နှစ်ရက်အတွင်း ကန့်ဘလူဒေသခံ နှစ်ထောင်ကျော် ထွက်ပြေးနေရ

စစ်ကိုင်းတိုင်း၊ ကန့်ဘလူမြို့နယ်မှာ စစ်ကောင်စီတပ်ရဲ့ နယ်မြေရှင်းလင်းရေးကြောင့် နှစ်ရက်အတွင်း ရွာငါးရွာက ဒေသခံ နှစ်ထောင်ကျော် ထွက်ပြေးတိမ်းရှောင်နေရတယ်လ ို့ ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့ က RFA ကို ပြောပါတယ်။

ကန့်ဘလူမြို့နယ် ချပ်သင်းရွာကနေထွက်လာတဲ့ စစ်ကြောင်းဟာ ဖေဖော်ဝါရီလ ၄ ရက် ကနေ ၅ ရက်နေ့အထိ နှစ်ရက်အတွင်းမှာ ပုဏ္ဏားကြီး၊ ဦးကင်းကြည်၊ ကံကြီး၊ ချပ်လယ်နဲ့ ပိတောက်ပင်ရွာတို့ကို ဆက်တိုက်ဝင်ရောက်လာတာကြောင့် ဒေသခံ နှစ်ထောင်ကျော် ထွက်ပြေးတိမ်းရှောင်နေရတာလို့ ကျွန်းလှ-ကန့်ဘလူ တက်ကြွလှုပ်ရှားသူများ အဖွဲ့ဝင် တစ်ဦးက ပြောပါတယ်။

"ပုဏ္ဏားကြီးရွာကို စစ်ကောင်စီတပ်က ရွာကိုမဝင်ခင် လက်နက်ကြီးနဲ့ပစ်တော့ ရွာက အမျိုးသားတစ်ဦး အစထိသွားတယ်။ အနီးနားကတော့ ထိုးလာရင် ထိုးလာသလို နီးရင်နီးတဲ့ရွာတွေက ပြေးကြရတာပေါ့။ အရေအတွက်ကတော့ ထောင်ချီလောက်မယ်။ ငါးရွာပေါင်းရင် နှစ်ထောင်ကျော်မယ်"

စစ်ကောင်စီတပ်က ဖေဖော်ဝါရီလ ၄ ရက်နေ့မှာ ပုဏ္ဏားကြီးရွာကို လက်နက်ကြီးနဲ့ ပစ်ခတ်ဝင်ရောက်စဉ် အသက် ၆၀ အရွယ် အမျိုးသားတစ်ဦး ဒဏ်ရာရခဲ့တာလို့ သူက ပြောပါတယ်။

အဲဒီနောက် တစ်ရက်တည်းမှာပဲ ချပ်လယ်ရွာကို ဝင်ရောက်စီးနင်းခဲ့ပြီး ဖေဖော်ဝါရီလ ၅ ရက် မနက်ပိုင်းမှာတော့ အိမ်ခြေ ၁၀၀ ကျော်ရှိတဲ့ ပိတောက်ပင်ရွာကို ဝင်ရောက်ခဲ့တာလို့ ဒေသခံတွေက ပြောပါတယ်။ ပိတောက်ပင်ရွာမှာ နေအိမ် ၁၂ လုံးကို စစ်တပ်က မီးရှို့သွားတယ်လို့ ကျွန်းလှ-ကန့်ဘလူ တက်ကြွလှုပ်ရှားသူများ အဖွဲ့ဝင်တွေနဲ့ ဒေသခံတွေက ပြောပါတယ်။

အဲဒီရွာတွေကို ဝင်ရောက်ခဲ့တဲ့ စစ်ကောင်စီတပ်ဟာ ခြေမြန်တပ်ရင်း ခမရ-၃၆၈ နဲ့ ပျုစောထီးတွေ ပါဝင်တဲ့ အင်အား ၁၂၀ ခန့်ရှိ စစ်ကြောင်းဖြစ်တယ်လို့ ဒေသခံတွေက ပြောပါတယ်။

ဒီအခြေအနေနဲ့ ပတ်သက်လို့ စစ်ကောင်စီဘက်က သတင်းမထုတ်ပြန်သေးသလို စစ်ကောင်စီရဲ့ စစ်ကိုင်းတိုင်း ပြောခွင့်ရ၊ လူမှုရေးဝန်ကြီး ဦးအေးလှိုင်ကို RFA က ဒီနေ့ ဖုန်းခေါ်ခဲ့ပေမယ့် လက်ခံဖြေဆိုခြင်း မရှိသေးပါဘူး။ အရင်အကြိမ်တွေတုန်းကတော့ ဒီကိစ္စတွေဟာ လုံခြုံရေးနဲ့ပတ်သက်နေတာကြေ ာင့် သူ့အနေနဲ့ ဖြေဆိုခွင့်မရှိဘူးလို့ ဦးအေးလှိုင်က ပြောခဲ့ဖူးပါတယ်။

ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့ ရဲ့ စာရင်းအရ ၂၀၂၃ ခုနှစ် ဇန်နဝါရီလတစ်လအတွင်း ကန့်ဘလူမြို့နယ်နဲ့ ကျွန်းလှမြို့နယ်မှာ စစ်ကောင်စီတပ်ရဲ့ စီးနင်းဝင်ရောက်မှုကြောင့် ရွာပေါင်း ရှစ်ရွာက နေအိမ် ၂၇၄ လုံး မီးရှို့ခံခဲ့ရပြီး ဒေသခံ ခုနစ်ဦး အသတ်ခံခဲ့ရပါတယ်။