မြန်မာနိုင်ငံမှာ ကိုဗစ်အတည်ပြုလူနာ တသိန်းခုနှစ်သောင်းနီးပါး ရှိလာ

မနေ့က တရက်တည်း ကိုဗစ်-၁၉ အတည်ပြုလူနာသစ် ၂၉၆၉ ဦးတွေ့ရှိခဲ့တယ်လို့ စစ်ကောင်စီ ကျန်းမာရေးဝန်ကြီးဌာနက ဇူလိုင်လ ၅ ရက်နေ့ညက သတင်းထုတ်ပြန်ပါတယ်။

ဒီလူနာသစ် ၂၉၆၉ ဦးနဲ့ဆိုရင် အတည်ပြုလူနာ စုစုပေါင်း ၁၆,၈၃၇၄ ယောက် ရှိနေပါပြီ။ မနေ့က ကိုဗစ်-၁၉ ကူးစက်ခံရပြီး သေဆုံးသူ ၄၂ ဦး ရှိခဲ့တာကြောင့် သေဆုံးသူ စုစုပေါင်းက ၃၄၆၁ ဦး အထိ ရှိနေပြီ ဖြစ်ပါတယ်။

လက်ရှိ ပိုးတွေ့အတည်ပြု လူနာတွေထဲမှာ ကိုဗစ်မျိုးရိုးဗီဇကွဲရောဂါပိုး သုံးမျိုးကို စစ်ဆေးတွေ့ရှိထားတယ်လို့ စစ်ကောင်စီ ကျန်းမာရေးဝန်ကြီးဌာနက ဇွန်လက ထုတ်ပြန်ကြေညာထားပါတယ်။

ရှမ်းပြည်နယ်မြောက်ပိုင်း လားရှိုးမြို့မှာတော့ ဇွန်လ ၈ ရက်နေ့ကစပြီး ဇူလိုင် ၅ ရက်နေ့အထိ ကိုဗစ်-၁၉ ကြောင့် သေဆုံးနှုန်းတွေ မြင့်နေပြီး ပိုးတွေ့အတည်ပြုလူနာ တွေ့ရှိနှုန်းလည်း တစ်နေ့ထက်တစ်နေ့ မြင့်တက်လာနေတယ်လို့ ပရဟိတ လုပ်ဆောင်ပေးနေသူတွေက ပြောပါတယ်။

စစ်ကောင်စီ ကျန်းမာရေးဝန်ကြီးဌာနရဲ့ မနေ့က ထုတ်ပြန်ချက်အရ ကိုဗစ်အတည်ပြုလူနာသစ်တွေ အများဆုံးတွေ့တဲ့ ဒေသတွေက ပဲခူးတိုင်း၊ ရှမ်းပြည်နယ်၊ ရန်ကုန်တိုင်း၊ ဧရာဝတီတိုင်း၊ စစ်ကိုင်းတိုင်း၊ မကွေးတိုင်း၊ မွန်ပြည်နယ်နဲ့ မန္တလေးတိုင်းတို့ ဖြစ်ပါတယ်။