လေလွင့်ခွေးတွေကို မသတ်ဖို့ ဆန္ဒပြ

ရန်ကုန်မြို့က ပိုင်ရှင်မဲ့ လမ်းဘေးလေလွင့်ခွေးတွေကို အဆိပ်ကျွေးသတ်နေတာတွေ ရပ်တန့်ပေးဖို့အတွက် ရန်ကုန်မြို့ မြို့တော်ခန်းမရှေ့မှာ တိရိစ္ဆာန်ချစ်သူများ ကွန်ယက် အဖွဲ့ဝင် အယောက် ၄၀ လောက်က ဒီကနေ့ ဆန္ဒပြ တောင်းဆိုကြပါတယ်။

လေလွင့်ခွေးတွေကို မသတ်ဘဲ သင်းကွပ်တာ၊ ခွေးရူးပြန် ကာကွယ်ဆေးထိုးတာ၊ သားဆက်ခြားတာ စတဲ့နည်းတွေနဲ့ ကာကွယ်သင့်တယ်လို့ ဆန္ဒပြရာမှာ ပါဝင်တဲ့ သာကေတမြို့နယ်က မလဲက ပြောပါတယ်။

"လုပ်ဆောင်လို့ရပါတယ် အများကြီးပါ၊ ဒီခွေးတွေကို ထပ်မပွားအောင်လို့ပေါ့နော်၊ ခွေးမတွေဆိုလို့ရှိရင် သားဆက်ခြားတာလေ၊ အဲလိုမျိုး တားဆေးတွေဘာတွေ ထိုးလို့ရမယ်၊ နောက်ပြီးတော့ ခွေးတွေကို လည်း ခွေးရူးကာကွယ်ဆေးထိုးမယ်ဆိုရင် အဆင်ပြေမယ်"