ဒုက္ခသည် ပြဿနာဖြေရှင်းရေး ဘင်္ဂလားဒေ့ရှ်ကို အိန္ဒိယ အကူအညီ တိုးမြှင့်ပေးမည်

ရခိုင်ပြည်နယ်ကနေ ထွက်ပြေးခဲ့ကြသူ ဒုက္ခသည် ပြဿနာ ဖြေရှင်းရေးနဲ့ပတ်သက်ပြီး ဘင်္ဂလားဒေ့ရှ်နိုင်ငံကို အကူအညီတွေ အပြည့်အ၀ တိုးမြှင့်ပေးမယ်လို့ အိန္ဒိယ အစိုးရက ပြောပါတယ်။

သုံးရက်တာ ဘင်္ဂလားဒေ့ရှ် ခရီးစဉ်အတွင်း အိန္ဒိယ နိုင်ငံခြားရေးဝန်ကြီး ဗီဂျေး ဂိုခါလီ က ဘင်္ဂလားဒေ့ရှ် နိုင်ငံခြားရေးဝန်ကြီး ရှာဟီဒူ ဟိတ်နဲ့ ဒါကာမြို့မှာ တွေ့ဆုံစဉ်အတွင်း ပြောဆိုခဲ့တာပါ။

ဒုက္ခသည်တွေ မူလနေရပ်ကို စောစောပြန်နိုင်ရေးအပါအဝင် ပြဿနာအခက်အခဲတွေကို ကူညီဖြေရှင်းပေးမယ်လို့ အိန္ဒိယ နိုင်ငံခြားရေးဝန်ကြီး က ကြေညာချက် ထုတ်ပြန်ပြောဆိုပါတယ်။

ဘင်္ဂလားဒေ့ရှ် ဝန်ကြီးချုပ် ရှိတ်ဟာဆီနာ ကလည်း ဒုက္ခသည် ပြဿနာနဲ့ ပတ်သက်ပြီး မြန်မြန်ဆန်ဆန် ဖြေ ရှင်းဆောင်ရွက်ရေး၊ မြန်မာအစိုးရကို ဖိအားပေးဖို့ အိန္ဒိယအစိုးရကို တိုက်တွန်းခဲ့ပါတယ်။