူးခြားတဲ့ အဓိပ္ပာယ် ရှိကြောင်း၊ ဒီအချက်က သူဟာ တရားဝင် လွတ်လပ်တဲ့သူတဦး ပြန်ဖြစ်သွားပြီ ဆိုတဲ့ အဓိပ္ပာယ်ရောက်ကြောင်း၊ မလွတ်လပ်ခင် နေအိမ်အကျယ်ချုပ် ဘဝမှာ ဟောပြောနိုင်သူတဦး မဟုတ်ဘဲ ဘီဘီစီကို နားဆင်သူတဦးသာ ဖြစ်ခဲ့ကြောင်း ဒေါ်အောင်ဆန်းစုကြည်က ပြောပါတယ်။
ဒေါ်အောင်ဆန်းစုကြည်ရဲ့ ပထမ ဟောပြောချက်မှာ မြန်မာနိုင်ငံက အတိုက်အခံတွေရဲ့ အခြေအနေကို ဟောပြောမှာ ဖြစ်ပြီး ဇူလိုင်လ ၅ ရက်နေ့မှာ ထုတ်လွှင့်မယ့် ဒုတိယ ဟောပြောချက်မှာ လွတ်လပ်မှု အကြောင်းနဲ့ ဘယ်လို ရယူနိုင်သလဲ ဆိုတဲ့အကြောင်းတွေကို အရှေ့အလယ်ပိုင်းဒေသက ဒီမိုကရေစီရေး လှုပ်ရှားဆန္ဒပြပွဲတွေကို ကိုးကားပြီး ဟောပြောမယ်လို့ သိရပါတယ်။
ဘီဘီစီ အသံလွှင့်ဌာနရဲ့ ရေဒီယိုအမှတ် (၄) ဟာ ဗြိတိန်နိုင်ငံ အတွင်းမှာသာ ထုတ်လွှင့်တဲ့ ရေဒီယိုအစီအစဉ်တခု ဖြစ်ပြီး သတင်း၊ သမိုင်း၊ ဇာတ်လမ်းစတဲ့ အစီအစဉ်တွေ ထုတ်လွှင့်တယ်လို့ သိရပါတယ်။
ဖတ်ရှုသူအများဆုံး သတင်းများ။
သတင်းများ
