မောင်တောဒေသ တည်ငြိမ်အေးချမ်းရေး ဝိုင်းဝန်းဆောင်ရွက်ဖို့ တိုက်တွန်း

မောင်တောဒေသမှာ လုံခြုံရေးကို တိုးမြှင့်ဆောင်ရွက်ထားပြီးဖြစ်တာကြောင့် ဒေသခံ ရခိုင်တိုင်းရင်းသားတွေ အနေနဲ့ စိုးရိမ်စိတ် မလွန်ကဲဖို့ ပြည်ထောင်စု ဝန်ကြီးက ပြောခဲ့ပါတယ်။

မောင်တောမြို့နယ်အတွင်းမှာ ဖြစ်ပွားခဲ့တဲ့ အကြမ်းဖက်မှုတွေအပေါ် အစိုးရက တည်ငြိမ်မှုရအောင် ကြိုးစားနေ ဆဲမှာပဲ ဖွံ့ဖြိုးတိုးတက်ရေးကိုပါ တပြိုင်တည်း လုပ်ဆောင်သွားမှာဖြစ်တယ်လို့လည်း ပြောပါတယ်။

လူမှုဝန်ထမ်းကယ်ဆယ်ရေးနဲ့ ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေး ဟာ မနေ့က စစ်တွေမြို့ကိုရောက်ရှိလာ ခဲ့တာဖြစ်ပြီး ဒေသခံတွေရဲ့ စားဝတ်နေရေးအတွက် အကူအညီပေး ဖို့ ငွေကျပ် သိန်း ၇၀၀ ကို ရခိုင်ပြည်နယ်အစိုးရကနေတစ်ဆင့် ပေးအပ်ခဲ့ပါတယ်။

ဒါ့အပြင် ဒီကနေ့မှာ မောင်တောမြို့နယ် ပန်းတောပြင်၊ ဘဂုံးနား၊ ဂေါ်ဒူသာရ၊ ဥဒေါင်း မွတ်ဆလင် ကျေး ရွာတွေနဲ့ အောင်ဇေယျ၊ အောင်သာယာ၊ အောင်မင်္ဂလာ စတဲ့ ရခိုင်တိုင်းရင်းသားကျေးရွာတွေမှာ ဆန်၊ ပဲ၊ ဆား စတာတွေကို ထောက်ပံ့ပေးအပ်ခဲ့ပါတယ်။