ကိုရိုနာဗိုင်းရပ်စ် ကူးစက်ခံရသူ ဧည့်ခံပွဲ လုပ်ခဲ့တဲ့ရွာကို ဆက်သွယ်မှု ဖြတ်တောက်

ကိုရိုနာဗိုင်းရပ်စ် ကူးစက်ခံနေရသူ ချင်းအမျိုးသား ဧည့်ခံပွဲလုပ်ခဲ့တဲ့ တီးတိန်မြို့နယ်ထဲက ရွာတစ်ရွာကို ပြင်ပနဲ့ ကူးလူးဆက်သွယ်မှု ဖြတ်တောက်လိုက်ပြီး သူနဲ့ထိတွေ့ခဲ့တဲ့သူတွေ အားလုံးကို စောင့်ကြည့်လူနာအနေနဲ့ သတ်မှတ်ထားတယ်လို့ ချင်းပြည်နယ် လွှတ်တော်ဥက္ကဋ္ဌ ဦးဇိုဘွဲက RFA ကို ဒီနေ့ မတ်လ ၂၄ ရက်နေ့ မနက်ပိုင်းမှာ ပြောပါတယ်။

ကလေး - တီးတိန်၊ တီးတိန် - ကပ်တိလ် ကားလိုင်းတွေကို ဒီနေ့က စပိတ်လိုက်ပြီး ကားဂိတ်တာဝန်ရှိသူတွေနဲ့ ယာဉ်မောင်းတွေကိုလည်း စောင့်ကြည့်စစ်ဆေးနေတယ်လို့ သူက ပြောပါတယ်။ တစ်ချိန်တည်းမှာပဲ နိုင်ငံတော် သမ္မတရုံး ပြောရေးဆိုခွင့်ရှိသူ ဦးဇော်ဌေးကလည်း တီးတိန်နဲ့ စစ်ကိုင်းဘက်က စိုးရိမ်တကြီးနဲ့ ဆင်းလာကြသူတွေ ကို ကန့်သတ်ထားပြီလို့ သူ့ရဲ့ လူမှုကွန်ရက် စာမျက်နှာမှာ ရေးသားထားပါတယ်။

ကိုရိုနာဗိုင်းရပ်စ်ကူးစက်ခံရသူ နှစ်ဦး စတင်တွေ့ရှိကြောင်း ကျန်းမာရေးဝန်ကြီးဌာနက မတ်လ ၂၃ ရက်နေ့ ညသန်းခေါင်ယံမှာ ထုတ်ပြန်ခဲ့ပါတယ်။

ခရီးသွားမှတ်တမ်းတွေအရ ကူးစက်ခံရသူ နှစ်ဦးဟာ လေကြောင်းလိုင်းနဲ့ အမေရိကန်နဲ့ အင်္ဂလန်နိုင်ငံတွေကနေ ပြန်လာကြသူတွေပါ။

ပြည်ပကနေ ပြန်လာသူတိုင်း မိမိနေအိမ်မှာ ၁၄ ရက်ကြာ သီးခြားနေထိုင်ကြမယ့် အစီအစဉ်ကိုလည်း ဆက်ပြီး ဆောင်ရွက်မယ်လို့ ဦးဇော်ဌေးက ရေးသားထားပါတယ်။

ကူးစက်ခံရသူ ချင်းအမျိုးသားကို တီးတိန်ပြည်သူ့ဆေးရုံမှာ သီးခြားထားရှိပြီး စောင့်ရှောက်ထားပါတယ်။

အင်္ဂလန်က ပြန်လာတဲ့သူကိုတော့ ရန်ကုန်တိုင်း မြောက်ဥက္ကလာပမြို့နယ် ဝေဘာဂီဆေးရုံမှာ စောင့်ကြပ် ကုသ ပေးနေပါတယ်။

မြန်မာနိုင်ငံမှာ စောင့်ကြည့်လူနာ ၂၁၂ ယောက်၊ သံသယလူနာ နှစ်ယောက်၊ ကိုရိုနာဗိုင်းရပ်စ်တွေ့သူ နှစ်ယောက်နဲ့ ဗိုင်းရပ်စ်မတွေ့ဘဲ အခြားရောဂါဖြင့် သေဆုံးသူ ၁၃ ယောက် ရှိတယ်လို့ ကျန်းမာရေးဝန်ကြီးဌာနရဲ့ မတ်လ ၂၄ ရက်နေ့ ထုတ်ပြန်ချက်မှာ ဖော်ပြထားပါတယ်။