လူကုန်ကူးမှုနဲ့ ပတ်သက်ပြီး မြန်မာ၂၉ ဦးကို မလေးရှားရဲဖမ်းဆီး

မလေးရှားနိုင်ငံ Klang Valley မြို့က တိုက်ခန်းလေးခုကို မလေးရှားရဲတွေက ဩဂုတ် ၂၂ ရက်နေ့က ဝင်ရောက်စီးနင်းခဲ့ရာမှာ မြန်မာနိုင်ငံသား အေးဂျင့် ငါးဦးနဲ့ မှောင်ခိုကူးခံရသူ မြန်မာ ၂၄ ဦး စုစုပေါင်း ၂၉ ဦးကို ဖမ်းဆီးမိခဲ့တယ်လို့ Bernama သတင်းက ဖော်ပြပါတယ်။

မှောင်ခိုကူးခံရသူတွေထဲမှာ အမျိုးသား ၂၂ ဦးနဲ့ အမျိုးသမီး နှစ်ဦး ပါဝင်ပြီး အသက် ၁၈ နှစ်ကနေ ၃၆ နှစ်ကြား ရှိပြီး သူတို့ဟာ ဒီတိုက်ခန်းတွေမှာ လွန်ခဲ့တဲ့ သီတင်းနှစ်ပတ်ထဲက ရောက်နေကြတာလို့ လည်း ဆိုပါတယ်။

သူတို့ဟာ အရှေ့ကမ်းကနေ ကုန်းတွင်းက ခိုးဝင်လာကြတာဖြစ်ပြီး တစ်ဦးကို မလေးရှား ငွေ RM နှစ်ထောင်နဲ့ သုံးထောင်ကြား ပွဲစားကို ပေးခဲ့ရတယ်လို့ ဆိုပါတယ်။ ပွဲစားငါးဦးကတော့ အသက် ၂၇ နှစ်ကနေ ၃၀ ကြားရှိသူတွေဖြစ်ကြပြီး လွန်ခဲ့တဲ့ သုံးလထဲက မြန်မာနိုင်ငံသားတွေကို မှောင်ခိုသွင်းလာခဲ့တာ တွေ့ရှိရတယ်လို့ဆိုပါတယ်။

ဒီပွဲစားအားလုံးကို ရွှေ့ပြောင်းလူမှောင်ခိုကူးမှု ပုဒ်မနဲ့ စုံစမ်းစစ်ဆေးနေပြီး မှောင်ခိုကူးခံရသူတွေကိုတော့ လူဝင်မှုကြီးကြပ်ရေး အက်ဥပဒေပုဒ်မနဲ့ စစ်ဆေးနေတယ်လို့ ဆိုပါတယ်။