ကျန်းမာရေးဝန်ကြီးဌာန “ကူးစက်ရောဂါကာကွယ်နှိမ်နင်းရေး ဥပဒေကြမ်း" လွှတ်တော်မှာတင်သွင်း

ကျန်းမာရေးနဲ့ အားကစားဝန်ကြီးဌာနက “ကူးစက်ရောဂါကာကွယ်နှိမ်နင်းရေး ဥပ‌ဒေကြမ်း” ကို ဒီကနေ့ စတင်ဖွင့်လှစ်တဲ့ ပြည်သူ့လွှတ်တော် အစည်းအဝေးမှာ တင်သွင်းလိုက်ပါတယ်။

ကူးစက်ရောဂါအမျိုးမျိုးကို ကာကွယ်နှိမ်နင်းရေးအတွက် ဥပဒေတွေ အရင်က ပြဌာန်းခဲ့တာရှိပေမယ့် ကပ်ရောဂါ အသစ်ဖြစ်တဲ့၊ ကိုရိုနာဗိုင်းရပ်စ်နဲ့ ပတ်သက်ပြီး ထိရောက်တဲ့ ဥပဒေမရှိသေးတာကြောင့် အခုလို အသစ်ပြဌာန်းဖို့ ဆောင်ရွက်ခဲ့တာလို့ ကျန်းမာရေးနဲ့ အားကစားဝန်ကြီးဌာန တာဝန်ရှိသူတွေက ပြောပါတယ်။

ကျန်းမာရေးနဲ့ အားကစားဝန်ကြီးဌာန ပြည်ထောင်စုဝန်ကြီး ဒေါက်တာ မြင့်ထွေးက ဒီဥပဒေကို အတည်ပြုနိုင်ရင်၊ ကပ်ရောဂါအသွင် ကူးစက်ရောဂါပြန့်ပွားမူကို ကာကွယ်၊ ထိန်းချုပ် ကုသရေးနဲ့ နိုင်ငံတကာ အဖွဲ့အစည်းတွေနဲ့ ပူးပေါင်းဆောင်ရွက်ရေး နှစ်ခုစလုံးမှာ ပိုမိုထိရောက်လာမယ်လို့ လွှတ်တော်မှာ တင်ပြခဲ့ပါတယ်။

"ကူးစက်ရောဂါ ဖြစ်ပွားပျံ့နှံ့မူနဲ့ ကူးစက်ရောဂါ ကပ်အသွင်ဖြစ်ပွားမှုကို လျင်မြန်စွာ ထိန်းချုပ် ဆောင်ရွက်နိုင်ခြင်း ၊ (၂) ကူးစက်ရောဂါနဲ့ ကူးစက်မြန်ရောဂါများ ဖြစ်ပွားလာပါက လိုအပ်သော စုံစမ်းစစ်ဆေးခြင်း၊ စောင့်ကြပ်ကြည့်ရှုစစ်ဆေးခြင်း၊ တုံ့ပြန်ဆောင်ရွက်ခြင်းနဲ့ ရောဂါထိန်းချုပ်တဲ့ လုပ်ငန်းများ ဆောင်ရွက်ရာတွင် အဆင်ပြေချောမွေ့ခြင်းနဲ့ စီမံဆောင်ရွက်ခြင်း၊ (၃) အပြည်ပြည်ဆိုင်ရာ ပြည်သူ့ကျန်းမာရေး အရေးပေါ် အခြေအနေဖြစ်ပွားလာပါက နိုင်ငံတကာအဖွဲ့အစည်းများ သက်ဆိုင်ရာ ဌာနအဖွဲ့အစည်းများနဲ့ ပေါင်းစပ်ညှိနှိုင်းရာတွင် ပိုမိုထိရောက်နိုင်ခြင်းတို့ကြောင့် ပြည်သူလူထုရဲ့ ကျန်းမာရေး အဆင့်အတန်းလည်း ပိုမိုမြင့်မားလာကာ ကူးစက်ရောဂါဖြစ်ပွားမူများ ကျဆင်းသွားနိုင်မည် ဖြစ်ပါသည်။"

NLD ပါတီ၊ ပြည်သူ့လွှတ်တော် ဥပဒေကြမ်းကော်မတီဝင် ပြည်သူ့လွှတ်တော် ကိုယ်စားလှယ် ဒေါက်တာ ဝေဖြိုးအောင်ကလည်း ဒီဥပဒေကို လွှတ်တော်က အတည်ပြုပေးဖို့ ထောက်ခံဆွေးနွေးခဲ့ပါတယ်။

ပြည်သူ့လွှတ်တော် ကျန်းမာရေးနဲ့ အားကစားဖွံ့ဖြိုးတိုးတက်ရေး ကော်မတီ ဥက္ကဋ္ဌ ဒေါက်တာ စံရွှေဝင်းက ဒီဥပဒေက ကပ်ရောဂါအသစ်ဖြစ်တဲ့ ကိုရိုနာဗိုင်းရပ်စ် (Covid 19) လို ကပ်ရောဂါကို၊ ကာကွယ်ထိန်းချုပ်ဖို့ အများကြီး အထောက်အကူပြုနိုင်မယ်လို့ ပြောပါတယ်။

"ခုဖြစ်ပေါ်နေတဲ့ Covid  နဲ့ ပတ်သက်ပြီးတော့ Control Measure တို့ Containment Measure တို့ကလည်း အရင်တုန်းက ဥပဒေမှာ မပါခဲ့ပါဘူး။ ဘာဖြစ်လို့လည်းဆိုတော့ ရောဂါခြင်းမတူဘူး၊ နောက်တစ်ခုက Covid 19 ရောဂါက အခုမှဖြစ်လာတဲ့ ကိစ္စဖြစ်တဲ့အတွက်ကြောင့် လက်ရှိ ဥပဒေထဲမှာလည်း ထဲထဲဝင်ဝင် ပါတာတွေ မရှိပါဘူး။ ဒီအချက် သုံးချက်အပေါ် မူတည်ပြီးတော့ ခုအသစ်ရေးဆွဲခဲ့တဲ့ ကူးစက်ရောဂါ နှိမ်နှင်းရေးဥပဒေဟာ တခြားရောဂါတွေကိုသာမက Covid ရောဂါ ကာကွယ်နှိမ်နှင်းရေး အတွက်ကိုလည်း အများကြီး အထောက်အကူပြုမှာ ဖြစ်ပါတယ်။"

ဒီဥပဒေကို မကြာခင် အတည်ပြုနိုင်ဖို့ အခြေအနေရှိတယ်လို့လည်း သူက ဆက်ပြောပါတယ်။

တစ်ဆက်တည်းမှာပဲ ဒေါက်တာ စံရွှေဝင်းက ကပ်ရောဂါနဲ့ ပတ်သက်ပြီး ဥပဒေမလိုက်နာရင် ပြစ်မှု ပြစ်ဒဏ်နဲ့ ဆိုင်တဲ့ အချက်တွေ အသေးစိတ်ပါဝင်တဲ့အတွက် ထိရောက်မူရှိမယ်လို့ ယူဆကြောင်း ပြောပါတယ်။

"ဒီထဲမှာတော့ ဥပဒေနဲ့ ပတ်သက်ပြီးတော့ ပြစ်မှုပိုင်းဆိုင်ရာ ပြင်ဆင်မှုတွေလည်း အများကြီး လုပ်ထားပါတယ်။ အရင်တုန်းကဆိုရင် နှစ်ခုလောက်ပဲ ရှိတာပေါ့လေ။ ဒဏ်ငွေက နည်းနည်းပဲရှိတယ်။ ထောင်ဒဏ်လေး ကလည်း နည်းနည်းပဲရှိတယ်ဆိုတော့ လူတွေက ဂရုမစိုက်ကြတာလည်း ပါတယ်။ ခုက ဒီထက် အများကြီး များပါပြီ ။ အများကြီး များတာဖြစ်တဲ့အပြင် အများကြီးလည်း ကျယ်ပြန့်လာတာဖြစ်တဲ့အတွက် ထိန်းချုပ်တဲ့အခါမှာ အများကြီး အကျိုးကျေးဇူးရှိလာလိမ့်မယ် အများကြီး ထိရောက်လာလိမ့်မယ်လို့ မြင်ပါတယ်။"

ဒီကနေ့ကစပြီး နှစ်ပတ်ကြာ ကျင်းပဖို့ရှိတဲ့ ပြည်သူ့လွှတ်တော်၊ အမျိုးသားလွှတ်တော်နဲ့ ပြည်ထောင်စုလွှတ်တော် အစည်းအဝေးတွေမှာ၊ ကိုရိုနာဗိုင်းရပ်စ် ကူးစက်ပြန့်ပွားမှုကြောင့် ဖြစ်ပေါ်လာတဲ့ ကျန်းမာရေး၊ စီးပွားရေးနဲ့ နောက်ထပ်ဘဏ္ဍာငွေ ခွဲဝေသုံးဆွဲရေး ဥပဒေကြမ်းကိစ္စ၊ ကျန်းမာရေးအတွက် ကမ္ဘာ့ဘဏ် အပြည်ပြည်ဆိုင်ရာ ဖွံ့ဖြိုးရေးအဖွဲ့ IDA ကနေ၊ အမေရိကန်ဒေါ်လာ သန်း ၅၀ ချေးယူမယ့် ကိစ္စတွေနဲ့ ပတ်သက်ပြီး အဓိက ဆွေးနွေးခဲ့ကြပါတယ်။

၂၀၁၉ - ၂၀၂၀ ဘဏ္ဍာနှစ်အတွက် ပြည်ထောင်စုရဲ့ နောက်ထပ် ဘဏ္ဍာငွေ ခွဲဝေသုံးစွဲရေး ဥပဒေကြမ်းကို၊ စီမံကိန်းနဲ့ ဘဏ္ဍာရေးဝန်ကြီဌာန ဒုတိယဝန်ကြီး ဦးမောင်မောင်ဝင်းက ပြည်ထောင်စုလွှတ်တော်မှာ တင်ပြရာမှာ၊ ကိုရိုနာဗိုင်းရပ်စ်ကြောင့် လိုအပ်လာတဲ့ ငွေကြေးတွေအတွက် ဝန်ကြီးဌာနတွေအတွက် ခွင့်ပြုခဲ့တာတွေ ရှိတယ်လို့ ပြောပါတယ်။

လွှတ်တော် ကိုယ်စားလှယ် တစ်ဦးကလည်း ကိုရိုနာဗိုင်းရပ်စ် ကူးစက်ပြန့်ပွားမူကြောင့် ပြောင်းလဲသွားတဲ့ အခြေအနေနဲ့လိုက်ပြီး ဘဏ္ဍငွေ အသုံးပြုဖို့ လိုအပ်လာတယ်လို့ ပြောပါတယ်။

တစ်ဆက်တည်းမှာပဲ သမ္မတက ပေးပိုတဲ့ ကျန်းမာရေးဆိုင်ရာ တုံ့ပြန်မူ အရေးပေါ် စီမံချက် အကောင်အထည်ဖော်ဖို့ ကမ္ဘာ့ဘဏ် အပြည်ပြည်ဆိုင်ရာ ဖွံ့ဖြိုးရေးအဖွဲ့ IDA ကနေ အမေရိကန်ဒေါ်လာ သန်း ၅၀ ချေးယူမယ့်ကိစ္စအပေါ် ကျန်းမာရေးနဲ့ အားကစားဝန်ကြီးဌာနက ဒုတိယဝန်ကြီး ရှင်းလင်းတင်ပြခဲ့ပါတယ်။

ဒုတိယဝန်ကြီး ဒေါက်တာ မြလေးစိန်က ကိုရိုနာဗိုင်းရပ်စ် ( Covid 19 ) အရေးပေါ်တုံ့ပြန်ရေး စီမံချက်ကို ၂၀၂၀ ပြည့်နှစ် ဧပြီလကနေ ၂၀၂၂ ခုနှစ် မတ်လအထိ၊ သတ်မှတ်ထားပြီး အမေရိကန်ဒေါ်လာ သန်း ၅၀ အသုံးပြုမယ့် စီမံချက်ကို ရှင်းပြခဲ့ပါတယ်။

ဒါ့အပြင် သမ္မတက ပေးပို့တဲ့ တိုင်းပြည်ရဲ့ လိုငွေကို ဖြည့်ဆည်းဖို့၊ အပြည်ပြည်ဆိုင်ရာ ငွေကြေးရန်ပုံငွေအဖွဲ့ IMF ထံကနေ၊ အမေရိကန်ဒေါ်လာ သန်း ၇၀၀ ချေးယူဖို့နဲ့ ပတ်သက်ပြီးတော့လည်း သက်ဆိုင်ရာ အစိုးရဝန်ကြီးဌာနတွေက လွှတ်တော်ကို တင်ပြခဲ့ပါတယ်။

ကိုရိုနာဗိုင်းရပ်စ် ကူးစက်ကပ်ရောဂါကာလအတွင်း ကျင်းပတဲ့ ဒီနေ့ ပြည်ထောင်စုလွှတ်တော် အစည်းအဝေးကို လွှတ်တော် ကိုယ်စားလှယ် စုစုပေါင်း ၅၇၇ ဦး တက်ရောက်ပြီး၊ ၇၅ ဦး ခွင့်တိုင်ကြားထားပါတယ်။