ခေါင်လန်ဖူးမြို့နယ်မှာ တရားမဝင် သစ်ခိုးထုတ်နေတာတွေကို စစ်ဆေးမည်

တရုတ် - မြန်မာနယ်စပ်ဖြစ်တဲ့ ကချင်ပြည်နယ်၊ ခေါင်လန်ဖူးမြို့နယ်မှာ လုံခြုံရေး ကန့်သတ်ချက်ကြောင့် တရားမဝင် သစ်ခိုးထုတ်နေတာတွေကို ရှာဖွေ စစ်ဆေးနိုင်ခြင်းမရှိခဲ့တဲ့အတွက် တပ်မတော်အပါအဝင် အစိုးရဌာနဆိုင်ရာတွေ ညှိနှိုင်းပြီး စီမံချက်ချမှတ်စစ်ဆေးနိုင်ဖို့ ပြင်ဆင်နေတယ်လို့ သယံဇာတနဲ့ သဘာဝပတ်ဝန်းကျင် ထိန်းသိမ်းရေးဝန်ကြီး ဦးအုန်းဝင်း က ပြောပါတယ်။

ကချင်ပြည်နယ်၊ အမျိုးသားလွှတ်တော်ကိုယ်စားလှယ် ဦးဂျေယောဝူ က ကချင်ပြည်နယ် ခေါင်လန်ဖူးမြို့နယ်၊ အရှေ့ခြမ်း မြန်မာ- တရုတ်နယ်စပ်မှာ တရားမဝင်သစ်ခိုးထုတ်တာ၊ ယာဉ်ဝင်ယာဉ်ထွက်တာတွေနဲ့ ဘဏ္ဍာဝင်ငွေ ကောက်ခံရရှိမှုအခြေအနေကို လွှတ်တော်မှာ မေးမြန်းရာ ပြည်ထောင်စုဝန်ကြီး ဦးအုန်းဝင်းက တင်ပြခဲ့တာဖြစ်ပါတယ်။

"အဆိုပါနယ်မြေဟာ ဌာနေပြည်သူ့စစ်တပ်ဖွဲ့နဲ့ လက်နက်ကိုင်တပ်ဖွဲ့များ လှုပ်ရှားလျှက်ရှိပါတယ်၊ လုံခြုံရေးနဲ့ တရားဥပဒေစိုးမိုးရေး ကန့်သတ်ချက်ရှိတဲ့ နယ်မြေဖြစ်တဲ့အပြင် လမ်းပန်းဆက်သွယ်ရေး ဝေးလံခေါင်ဖျားတဲ့ နယ်စပ်ဒေသဖြစ်တဲ့အတွက်ကြောင့် ကချင်ပြည်နယ်အစိုးရအဖွဲ့၊ တပ်မတော်၊ မြန်မာနိုင်ငံရဲတပ်ဖွဲ့တို့မှ လုံခြုံရေးအပြည့်အဝယူပြီးသာမှ ရှာဖွေဖမ်းဆီးသွားနိုင်မှာဖြစ်ပါတယ်"

ကချင်ပြည်နယ်မှာ တပ်မတော်၊ ရဲတပ်ဖွဲ့တို့နဲ့ ပူးပေါင်းပြီး ၂၀၁၁ ခုနှစ်ကနေ ၂၀၁၆ ခုနှစ်အထိ တရားမဝင်သစ်တန်ချိန် နှစ်သောင်းခြောက်ထောင်ကျော်၊ တရားခံ နိုင်ငံသား ၈၆၀ကျော်၊ တရားခံ နိုင်ငံခြားသား ၁၇၀ ကျော်နဲ့ ယာဉ်ယန္တရား ၁၆၀၀ နီးပါးတို့ကို ဖမ်းဆီးရမိထားပါတယ်။