ဗိုင်းရပ်စ်ကူးစက်မှု ရန်ကုန်စက်မှုဇုန်ထဲ ရောက်ရှိ

ရန်ကုန်တိုင်း၊ လှိုင်သာယာမြို့နယ်၊ အနော်ရထာစက်မှုဇုန်မှာရှိတဲ့ ချန်းရိဖိနပ်စက်ရုံက တရုတ်စကားပြန်တစ်ဦး ကိုရိုနာဗိုင်းရပ်စ်ပိုး တွေ့ရှိခဲ့တာကြောင့် အနီးကပ် ထိတွေခဲ့သူတွေကို စောင့်ကြည့်နေပြီး စက်ရုံက အလုပ်သမား တွေကလည်း ကူးစက်ခံရမှာကို စိုးရိမ်နေကြပါတယ်။ နေရပ်ပြန်သွားတဲ့ တချို့ အလုပ်သမားတွေကိုလည်း ရွာတွေက အဝင်မခံတော့ဘဲ စာသင်ကျောင်းမှာပဲ နေထိုင်ဖို့ စီစဉ်နေပါတယ်။

ကိုရိုနာဗိုင်းရပ်စ်ကူးစက်ခံရကြောင်း ကျန်းမာရေးနဲ့ အားကစားဝန်ကြီးဋ္ဌာနက မနေ့က ဧပြီ ၂၄ ရက်နေ့ညမှာ ထုတ်ပြန်တဲ့ လူနာအမှတ် ၁၄၄ ဟာ လှိုင်သာယာမြို့နယ် အနော်ရထာ စက်မှုဇုန်မှာရှိတဲ့ ချန်းရိဖိနပ်စက်ရုံက မြန်မာနိုင်ငံသား တရုတ်စကားပြန် အမျိုးသား ဖြစ်ပါတယ်။

အဲဒီစကားပြန်မှာ ကိုရိုနာဗိုင်းရပ်စ်တွေ့ရှိပြီး သူနဲ့ တိုက်ရိုက် ထိတွေ့ခဲ့သူတွေ စောင့်ကြည့်ဖို့ လုပ်ထားတယ်လို့ လှိုင်သာယာမြို့နယ် တိုင်းဒေသကြီးလွှတ်တော် ကိုယ်စားလှယ် ဦးမြတ်မင်းသူက ပြောပါတယ်။

“စက်ရုံမှာ သူကလုပ်ခဲ့တယ်ပေါ့ဗျာ။ စက်ရုံက ၁၀ ရက်နေ့ ပိတ်တယ်။ ပိတ်တော့ သူက ၁၅ ရက်နေ့လောက်မှာ ပြန်သွားတယ်။ သူနေထိုင်ခဲ့တဲ့ ကာလအတောအတွင်းမှာ သူနဲ့ ထိတွေ့ခဲ့တဲ့ ပုဂ္ဂိုလ်တွေကို မနက်ပိုင်းက ကျန်းမာရေးဦးစီးဌာနက Quarantine လုပ်ဖို့ ဆောင်ရွက်ပြီးပြီ။ ကျွန်တော်သိသလောက် စက်ရုံက လေးယောက်ပေါ့ဗျာ။ ဒီလူတွေကို Quarantine စင်တာကို ပို့ပြီ။ နောက်သူနဲ့ အခန်းအတူတူ နေခဲ့သူတွေ ရှိတယ်။ အဲဒီအခန်းထဲက ၃၇ ယောက်ကို Home Quarantain လုပ်ဖို့ အကုန်လုံး မှာခဲ့ပါတယ်။”

အဲဒီအတည်ပြုလူနာ အမျိုးသားဟာ လှိုင်သာယာမြို့နယ်ကနေ မိုးညှင်းမြို့ကို ဧပြီလ ၁၅ ရက်နေ့က ကားစင်းလုံးငှား သွားရောက်ခဲ့တာဖြစ်ပြီး မိုးညှင်းမြို့ စောင့်ကြည့်ရေးစခန်း ဝင်ခဲ့ရာမှာ အခုလို ရောဂါပိုး တွေ့ရှိခဲ့တာဖြစ်ပါတယ်။

ချန်းရိဖိနပ်စက်ရုံမှာ အလုပ်သမား ၈၀၀၀ ကျော်ရှိပြီး လူဦးရေအများကြီးနဲ့ အလုပ်လုပ်ကိုင်နေရတာကြောင့် ကူးစက်မှာ စိုးရိမ်သလို ကိုယ်တိုင် အသိစိတ်ဓာတ်နဲ့ စောင့်ကြည့်ခံသွားမယ်လို့ ချန်းရိစက်ရုံအလုပ်သမား ကိုချစ်ကိုကိုအောင်က ပြောပါတယ်။

“ကျွန်တော်တို့က လူဦးရေအများကြီးနဲ့ အလုပ်လုပ်နေရတဲ့အတွက် ပြီးတော့ စကားပြန်ဆိုတာလည်း တစ်ရုံးလုံးကို ပတ်ပြီးတော့ သွားနေရတာလေ။ သွားနေရတာဆိုတော့ ဘယ်သူတွေကို ဘယ်လိုကူးထားမှန်းလဲ မသိဘူး။ အဲဒီအတွက် ကျွန်တော်တို့ အလုပ်သမားတွေ စိုးရိမ်နေရပါတယ်။ အစိုးရကိုလည်း ပြောချင်ပါတယ် ရောဂါမပြန့်အောင် ဘယ်လို ထိန်းချုပ်ပေးနိုင်မလဲပေါ့နော်။ သူများတွေဆီ ကူးမှာစိုးတဲ့အတွက် ကျွန်တော်တို့ ကိုယ်တိုင်က  Quarantine ဝင်ပါ့မယ်ဆိုပြီး စာရေးတင်ပြီး ဒီနေ့ပဲ စဝင်မှာပါ။”

ချန်းရိ စက်ရုံက အလုပ်သမားတချို့ဟာ နေ့လယ်ပိုင်းကစပြီး သူတို့ရဲ့ နေရပ်ကို ပြန်သွားကြသူတွေရှိပေမယ့် ရွာတွေက အလုပ်သမားတွေကို အဝင်မခံတော့ပါဘူး။

တွံတေးမြို့နယ်က ရွာတစ်ရွာကနေ အဲဒီ ဖိနပ်စက်ရုံကို လာရောက်လုပ်ကိုင်နေတဲ့ ကိုနိုင်ကိုကျော်ကတော့ ဒီနေ့မနက် ၁၁ နာရီခွဲအထိ အလုပ်ဆင်းခဲ့ပြီး အလုပ်ကအပြန် ရွာက အဝင်မခံတော့တာကြောင့် သူအပါအဝင် လူ ၅၀ ကျော်လောက် ရွာအပြင်က စာသင်ကျောင်းမှာ နေနေရတယ်လို့ ပြောပါတယ်။

“ကျွန်တော်တို့က စနေနေ့ဆို အိုဗာတိုင်း မရှိရင် ၁၁ နာရီခွဲ ပြန်လာရတယ်။ ပြန်လာရတော့ ရွာကိုဝင်တော့ ကျွန်တော်တို့က အလုပ်ထဲမှာဆိုတော့ မသိဘူး။ ရွာက စကားပြန်တစ်ယောက် ကူးခံရတယ်ဆိုတာ သိသွားတယ်။ သိသွားတော့ ရွာထဲကို ပေးမဝင်တော့ဘူး။ တစ်ခါတည်း ၁၄ ရက်နေ့မယ်ဆိုပြီး စာသင်ကျောင်း ခေါ်သွားပြီး စာသင်ကျောင်းထဲမှာ နေရတယ်။ အယောက် ၅၀ ကျော် ၆၀ လောက်ရှိမယ်ခင်ဗျ။”

မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ် CTUM က ဒေါ်ဖြိုးစန္ဒာစိုးကတော့ ဒီကိစ္စနဲ့ပတ်သက်ပြီး နိုင်ငံတော် သမ္မတရုံးနဲ့ အလုပ်သမားဝန်ကြီးဌာနတွေကို သတင်းပေးပို့ထားပြီး အလုပ်ရှင်တွေအနေနဲ့ တာဝန်ယူ ပေးစေချင်တယ်လို့ ပြောပါတယ်။

“ကျွန်မတို့ အဖွဲ့ချုပ်တွေက ပြောနေတာက စက်ရုံတွေကို ယာယီပိတ်ပေးထားပါ။ ကူးစက်ပြန့်ပွားမှု အစုလိုက် အပြုံလိုက်တွေ မဖြစ်အောင်လို့ စက်ရုံတွေကို ယာယီပိတ်ပေးဖို့ အစဉ်တစိုက်ကို တင်ပြနေပါတယ်။ အဲဒီတော့ အလုပ်ရှင်တွေအနေနဲ့ ဒီဟာကို တာဝန်ယူပေးစေချင်ပါတယ်။ စက်မှုဇုန်ကော်မတီ အသီးသီးမှာလည်း အလုပ်ရှင်တွေရှိကြပါတယ်။ ဆိုတော့ ဒါကို တာဝန်ယူပေးလုပ်ပေးပါလို့ တင်ပြချင်ပါတယ်။”

နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကတော့ လှိုင်သာယာစက်ရုံ တစ်ရုံက ဝန်ထမ်းတစ်ယောက် ကိုရိုနာဗိုင်းရပ်စ် ကူးစက်ခံရတဲ့ သတင်းတွေ ထွက်တာနဲ့ စိုးရိမ်ကြောင့်ကြမှုတွေ ဖြစ်ပေါ်စေကြောင်း သူ့ရဲ့ဖေ့စ်ဘွတ်အကောင့်ကနေ ဒီနေ့ညနေမှာရေးသားထားပါတယ်။

ဒါကြောင့် ပထမဆုံးအနေနဲ့ ရောဂါပိုးတွေ့သူကို သင့်တော်တဲ့ ဆေးရုံမှာ အမြန်ဆုံးကုသပေးရေး၊ ဒုတိယအနေနဲ့ ရောဂါကူးစက်ခံရသူနဲ့ ထိတွေ့ခဲ့သူတွေကို မေးမြန်းဆက်သွယ်ရကြောင်းနဲ့ တတိယအနေနဲ့ ထိတွေ့ခဲ့သူတွေကို Quarantine လုပ်ရပြီး စောင့်ကြည့် စစ်ဆေးရကြောင်း ပြောထားပါတယ်။

အဲဒီအစီအစဉ်တွေကို တစ်ဆင့်ပြီးတစ်ဆင့် ဆောင်ရွက်နေကြောင်းလည်း နိုင်ငံတော် အတိုင်ပင်ခံပုဂ္ဂိုလ်က ပြောပါတယ်။

တရုတ်နိုင်ငံသားပိုင် ချန်းရီဖိနပ်စက်ရုံဟာ Adidas တံဆိပ်ဖိနပ်တွေကို ချုပ်လုပ်နေတာဖြစ်ပြီး စက်ရုံ ဖွင့်လှစ်ခဲ့တာ ခြောက်နှစ်လောက်ရှိပြီလို့ ဆိုပါတယ်။

ကျန်းမာရေးနဲ့ အားကစားဝန်ကြီးဌာနက စက်ရုံအလုပ်ရုံတွေကို ယာယီ ပိတ်ထားဖို့နဲ့ သက်ဆိုင်ရာက စစ်ဆေးတာတွေ လုပ်ဆောင်ပြီးမှ ဖွင့်လှစ်ခွင့်ပြုမယ်လို့ ထုတ်ပြန်ထားပါတယ်။

ချန်းရိဖိနပ်စက်ရုံကို သက်ဆိုင်ရာက စစ်ဆေးပြီး ပြန်လည်ခွင့်ပေးထားတဲ့အတွက် ဒီနေ့မှာ စက်ရုံ ပြန်ဖွင့်တဲ့နေ့ မှာပဲ အလုပ်သမားတစ်ဦး ဗိုင်းရပ်စ် ကူးစက်ခံထားရကြောင်း သိရတာဖြစ်ပါတယ်။