မြန်မာ့အရေး တွေ့ဆုံဆွေးနွေးမှု ဖြစ်လာနိုင်ကြောင်း ထိုင်း ဒုနိုင်ငံခြားရေးဝန်ကြီး ပြော

ထိုင်းနိုင်ငံက ဦးဆောင်တဲ့ လူသားချင်း စာနာထောက်ထားမှုဆိုင်ရာ အကူအညီပေးရေး ဆောင်ရွက်မှုဟာ မြန်မာနိုင်ငံတွင်း တွေ့ဆုံဆွေးနွေးမှုကို လမ်းဖွင့်ပေးနိုင်ဖို့ ရည်ရွယ်တယ်လို့ ထိုင်းနိုင်ငံခြားရေး ဒုဝန်ကြီး Sihasak Phuangketkeow က ပြောကြောင်း စင်ကာပူ The Straits Times သတင်းက ဖေဖော်ဝါရီ ၆ ရက် ဒီနေ့ ဖော်ပြထားပါတယ်။

ထိုင်းနိုင်ငံကဦးဆောင်နေတဲ့ ဒီအစီအစဉ်ဟာ စစ်ကောင်စီ၊ တိုင်းရင်းသား လက်နက်ကိုင်အဖွဲ့တွေနဲ့ အမျိုးသား ညီညွတ်ရေးအစိုးရ (NUG) တို့ ပါဝင်တဲ့ တွေ့ဆုံဆွေးနွေးမှုတွေကို ဦးတည်သွားစေနိုင်တယ်လို့ ဆိုပါတယ်။

အခုလို ဆွေးနွေးညှိနှိုင်းဖို့အတွက် စစ်ကောင်စီဘက်က သဘောတူထားပြီလား ဆိုတာကိုတော့ Sihasak က ထုတ်မပြောခဲ့ပါဘူး။

အခုနှစ်လယ်ပိုင်းလောက်မှာ ဆွေးနွေးညှိနှိုင်းမှုပုံစံမျိုး စတင်သင့်တယ်လို့ ထိုင်းနိုင်ငံခြားရေး ဒုဝန်ကြီးက ပြောထားပေမယ့် အသေးစိတ်ကိုတော့ ပြောမထားပါဘူး။

တိုက်ပွဲကြောင့် နေရပ်စွန့်ခွာထွက်ပြေးနေရသူ နှစ်သောင်းနဲ့ ဒေသခံတွေကို အစားအစာနဲ့ ဆေးဝါးတွေပေးပို့နိုင်ဖို့ ထိုင်း - မြန်မာနယ်စပ်မှာ လူသားချင်းစာနာမှုဆိုင်ရာ ဘေးကင်းဇုန်တစ်ခုကို ဖေဖော်ဝါရီလကုန်ပိုင်းမှာ တည်ဆောက်နိုင်ဖို့ ထိုင်းနိုင်ငံက စီစဉ်နေတယ်လို့ Sihasak က ပြောပါတယ်။

အာဆီယံအဖွဲ့ဝင်နိုင်ငံတွေက ကြိုးပမ်းမယ့် ဒီအစီအစဉ်ရဲ့ ရည်ရွယ်ချက်ဟာ အဆုံးသတ်မှာ ပဋိပက္ခတွေကို ထိန်းချုပ်နိုင်ပြီး တွေ့ဆုံဆွေးနွေးလမ်းကြောင်းတွေ ပွင့်စေဖို့ဖြစ်တယ်လို့ ဆိုထားပါတယ်။