မောင်တော နောက်ဆက်တွဲ သတင်း အစိုးရ ထုတ်ပြန်ချက်

နယ်မြေရှင်းလင်းရေးမှာ ကျဆုံးသွားတဲ့ တပ်မတော်သား ၇ ဦး၊ ဒဏ်ရာရသူ ၅ ဦးနဲ့ ရဲတပ်ဖွဲ့က ကျဆုံးသူ ၁ဝ ဦး၊ ဒဏ်ရာရသူ ၇ ဦးရှိကြောင်းလည်း သတင်းထုတ်ပြန်ထားပါတယ်။

တဘက်ဘင်္ဂလားဒေ့ရ်ှနိုင်ငံကို နတ်မြစ်ကိုဖြတ်ပြီး ဒေသခံမွတ်စလင် ကျေးရွာသား ၂၀၀ လောက် ထွက်ပြေးတယ် ဆိုတဲ့ သတင်းနဲ့ပတ်သက်ပြီး ဘင်္ဂလားဒေ့ရ်ှနယ်ခြားစောင့်တပ်က အရာရှိ ၂ ဦးကို မေးမြန်းရာမှာ အဲဒီလို ဖြစ်ခဲ့တာ မရှိကြောင်း ပြောတယ်လို့ ထုတ်ပြန်ပါတယ်။

ဒါ့အပြင် မောင်တောမြို့နယ် မြင်းလွတ်ကျေးရွာမှာ နေထိုင်ကြတဲ့ ကျောင်းဆရာ ဆရာမတွေရဲ့ အဆောင် မီးရှို့ခံရတဲ့အကြောင်းနဲ့ တောင်ပြိုလက်ဝဲကျေးရွာမှာ လက်နက်တွေရှိရင် နယ်ခြားစောင့်ရဲစခန်းမှာ လာရောက် အပ်နှံကြဖို့ နယ်ခြားစောင့်ရဲတပ်ဖွဲ့က ကြေညာထားပါတယ်။

မောင်တောမြို့နယ် မြောက်ပိုင်းမှာ မငြိမ်သက်မှုတွေကြောင့် ဘူးသီးတောင်မြို့ပေါ်ကို ဒီကနေ့ ရောက်ရှိလာတဲ့ ရခိုင်တိုင်းရင်းသား ဒေသခံ ၈၀ လောက်အထိ ရှိနေကြောင်း ဘူးသီးတောင်မြို့ အရေးပေါ်ကူညီထောက်ပံ့ရေး ဦးဆောင်ကော်မတီက ပြောပါတယ်။

တိမ်းရှောင်လာသူတွေဟာ မငြိမ်မသက်ဖြစ်နေတဲ့ ကျေးရွာတွေနားက ဒေသခံ ရခိုင်တိုင်းရင်းသားတွေဖြစ်ပြီး အခြေအနေ မတည်ငြိမ်တာကြောင့် အလုပ်အကိုင်ခက်ခဲကာ စားဝတ်နေရေး ကျပ်တည်းလာတဲ့အတွက် မြို့ပေါ်ကို ရှောင်တိမ်းလာတာဖြစ်တယ်လို့ သိရပါတယ်။