ကျောက်မီးသွေးစက်ရုံ စီမံကိန်းကြောင့် လူ ၃ သိန်းနီးပါး သေဆုံးနိုင်

မြန်မာနိုင်ငံမှာ စီစဉ်ထားတဲ့အတိုင်း ကျောက်မီးသွေးသုံး လျှပ်စစ်ဓာတ်အားပေးစက်ရုံတွေ တိုးချဲ့ ဆောက်လုပ်ခဲ့ရင် ဒီကျောက်မီးသွေးစက်ရုံတွေကြောင့် လာမယ့် ဆယ်စုနှစ်တွေမှာ လူပေါင်း ၂ သိန်း ၈ သောင်းလောက်အထိ အသက်သေဆုံးနိုင်တယ်လို့ Greenpeace သဘာဝပတ်ဝန်းကျင် ထိန်းသိမ်းရေးအဖွဲ့ အစီရင်ခံစာက ဒီကနေ့ ရေးသား ဖော်ပြလိုက်ပါတယ်။

မြန်မာနိုင်ငံမှာ လက်ရှိကျောက်မီးသွေးသုံး ဓာတ်အားပေးစက်ရုံ ၂ ရုံကနေ ၁ဝ ရုံအထိ တိုးချဲ့ဖို့ အစိုးရက စီစဉ်နေ တာဟာ ပြည်သူတွေရဲ့ အသက်တွေကိုပါ အကြီးအကျယ် ထိခိုက်လာစေနိုင်တယ်လို့ ဟားဗတ်တက္ကသိုလ်နဲ့ Greenpeace အဖွဲ့က ပူးတွဲပြုစုထားတဲ့ လေ့လာချက်မှာ ဖော်ပြထားပါတယ်။

မြန်မာနိုင်ငံရဲ့ လေထုညစ်ညမ်းမှုဟာ ကမ္ဘာပေါ်မှာ အဆိုးဝါးဆုံးအဆင့်ထဲမှာ ရှိနေပြီး၊ စီးပွားရေး ဦးမော့လာတာနဲ့ အမျှ ပိုပြီးဆိုးလာဖို့သာ ရှိတယ်လို့လည်း ဆိုပါတယ်။ မြန်မာနိုင်ငံက အကြီးဆုံးမြို့ကြီး ၆ မြို့ဟာ လေထုညစ်ညမ်း မှုကြောင့် မီးခိုးမြူတွေပြည့်နေတဲ့ တရုတ်နိုင်ငံ ဘေကျင်းမြို့တော်ထက် လူ့အသက်ကို အန္တရာယ်ဖြစ်စေတဲ့ PM10 ဓာတ်ငွေ့အမှုန်တွေ  ပိုများနေတယ်လို့လည်း အစီရင်ခံစာက သတိပေးထားပါတယ်။

မြန်မာအစိုးရဟာ တိုင်းပြည်တွင်း လျှပ်စစ်မီး မလိုလောက်မှုကို ၂ဝ၃ဝ ပြည့်နှစ်မှာ အပြီးဖြေရှင်းနိုင်ဖို့ ကျောက်မီးသွေးသုံး ဓာတ်အားပေးစက်ရုံ စီမံကိန်းကို အဓိကအားထား မူဝါဒ ချမှတ်ထားတယ်လို့ သိရပါတယ်။