UNFC မူနဲ့သာ KNU ဆွေးနွေးမည်
2011.10.01
၂ဝ၁၁ ခုနှစ် သြဂုတ်လ ၁၃ ရက်နေ့က KNU တပ်မဟာ (၅) နယ်မြေတွင် ကျင်းပသော (၆၁) နှစ်မြောက် ကရင့်အမျိုးသား အာဇာနည်နေ့ အခမ်းအနားတွင် တွေ့ရသည့် KNLA တပ်ဖွဲ့ဝင်များ။ (ဓာတ်ပုံ- ကရင်သတင်းဌာန)
ပြီးခဲ့တဲ့ စက်တင်ဘာလ ၂၈ ရက်နေ့က ကရင်ခရစ်ယာန် သင်းအုပ်ဆရာတွေနဲ့ ဗုဒ္ဓဘာသာ သံဃာတော်တွေ ပါဝင်တဲ့ စေ့စပ်ရေး အဖွဲ့တဖွဲ့ KNU ထံ လာရောက်ပြီး အစိုးရနဲ့ ငြိမ်းချမ်းရေးဆွေးနွေးဖို့ ကမ်းလှမ်းခဲ့ပါတယ်။
အဲဒီအဖွဲ့ကို KNU ထိပ်ပိုင်းခေါင်းဆောင်တွေက တွေ့ဆုံခဲ့ခြင်း မရှိဘဲ လူလွှတ် တွေ့ဆုံခဲ့တာလို့ KNU အဖွဲ့ တွဲဘက်အတွင်းရေးမှူး ဗိုလ်မှူးစောလှငွေက ပြောပါတယ်။
“ကျနော်တို့ ပြောပြလိုက်တာကတော့ ကျနော်တို့ သတ်မှတ်ထားတဲ့အတိုင်း UNFC နဲ့ အစုအဖွဲ့အလိုက်ပဲ ပြောမယ်၊ နောက်ပြီး ကျနော်တို့ ဗဟိုအစိုးရနဲ့ပဲ တွေ့မယ်၊ အဲဒီလောက်ပဲ ပြောပြလိုက်ပါတယ်။ သူတို့ဘက်ကတော့ ထုံးစံအတိုင်း ဒီ သမ္မတကြီးဦးသိန်းစိန် ထုတ်ပြန်ထားတဲ့ အတိုင်းပေါ့လေ၊ ဗဟိုနဲ့ တွေ့ချင်ရင် ပြည်နယ်အစိုးရနဲ့ ဦးဆုံးတွေ့၊ တွေ့ပြီးတော့ အရေးသုံးပါးရဲ့ အတွင်းမှာ ဘာညာပေါ့၊ အဲဒီအတိုင်း လာပြီး ရွတ်ပြတာပါပဲ”
KNU အဖွဲ့ အနေနဲ့ တိုင်းရင်းသား လက်နက်ကိုင်အဖွဲ့ ၁၂ ဖွဲ့ စုစည်းထားတဲ့ UNFC က ဆုံးဖြတ်ထားတဲ့ မူဘောင် အတွင်းကသာ ဆွေးနွေးဖို့ ပြောဆိုလိုက်တာ ဖြစ်ပါတယ်။ အခုလို လာရောက်တဲ့ စေ့စပ်ရေးအဖွဲ့ကို ဘယ်သူက စေလွှတ်လိုက်သလဲဆိုတာ ပြောဆိုခြင်းမရှိဘဲ ကရင်ပြည်နယ် ငြိမ်းချမ်းရေးအတွက် ဆောင်ရွက်နေတဲ့ အဖွဲ့အဖြစ်သာ သိရတယ်လို့ KNU က ပြောပါတယ်။
လတ်တလော ကရင်ပြည်နယ်အတွင်း နေရာအနှံ့မှာ အစိုးရတပ်တွေနဲ့ KNLA တပ်တွေ အပါအဝင် DKBA တပ်တွေ နေ့စဉ်လိုလို တိုက်ပွဲတွေ ဆက်တိုက် ဖြစ်ပွားနေတယ်လို့ ဗိုလ်မှူးစောလှငွေက ပြောပါတယ်။
ဖတ်ရှုသူအများဆုံး သတင်းများ။
သတင်းများ
