အရှင်ဂန္ဘီရ ဆေးကုသခွင့် အငြင်းခံရ

နိုင်ငံရေးအရ နာမည်ကျော်ကြားသူ ဖြစ်တဲ့အတွက် တခြားအရှုပ်အရှင်းတွေ ဖြစ်မှာစိုးတာကြောင့် ရပ်ဆိုင်းလိုက်ကြောင်း ဆရာဝန်ကြီးက ရှင်းပြခဲ့တယ်လို့ ဦးဂန္ဘီရရဲ့မိခင် ဒေါ်ရေးက အခုလို ပြောပြပါတယ်။

" မနေ့က ဆရာဝန်ကြီးနဲ့တွေ့တယ်။ တွေ့တော့ ဦးဂန္ဘီရတို့ မင်းကိုနိုင်တို့ စတဲ့ နာမည်ကြီးတွေတဲ့ ။ အဲတာ သူကဝန်ထမ်းမို့လို့ မန္တလေးတို့ ရန်ကုန်တို့မှာ သွားကုပါတဲ့။ အဲဒီလို ငြင်းလွှတ်လိုက်တယ်။ ရှောင်တာနေမှာပေါ့။ ဆရာဝန်ကြီးပဲ။
အပြစ်မပြောချင်ပါဘူး"

ဦးဂန္ဘီရဟာ ဖြစ်ပွားနေတဲ့ စိတ်ရောဂါအတွက် ဆရာဝန်ကြီး ဦးမြင့်ဆွေနဲ့ ကုသလျက်ရှိရာမှာ ပထမအကြိမ် ပြသပြီးနောက် ၇ ရက်စာ ဆေးပေးခဲ့ပြီး မနေ့က နောက်တစ်ပတ်စာ ဆေးသွားယူစဉ် ဆရာဝန်ကြီးက အခုလို ပြောကြားခဲ့တာ ဖြစ်ပါတယ်။

ရန်ကုန်၊ မန္တလေး အစရှိတဲ့မြို့ကြီးတွေကိုသာ သွားရောက်ကုသဖို့ ပြောလိုက်တယ်လို့လည်း ဒေါ်ရေးက ပြောပါတယ်။

ဒီကိစ္စနဲ့ ပတ်သက်လို့ စုံစမ်းမေးမြန်းနိုင်ဖို့ ဆရာဝန်ကြီး ဒေါက်တောမြင့်ဆွေရဲ့ လက်ကိုင်ဖုန်းကို ဆက်ကြည့်တဲ့အခါ လာရောက်ဖုန်းကိုင်သူက ဆရာဝန်ကြီး မရှိကြောင်းသာ အကြောင်းပြန်ကြားခဲ့ပါတယ်။

အရှင်ဂန္ဘီရဟာ အကျဉ်းထောင်က ပြန်လည် လွတ်မြောက်လာပြီးနောက် ကျန်းမာရေး အခြေအနေအရ ပြီးခဲ့တဲ့ နှစ်ဆန်း ၁ ရက်နေ့က လူဝတ်လဲခဲ့ရပါတယ်။