အစိုးရဘတ်ဂျက် အတည်ပြု

ဝန်ကြီးဌာနတစ်ခုစီအတွက် စီစစ်ရေးအဖွဲ့ွတွေ ဖွဲ့စည်းပြီး ဘတ်ဂျက်လျှော့ချမယ့်ကိစ္စကို သက်ဆိုင်ရာဝန်ကြီးဌာန တာဝန်ရှိသူတွေနဲ့ ကြိုတင်ဆွေးနွေးခဲ့ပြီးဖြစ်တယ်လို့ ပြည်ထောင်စုလွှတ်တော်က ဖွဲ့စည်းထားတဲ့ ပြည်သူ့ငွေ စာရင်းပူးပေါင်းကော်မတီ ဒုတိယဥက္ကဌ ဦးအောင်မင်းက ပြောပါတယ်။

"အသုံးစရိတ်တင်လာတာ စုစုပေါင်း ဘီလီယံ ၂၀၇၃၆ ရှိပြီး အဲ့ဒီထဲက ကျွန်တော်တို့က ဘီလီယံ ၄၇၀ ဝန်းကျင်လောက် လျှော့ချလိုက်တာ။ ဝန်ကြီးဌာနတစ်ခုစီကို စိစစ်ဖို့အတွက် အမျိုးသားလွှတ်တော် နဲ့ ပြည်သူ့လွှတ်တော် ကိုယ်စားလှယ်တွေ ပါဝင်တဲ့ စိစစ်ရေးအဖွဲ့ ၁၇ ဖွဲ့စည်းပြီး စိစစ်ခဲ့တာဖြစ်တယ်"

လျှော့ချခံရတဲ့ဝန်ကြီးဌာနတွေက လယ်ယာစိုက်ပျိုးရေးနဲ့ ဆည်မြောင်း၊ စက်မှု၊ ပြန်ကြားရေး၊ လူမှုဝန်ထမ်း ကယ်ဆယ်ရေး နဲ့ ပြန်လည်နေရာချထားရေး စတဲ့ ဝန်ကြီးဌာနတွေ ပါဝင်ပါတယ်။

နိုင်ငံတော်အတိုင်ပင်ခံရုံး၊ ပညာရေး၊ ကျန်းမာရေး၊ ကာကွယ်ရေး စတဲ့ ဝန်ကြီးဌာနတွေကတော့ ဘဏ္ဍာငွေလျှော့ ချဖြတ်တောက်မခံရပါဘူး။

အရင်အစိုးရလက်ထက်က ဝန်ကြီးဌာန ၃၆ ခုအတွက် ရေးဆွဲထားတဲ့ ဘတ်ဂျက်တွေကို အစိုးရသစ်လက်ထက်မှာ ဝန်ကြီးဌာန ၂၁ ခုနဲ့ ပြင်ဆင်ရေးဆွဲတာဖြစ်တယ်လို့လည်း ဦးအောင်မင်းက ပြောပါတယ်။

ပြည်ထောင်စုလွှတ်တော်က အခုလို ဘတ်ဂျက်ဖြတ်တောက်လိုက်ပေမယ့် ပြည်ထောင်စုအစိုးရရဲ့ လိုငွေဟာ ကျပ်ဘီလီယံ ၃၂၀၀ ကျော်ကျန်ရှိနေပါတယ်။