ကချင်နယ်စပ်ဂိတ်နှစ်ခုကနေ အခွန် ၁၃ ဘီလီယံကျော်ရ

"ကျနော်တို့ မြန်မာကျပ်ငွေချည်းပဲ ပြောမယ်ဆိုလို့ရှိရင် အားလုံး ကျပ်သန်းပေါင်း ၁၃၉၆၇.၇၀ သန်းရရှိ ပြီးတော့မှ ဘီလျံနဲ့ ပြောမယ်ဆိုရင်တော့ ၁၃.၉၆၇ ဘီလျံကောက်ခံရရှိတဲ့အကြောင်း ကျနော်ဖြေကြား လိုပါတယ်။ ငြိမ်းချမ်းရေးကောင်းတယ်ဆိုရင်တော့ ကျနော်တို့က တားမြစ်ထိန်းချုပ်ကန့်သတ် မှုတွေ လျှော့ချမယ်ဆိုရင်တော့ ကုန်စည်စီးဆင်းမှုတွေက အများကြီးအားကောင်းလာမှာပေါ့"

အဲဒီ ၁၃ ဘီလီယံ ကျော်ဟာ နယ်စပ်ကုန်သွယ်ရေးရဲ့ ကုန်စည်စီးဆင်းမှုအပေါ်မှာ ဌာနတစ်ခုချင်းစီ အလိုက် ကောက်ခံရရှိတဲ့ အခွန်ငွေစုစုပေါင်း ပမာဏဖြစ်တယ် လို့ ပြောပါတယ်။

တရုတ်-မြန်မာနယ်စပ်က ကန်ပိုက်တီနဲ့ လွယ်ဂျယ် နယ်စပ်ကုန်သွယ်ရေးစခန်းနှစ်ခုမှာ နယ်စပ်ကုန်သွယ်ရေး၊ အကောက်ခွန်၊ ပြည်တွင်းအခွန်၊ လူဝင်မှုကြီးကြပ်ရေးနဲ့ ပြည်သူ့အင်အားဦးစီးဋ္ဌာန၊ မြန်မာ့စီးပွားရေးဘဏ် စတဲ့ ဋ္ဌာန ၅ ခုကိုဖွင့်လှစ်ပြီး အခွန်ကောက်ခံနေတာဖြစ်ပါတယ်။

ကချင်ပြည်နယ်မှာ တိုက်ပွဲတွေ ဖြစ်ပွားနေတဲ့အတွက် နယ်မြေမလုံခြုံမှုကို အကြောင်းပြုပြီး ရွှေ၊ကျောက်စိမ်း၊ သစ်မျိုးစုံစတဲ့ သဘာဝသယံဇာတတွေ အပါအဝင် တရားမဝင် ကုန်စည်မျိုးစုံကို တရုတ်ပြည်ဘက် နည်းအမျိုးမျိုး နဲ့ မှောင်ခိုသယ်ယူမှုတွေရှိနေပါတယ်။