ဇေယျာသီရိမဲဆန္ဒနယ်မှာ ကြံ့ခိုင်ရေး ပါတီ ကိုယ်စားလှယ်လောင်း ဦးလှဌေးဝင်း မဲဆွယ်

နေပြည်တော် ဇေယျာသီရိမြို့နယ် မဲဆန္ဒနယ်မြေကနေ ပြည်ထောင်စုကြံ့ခိုင်ရေးနဲ့ဖွံ့ဖြိုးရေးပါတီက ပြည်သူ့ လွှတ်တော် ကိုယ်စားလှယ်လောင်း ဦးလှဌေးဝင်းဟာ သူရဲ့မဲဆန္ဒနယ်မှာ တတိယမြောက်နေ့အဖြစ် မဲဆွယ် စည်းရုံးခဲ့ပါတယ်။

ပြီးခဲ့တဲ့ သြဂုတ်လ ၂၉ ရက်နေ့က ဇေယျာသီရိမြို့နယ်မှာ စစ်ဘက်ဆရာဝန်တွေနဲ့ ဆေးကုပေးခဲ့တဲ့ အတွက် အချိန်မတိုင်ခင် မဲဆွယ်တယ်ဆိုပြီး အတိုင်ခံရခဲ့ပါတယ်။ ဒီကိစ္စနဲ့ ပတ်သက်ပြီး ဦးလှဌေးဝင်း က သူ့အနေနဲ့ တရားဝင် မဲဆွယ်တာတွေကို ဒီလ ၁၁ရက်နေ့ကစခဲ့တာပါလို့ ဒီကနေ့မှာ ထည့်သွင်းပြောပါတယ်။

"ကျနော်တို့ အခုပေးတာတော့ ၈ ရက်နေ့ကနေစပြီးတော့ မဲဆွယ်နိုင်တယ်လို့ ပြောတယ်ပေါ့၊ ၁၁ ရက်နေ့မှာစပြီးတော့ အလုပ်လုပ်ပါတယ်ခင်ဗျ၊ ဒီကြားထဲမှာ ကျနော်တို့ ပြင်ဆင်တဲ့ဟာလေးတွေ ကတိပေးတဲ့အတွက် အကုန်လုံးပြင်ဆင်ပြီးမှ ၁၁ ရက်နေ့မှာစပြီး ကျနော်တို့ မဲဆွယ်တဲ့လုပ်ငန်းစပါတယ်"

ဗိုလ်ချုပ်ကြီးဟောင်း လှဌေးဝင်းဟာ ပြည်ခိုင်ဖြိုးပါတီကနေ လာမယ့်ရွေးကောက်ပွဲအတွက် ဝင်ရောက်ယှဉ်ပြိုင်ဖို့ တပ်မတော်က အနားယူခဲ့သူဖြစ်ပါတယ်။