မတ္တရာက စစ်ကောင်စီတပ်စခန်းတစ်ခုကို မန္တလေး PDF သိမ်းယူ

မန္တလေးတိုင်း၊ မတ္တရာမြို့မြောက်ဘက်မှာရှိတဲ့ တောင်တံငါကျေးရွာမှာ တပ်စွဲထားတဲ့ စစ်ကောင်စီရဲ့ အထိုင်စခန်းတစ်ခုကို မေလ ၁၀ ရက်နေ့မနက်က သိမ်းယူနိုင်ခဲ့တယ်လို့ ပြည်သူ့ကာကွယ်ရေးတပ်မတော် (မန္တလေး) က သတင်းထုတ်ပြန်ပါတယ်။

ဒီစခန်းသိမ်းတိုက်ပွဲမှာ စစ်ကောင်စီဘက်က ဗိုလ်ကြီး တစ်ဦးအပါအဝင် ၁၂ ဦး သေဆုံးခဲ့ပြီး ထွက်ပြေးသွားသူတွေလည်းရှိသလို လက်နက်ခဲယမ်းတွေလည်း သိမ်းယူနိုင်ခဲ့တယ်လို့ ဆိုပါတယ်။ ပြည်သူ့ကာကွယ်ရေးတပ်မတော် (မန္တလေး)ဘက်ကလည်း တစ်ဦးသေဆုံးခဲ့တယ်လို့ ဖော်ပြထားပါတယ်။

ဒီစခန်းဟာ မတ္တရာမြို့ကနေ စဉ့်ကူးဘက်အထွက်မှာ ရှိပြီး မတ္တရာမြို့နဲ့ ရေနံ့သာကျေးရွာကြားမှာရှိတဲ့ ဒေသခံတွေဆီကနေ ငွေကြေးကောက်ခံနေတဲ့ စခန်းဖြစ်တယ်လို့လည်း ဆိုပါတယ်။

ဒီစခန်းသိမ်းခံရတာနဲ့ ပတ်သက်ပြီး စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကို RFA က ဖုန်းနဲ့ဆက်သွယ်ပေမဲ့ လက်ခံဖြေဆိုတာ မရှိပါဘူး။

ပြည်သူ့ကာကွယ်ရေးတပ်မတော် (မန္တလေး) က ဧပြီလ ၃၀ ရက်နေ့ကလည်း မန္တလေးတိုင်း၊ စဉ့်ကူးမြို့နယ်၊ ဝါးပိုးချပ်ကျေးရွာက စစ်ကောင်စီတပ်ခန်းကို တိုက်ခိုက်သိမ်းပိုက်ခဲ့ပြီး ဧပြီလ ၁၅ ရက်နေ့ကတော့ နောင်ချိုမြို့နယ် သရက်ကုန်းရွာ စစ်ကောင်စီ တပ်စခန်းကို သိမ်းပိုက်ခဲ့ပါတယ်။

နောင်ချိုမြို့နယ် သရက်ကုန်းရွာစစ်တပ်စခန်းကို ပြန်ရဖို့ စစ်ကောင်စီက လေကြောင်းနဲ့ မြေပြင်ကနေပါ ထိုးစစ်ဆင်တိုက်ခိုက်ခဲ့ပြီး တိုက်ပွဲအတွင်းမှာ လေကြောင်းကနေ အကြိမ်လေးဆယ်ကျော် တိုက်ခိုက်ခဲ့တယ်လို့ မန္တလေး PDF က မေလ ၈ ရက်နေ့မှာ ထုတ်ပြန်ထားပါတယ်။