အမေရိကန် နည်းပညာနဲ့ မြန်မာအစိုးရ အင်တာနက် ဆင်ဆာ လုပ်နေ

ရန်ကုန်မြို့က အင်တာနက် ကဖေးဆိုင်တဆိုင်မှာ အင်တာသုံးစွဲသူများ ပြည့်နက်နေချိန် မြင်ကွင်း။

ကနေဒါနိုင်ငံ တိုရွန်တို တက္ကသိုလ် အင်တာနက် သုတေသနဌာန Citizen Lab က ထုတ်ပြန်လိုက်တဲ့ အစီရင်ခံစာသစ် အရ ဆီရီးယားနဲ့ မြန်မာ အစိုးရတွေဟာ အမေရိကန် ပြည်ထောင်စု ကာလီဖိုးနီးယား ပြည်နယ် အခြေစိုက် Blue Coat ကုမ္ပဏီရဲ့ နည်းပညာတွေ သုံးစွဲနေကြောင်း အထင်အရှား တွေ့ရှိရတယ်လို့ ဆိုပါတယ်။

Blue Coat ကုမ္ပဏီ ကတော့ မြန်မာ အစိုးရက Blue Coat ရဲ့နည်းပညာတွေ အသုံးပြုနေတယ် ဆိုတဲ့ တွေ့ရှိချက်ဟာ အခု ပထမဆုံးအကြိမ် ဖြစ်ကြောင်း၊ ကုမ္ပဏီ အနေနဲ့ မိမိတို့ နည်းပညာတွေကို အမေရိကန် အစိုးရက ပိတ်ဆို့ ဒဏ်ခတ်ထားတဲ့ နိုင်ငံတွေက အသုံးပြုတာ မလိုလားကြောင်း၊ ဒီအတွက် စတင် စုံစမ်း စစ်ဆေးနေပြီ ဖြစ်ကြောင်း ကုမ္ပဏီရဲ့ ပြောခွင့်ရပုဂ္ဂိုလ် Steve Schick က ပြောပါတယ်။

မြန်မာနဲ့ ဆီးရီးယား နိုင်ငံတွေဟာ လူ့အခွင့်အရေး ဆိုးဆိုးဝါးဝါး ချိုးဖောက်တဲ့ အတွက် အမေရိကန် အစိုးရရဲ့ စီးပွားရေး ပိတ်ဆို့ ဒဏ်ခတ် အရေးယူခံထားရတဲ့ နိုင်ငံတွေ ဖြစ်ပါတယ်။