ဗိုလ်ချုပ်ကြေးရုပ်ကိစ္စ သဘောတူညီမှုရရှိ
2019.02.12
ကယားပြည်နယ် လွိုင်ကော်မြို့မှာ ဗိုလ်ချုပ်ကြေးရုပ် ဖယ်ရှားပေးရေးကိစ္စနဲ့ ပတ်သက်ပြီး ကယားပြည်နယ်အစိုးရအဖွဲ့နဲ့ ကရင်နီလူငယ်ခေါင်းဆောင်တွေ ဖေဖေါ်ဝါရီလ ၁၂ ရက် မနေ့ညနေပိုင်းမှာ သဘောတူညီမှုရရှိခဲ့ပါတယ်။
အဲဒီသဘောတူညီချက်တွေထဲမှာ ဆန္ဒပြလူငယ်တွေအပေါ် တရားစွဲဆိုထားတွေ ရုပ်သိမ်းဖို့နဲ့ ဆန္ဒပြတာတွေ ရပ်ဆိုင်းဖို့၊ ကြေးရုပ် ဖြစ်မြောက်ရေးကော်မတီနဲ့ ကန့်ကွက်သူကော်မတီတို့ ညီမျှတဲ့ဦးရေနဲ့ တလအတွင်း သီးခြားညှိနှိုင်းကြဖို့၊ ညှိနှိုင်းနေစဉ်အတွင်း ထောက်ခံကန့်ကွက်ပွဲတွေမလုပ်ဖို့၊ ရရှိတဲ့သဘောတူညီချက်တွေ အစိုးရက အကောင်အထည်ဖေါ်ပေးဖို့၊ အစိုးရပျက်ကွက်ရင် ကြေးရုပ်ကို သက်ဆိုင်ရာရုံးကို ပြန်လည်ရွှေ့ပြောင်းဖို့ သဘောတူညီခဲ့ကြပါတယ်။
အဲဒီသဘောတူညီချက်ကို ဆန္ဒပြ ဦးဆောင်ကော်မတီဝင် ခူးဦးရယ်နဲ့ ကယားပြည်နယ်အစိုးရအဖွဲ့ အတွင်းရေးမှူး ဦးခင်မောင်ဝင်း တို့ လက်မှတ်ရေးထိုးခဲ့ကြပါတယ်။
မနေ့မနက်က ဆန္ဒပြ ဒေသခံတွေကို ရဲတပ်ဖွဲ့က ရာဘာကျည်တွေနဲ့ ပစ်ခတ်လူစုခွဲခဲ့တာကြောင့် ဆန္ဒပြသူ ၂၁ ယောက် ထိခိုက်ဒဏ်ရာရရှိခဲ့တယ်လို့ သပိတ်ကော်မတီက သတင်းထုတ်ပြန်ပါတယ်။
ဒီအတွင်း ကုလသမဂ္ဂ လူ့အခွင့်အရေးကိုယ်စားလှယ် ယန်ဟီးလီ က ဗိုလ်ချုပ်အောင်ဆန်း ကြေးရုပ် ပြဿနာနဲ့ ပတ်သက်ပြီး ရဲတပ်ဖွဲ့ရဲ့ တုံ့ပြန်ပုံအပေါ် အံ့သြတုန်လှုပ် ကန့်ကွက်ရှုတ်ချကြောင်း ပြောလိုက်ပါတယ်။
ဖတ်ရှုသူအများဆုံး သတင်းများ။
သတင်းများ
