နေပြည်တော် စီးပွားရေး ဆွေးနွေးပွဲ ကို ပညာရှင်တွေ အားထားနေကြ
2011.08.17
တိုင်းပြည်ဘဏ္ဍာငွေ အလုံးအရင်း သုံးစွဲကာ တည်ဆောက်ထားသော နေပြည်တော် မြို့သစ်မှ ဘုရင့်နောင်ရိပ်သာ အဆောက်အအုံကို တွေ့ရပုံ။ (Photo: AFP)
AFP
နိုင်ငံတော်၏ စီးပွားရေး ဖွံ့ဖြိုးတိုးတက်မှု အတွက် ပြုပြင်ပြောင်းလဲမှုဆိုင်ရာ အမျိုးသား အဆင့် အလုပ်ရုံ ဆွေးနွေးပွဲ ခေါင်းစဉ်နဲ့ ကျင်းပမယ့် အဲဒီ ဆွေးနွေးပွဲကို နိုင်ငံရေးပါတီ တခု အတွက် ကိုယ်စားလှယ် (၃) ဦးကျစီ တက်ရောက်ဖို့ ပြည်ထောင်စု ရွေးကောက်ပွဲ ကော်မရှင်က ဖိတ်ကြားထားကြောင်း အမျိုးသား ဒီမိုကရေစီ အင်အားစု ဥက္ကဌ ဒေါက်တာ သန်းငြိမ်းက ပြောပါတယ်။
"ဖိတ်စာ ရောက်နေပြီလို့တော့ ပြောတယ်။ တိုင်းကော်မရှင်လေ။ လှမ်းအကြောင်းကြား ထားတာပါ။ ပါတီ ခေါင်းဆောင်တွေ၊ လွှတ်တော် ကိုယ်စားလှယ်တွေ၊ လွှတ်တော် သွားတက်ရင်းနဲ့ ရောက်နေမှာဆိုတော့ သူတို့ကိုဘဲ ကျနော်တို့ တာဝန်ပေးပြီး တက်ခိုင်းမှာပါ။"
ဒီဆွေးနွေးပွဲကို မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည် ကိုလည်း ဖိတ်ကြားထားကြောင်း၊ စီးပွားရေး၊ လူမှုရေး၊ နိုင်ငံ အသီးသီးက လူပုဂ္ဂိုလ်ပေါင်း ၄၀၀ ကျော်လောက် တက်ရောက်မှာ ဖြစ်ကြောင်း သမ္မတရုံးနဲ့ နီးစပ်သူတွေက ပြောပါတယ်။
ဒါပေမယ့် ဒေါ်အောင်ဆန်း စုကြည် တက်ရောက်မယ်၊ မရောက်ဘူးဆိုတာ အတည် မပြုနိုင်သေးပါဘူး။
ဒီဆွေးနွေးပွဲဟာ မြန်မာနိုင်ငံရဲ့ အနာဂတ် စီးပွားရေး အတွက် စီမံကိန်းတွေ ချမှတ်ရေး အတွက် အရေးကြီးနိုင်ကြောင်း ရခိုင် တိုင်းရင်းသားများ တိုးတက်ရေး ပါတီ ဥက္ကဌ အထက် လွှတ်တော် အမတ် ဒေါက်တာ အေးမောင်က ပြောပါတယ်။
စီးပွါးရေး လုပ်ငန်းရှင်များ၊ ပညာရှင်များကို ဖိတ်ကြားထားကြောင်း၊ ပြည်နယ်နဲ့တိုင်းက စီးပွါးရေးဝန်ကြီးများကို လည်း ဖိတ်ကြားထားပြီး၊ နိုင်ငံရေးပါတီများက (၃) ဦးစီ ပါဝင်မည့်အကြောင်း ကြားရကြောင်း၊ နိုင်ငံစီးပွါးဖွံ့ဖြိုးမှုအတွက် ပညာရှင်များက စာတမ်းတွေကို ဖတ်ကြားပြီး မိမိတို့က လူထု အမြင်၊ နိုင်ငံရေး ပါတီ အမြင်တွေနဲ့ မြန်လှန် သုံးသပ်ပေးကြမှာ ဖြစ်ကြောင်း၊ အကျိုးရှိနိုင်မယ်လို့ ယူဆရကြောင်း၊ ဒေါက်တာ အေးမောင်က ပြောပါတယ်။
ဒီဆွေးနွေးပွဲမှာ စီးပွားရေး ပညာရှင် ဒေါက်တာဦးမြင့် ကလည်း မြန်မာ နိုင်ငံ ဖွံ့ဖြိုးရေး အတွက် အရေးကြီးတဲ့ အကြံပြု စာတမ်း တစ်စောင် တင်သွင်းမယ်လို့ သိရပါတယ်။
ဖတ်ရှုသူအများဆုံး သတင်းများ။
RFA
ဖတ်ရှုသူအများဆုံး သတင်းများ။
သတင်းများ
