လက်နက်ကြီးနဲ့ ပစ်ခတ်ခံရလို့ ဘီးလင်းက သာသနိကအဆောက်အအုံတွေ ပျက်စီး

မွန်ပြည်နယ် ဘီးလင်းမြို့နယ် ဝင်းတာပန်ကျေးရွာထဲကို စစ်ကောင်စီက လက်နက်ကြီးနဲ့ ပစ်ခတ်လို့ ရွာအနီးက သာလည်ထဘုန်းကြီးကျောင်းနဲ့ သာလည်ထစေတီတော် လက်နက်ကြီးကျည် ထိမှန်ပျက်စီးခဲ့တယ်လို့ ကရင်အမျိုးသားအစည်းအရုံး (KNU) က ဇန်နဝါရီလ ၁၇ ရက်နေ့မှာ သတင်းထုတ်ပြန်ပါတယ်။

ဇန်နဝါရီလ (၁၅) ရက်နေ့ ည (၇) နာရီက စစ်ကောင်စီတပ်ရဲ့ အမှတ် (၃) ခြေမြန်တပ်ရင်းက ပစ်ခတ်ခဲ့တာလို့ ဆိုပါတယ်။

၂၀၂၃ ဒီဇင်ဘာလကုန်ပိုင်းမှာ စစ်ကောင်စီက အဲဒီနေရာကို Mi-35P တိုက်ခိုက်ရေး ရဟတ်ယာဉ်နဲ့ ပစ်ခတ်တိုက်ခိုက်ခဲ့ပြီး လူနေအိမ်တွေ ထိခိုက်ပျက်စီးနေရတယ်လို့ KNU က ထုတ်ပြန်ပါတယ်။

ဝင်းတာပန်ကျေးရွာအနီးမှာအခြေစိုက်တဲ့ စစ်ကောင်စီရဲ့ ဝင်းတာပန်စခန်းအတွက် စစ်ကောင်စီဘက်က လက်နက်ခဲယမ်းတွေကိုလည်း လေယာဉ်နဲ့ လာရောက်ချပေးတာတွေရှိနေတယ်လို့ ပြောပါတယ်။

စစ်ကောင်စီရဲ့ လက်နက်ကြီးပစ်ခတ်မှုကြောင့် သာသနိက အဆောက်အအုံတွေပျက်စီးခဲ့ဆိုတဲ့ KNU ထုတ်ပြန်ချက်နဲ့ ပတ်သက်လို့ စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကို RFA က ဆက်သွယ်မေးမြန်းခဲ့ပေမယ့် လက်ခံဖြေကြားတာ မရှိပါဘူး။

တစ်ဖက်မှာတော့ တိုင်းရင်းသားလက်နက်ကိုင်အဖွဲ့တွေဖြစ်တဲ့ MNDAA၊ AA နဲ့ TNLA တပ်ဖွဲ့တွေဟာ ရှမ်းပြည်နယ် မူဆယ်မြို့အဝင်က ရပ်တော်မူဘုန်းကြီးကျောင်းကို ဒရုန်းနဲ့တိုက်ခိုက်တာ၊ လောက်ကိုင်ဒေသ စီအောကျေးရွာရဲ့မြောက်ဘက် ဆင်ဦးကင်းတောင်မှာ တည်ထားတဲ့ ဘုရားစေတီတစ်ဆူကို MNDAA တပ်ဖွဲ့ဝင်တစ်ဦးက ပြီးခဲ့တဲ့ ဇန်နဝါရီ ၈ ရက်နေ့မှာ ဖျက်ဆီးနေတဲ့ ရုပ်သံဖိုင် ထွက်ပေါ်ခဲ့တာတွေကို စစ်ကောင်စီက ထောက်ပြပြီး မြောက်ပိုင်းမဟာမိတ်သုံးဖွဲ့ဟာ ဘာသာတရားအပေါ် အကြမ်းဖက်လုပ်ရပ်တွေ လုပ်နေတယ်လို့ စွပ်စွဲပြောဆိုထားပါတယ်။

MNDAA ဘက်ကတော့ ဒီပြောဆိုချက်တွေအပေါ် မဟုတ်မှန်ကြောင်းနဲ့ ဘာသာရေးလွတ်လပ်ခွင့်အပေါ် လေးစားတန်ဖိုးထားကြောင်း တုံ့ပြန်ထားပါတယ်။