ထားဝယ်မှာ လယ်သမား ၁၀ ဦးကို ထောင်ဒဏ်တွေ ချမှတ်

တနင်္သာရီတိုင်းဒေသကြီး ထားဝယ်မြို့မှာ ဝတ္တရားနှောင့်ယှက်မှု၊ သက်သေခံပစ္စည်းဖျောက်ဖျက်မှု၊ ဆဲဆိုမှုပုဒ်မတွေနဲ့ တရားစွဲခံထားရသူ လယ်သမား ၁၉ ဦးထဲက အမျိုးသား ၁၀ ဦးကို ဒီနေ့ ထားဝယ်မြို့နယ် တရားရုံးက ထောင်ဒဏ်နဲ့ အမျိုးသမီး ၉ ဦးကို ငွေ ဒဏ်တွေ အသီးသီးချမှတ်ခဲ့ပါတယ်။

တရားရုံးက ပြစ်ဒဏ်တွေ ချမှတ်လိုက်တာနဲ့ ပတ်သက်ပြီး ငွေဒဏ်တစ်သောင်းပေးဆောင်ခဲ့တဲ့ မရွှေဇင်ယုက အခုလိုပြောပါတယ်။

"တရားစွဲတဲ့အထဲမှာ ယောကျ်ား ၁ဝ ယောက် ကို ထောင်ချလိုက်တယ်၊ မိန်းမ ၉ ယောက် ကို ငွေဒဏ်နဲ့ လွှတ်ပေးတယ်၊ အဲဒီအထဲမှာ ကိုကြူလွင် တစ်ယောက်ကတော့ ပုဒ်မ ၃ ခုနဲ့ရှင့်၊ ၉ လနဲ့ ၁၅ ရက် တစ်ယောက်ရယ်၊ ၆ လတစ်ယောက်ရယ်၊ ကျန်တဲ့ ၈ ယောက်ကတော့ ၃ လရှင့်၊ မိန်းကလေး ၉ ယောက် က ထောင်ဒဏ် ၆ လနဲ့ ငွေဒဏ် ၁ သောင်းကို ကြိုက်တာရွေးပေါ့နော်၊ ကျမတို့ ငွေဒဏ်ပဲဆောင်လိုက်တယ်"

အမျိုးသား ၁၀ဦးထဲက ၁ ဦးဟာ ဝတ္တရားနှောင့်ယှက်မှု၊ သက်သေခံပစ္စည်းဖျောက်ဖျက်မှု၊ ဆဲဆိုမှုပုဒ်မ ၃ ခုနဲ့ ထောင် ဒဏ် ၉ လနဲ့ ၁၅ရက် ချမှတ်ခံရပြီး၊ ဆဲဆိုမှု၊ ဝတ္တရားနှောက်ယှက်မှု ပုဒ်မ ၂ ခုနဲ့ ထောင်ဒဏ် ၆လ ချမှတ်ခံရသူ ၁ ဦး၊ ကျန်တဲ့ ၈ ဦးကိုတော့ ဝတ္တရားနှောင့်ယှက်မှု ပုဒ်မနဲ့ ထောင်ဒဏ် ၃ လစီ ချမှတ်ခဲ့ပြီး အမျိုးသမီး ၉ ဦးကို ငွေဒဏ် တစ်သောင်းစီ ချမှတ်ခဲ့တယ်လို့ သိရပါတယ်။

ပြီးခဲ့တဲ့ ဇွန်လ ၁ ရက်နေ့က ထားဝယ်မြို့သစ်စီမံကိန်းအတွက် တိုင်းဒေသကြီးအစိုးရက သိမ်းထားတဲ့ လယ်ယာမြေတွေထဲက လျော်ကြေးမယူထားတဲ့ လယ်သမား ၂၀ ပိုင်ဆိုင်တဲ့ လယ်မြေတွေပေါ်မှာ ခရိုင်အုပ်ချုပ်ရေးမှူးတို့အဖွဲ့က မြေကွက်ဖော်ဆောင်တာကို လယ်သမားတွေက တားဆီးခဲ့တာဖြစ်ပါတယ်။

အဲ့ဒီလိုတားဆီးခဲ့တဲ့ လယ်သမားတွေက ၁၉ ဦးကို ထားဝယ်ခရိုင် ဒုအုပ်ချုပ်ရေးမှူးက တရားစွဲခဲ့တာဖြစ်ပါတယ်။

ထားဝယ်မြို့သစ် စီမံကိန်းအတွက် တိုင်းဒေသကြီးအစိုးရက လယ်ယာမြေ ဧက ၅၀၀ ကျော်ကို သိမ်းဆည်းထားတာဖြစ်တယ်လို့ သိရပါတယ်။