ကြားဖြတ်ရွေးကောက်ပွဲဝင်မယ့် NLD ကိုယ်စားလှယ်လောင်း အမည်စာရင်း မြို့နယ်အလိုက် တင်ပြရမည်

၂၀၁၅ အထွေထွေရွေးကောက်ပွဲပြီးနောက် အစိုးရအဖွဲ့ နဲ့ ပြည်ထောင်စု အဆင့်မှာ တာဝန်ပေးခံရတဲ့ လွှတ်တော်ကိုယ်စားလှယ်တွေဟာ ကိုယ်စားလှယ်အဖြစ်ကနေ နှုတ်ထွက်ရတာကြောင့် လစ်လပ် သွားတဲ့ ကိုယ်စားလှယ်နေရာတွေနဲ့ နယ်မြေတည်ငြိမ်မှုမရှိတာကြောင့် အထွေထွေ ရွေးကောက်ပွဲ မကျင်းပခဲ့ရတဲ့ နေရာတချို့နဲ့ လွှတ်တော်ကိုယ်စားလှယ် ကွယ်လွန်သွားတဲ့ မဲဆန္ဒနယ်တချို့မှာ ကြားဖြတ်ရွေးကောက်ပွဲ ကျင်းပမှာ ဖြစ်ပါတယ်။

ပြည်သူ့လွှတ်တော်အတွက် မုံရွာ၊ ချောင်းဆုံ၊ အမ်း၊ လှိုင်သာယာ၊ ဒဂုံမြို့သစ်(ဆိပ်ကမ်း)၊ ဒဂုံမြို့သစ်(အရှေ့ပိုင်း)၊ ကော့မှူး၊ ကျေးသီး၊ မိုင်းရှူးစတဲ့ ၉ မြို့နယ်မှာ ကြားဖြတ်ရွေးကောက်ပွဲ ကျင်းပမှာဖြစ်ပါတယ်။

အမျိုးသားလွှတ်တော်အတွက် ချင်းပြည်နယ် မဲဆန္ဒနယ် အမှတ် ၃၊ ပဲခူးတိုင်း မဲဆန္ဒနယ် အမှတ် ၄ နဲ့ ရန်ကုန်တိုင်း မဲဆန္ဒနယ် အမှတ် ၆ တို့မှာ ကိုယ်စားလှယ်တွေ လစ်လပ်နေတာဖြစ်ပါတယ်။

ဒါ့အပြင် ပြည်နယ်လွှတ်တော်တွေမှာတော့ ဖရူဆိုမြို့နယ် မဲဆန္ဒနယ် အမှတ် ၁၊ ကျိုင်းတုံမြို့နယ် မဲဆန္ဒနယ် အမှတ် ၂ ၊ ကျေးသီးမြို့နယ် မဲဆန္ဒနယ် အမှတ် ၁နဲ့ ၂၊ မိုင်းရှူးမြို့နယ် မဲဆန္ဒနယ် အမှတ် ၁ နဲ့ ၂ တို့မှာ ကိုယ်စားလှယ်တွေ လစ်လပ်နေတာ ဖြစ်ပါတယ်။