ရေယာဉ်နစ်မြုပ်မှုမှာ သေဆုံးသူ ၂ဝ ကျော်ရဲ့ ရုပ်အလောင်းတွေ တွေ့ ရှိ

"ဒီနေ့ ဖြစ်တဲ့နေရာက လေးလောင်း အခုလောလောဆယ်တွေ့တယ်။ ကနီမှာ ၁၁ လောင်း၊ မုံရွာမှာ ၅ လောင်း၊ ချောင်းဦးဘက်မှာ ၁ လောင်း အဲဒါဒီနေ့တွေ့ထားတဲ့ စာရင်းအရပေါ့နော်။ စုစုပေါင်း ၂၇ လောင်း ပေါ့။ အထူးသဖြင့်တော့ အမျိုးသမီးတွေပဲဖြစ်တယ်။ ယောင်္ကျားလေး အလောင်းက ၁ လောင်း ပဲ တွေ့သေးတယ်။ ကျန်တာကတော့ အမျိုးသမီးနဲ့ ကလေး နှစ်ယောက်ပါတယ်။အသက် ၂၀ နဲ့ ၃၀ ကြား အမျိုးသမီးလေးတွေပါ။" လို့ လွှတ်တော်ကိုယ်စားလှယ် ဦးထွန်းထွန်းဝင်း က ပြောပါတယ်။

ရေယာဉ်စတင်နစ်မြုပ်တဲ့နေမှာ အလောင်း ၅ လောင်း၊ အောက်တိုဘာလ ၁၆ ရက်နေ့ မနေ့က အလောင်း ၂ လောင်းနဲ့ ဒီနေ့မှာ ၂၁ လောင်း ဆယ်ယူရရှိခဲ့တာပါ။

အလောင်းတွေကို ကနီမြို့နယ်အနီးက ကျွန်းငယ်တစ်ခုမှာ စုထားပြီး သက်ဆိုင်ရာမိသားစုဝင်တွေကို တစ်ရက်စောင့် ဆိုင်းပြီးမှ သဂြိုဟ်ဖို့ ပြင်ဆင်ထားပါတယ်။ သေဆုံးသူတွေရဲ့ လက်ဝတ်လက်စားတွေနဲ့ ရရှိတဲ့ အထောက်အထား ပစ္စည်းတွေကို ရဲတပ်ဖွဲ့ဘက်က မှတ်တမ်းပြုစုနေတယ်လို့ ဦးထွန်းထွန်းဝင်း က ပြောပါတယ်။

နစ်မြုပ်ခဲ့တဲ့ အောင်စိုးမိုးကျော်ရေယာဉ်ကို ရေငုပ်သမားတွေက ဒီနေ့မနက်က ဆယ်ယူနေပေမယ့် ရေစီးသန် တာကြောင့် ညနေပိုင်းအထိ ဆယ်ယူလို့ မရသေးဘူးလို့လည်း ပြောပါတယ်။