နိုင်ငံတော်အတိုင်ပင်ခံပုဂ္ဂိုလ် ဒီဇိုင်းဆွဲထားတဲ့ ဆက်တီ ခုံတွေ ဈေးကွက်မှာ ရောင်းချမည်

နိုင်ငံတော်ရဲ့ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကိုယ်တိုင်ဒီဇိုင်းရေးဆွဲထားတဲ့ ဆက်တီခုံတွေကို မကြာမီဈေးကွက်အတွင်းမှာ ဖြန့်ချီသွားမယ်လို့ စက်မှုဝန်ကြီးဌာန၊ စက်မှုကြီးကြပ်ရေးနဲ့ စစ်ဆေးရေးဦးစီးဌာန ညွန်ကြားရေးမှူးချုပ် ဒေါ်အေးအေးဝင်းက ပြောပါတယ်။

နေပြည်တော် စက်မှုဝန်ကြီးဌာနမှာ ဒီနေ့ ကျင်းပတဲ့ အသေးစားနဲ့ အလတ်စားလုပ်ငန်းတွေ ဖွံ့ဖြိုးတိုးတက်ဖို့ စွမ်းဆောင်ရည်မြှင့်တင်ရေးသင်တန်း ဖွင့်ပွဲအပြီးမှာ ညွှန်ကြားရေးမှူးချုပ် ဒေါ်အေးအေးဝင်း က ပြောတာဖြစ်ပါတယ်။

"အခုဆိုရင် မှန်နဲ့လုပ်တဲ့ နိုင်ငံတော်အတိုင်ပင်ခံရဲ့ ဒီဇိုင်းနဲ့ပေါ့နော် ကျမတို့ မှန်စားပွဲတွေ ခုလုပ်နေပါပြီ၊ ကျမတို့ ပြီးခဲ့တဲ့ ပြပွဲမှာတုန်းကလည်း ရောင်းတော့ တော်တော်များများကလည်း အော်ဒါတွေပေးလာတယ်ပေါ့၊ သူကိုယ်တိုင် မှန်ရဲ့အကျယ်အဝန်းနဲ့ တိုင်တွေထားမယ့်နေရာကအစ အမြင့်ကအစ သူကဒီဇိုင်းလေးပေးပြီးတော့ ကျမတို့ရဲ့ ပြည်ထောင်စုဝန်ကြီးကနေပြီးတော့ အမကြီးရဲ့လိုအပ်ချက်အတိုင်း ပုံဖော်ပေးတာပေါ့နော်"