နယ်ခြားစောင့်ရဲကွပ်ကဲမှှုဌာနချုပ် အပါအဝင် ရဲကင်းစခန်း ၃ ခု တိုက်ခိုက်ခံရ

တုတ်၊ ဓား၊ လက်နက်တွေကိုင်ဆောင်ထားတဲ့ အကြမ်းဖက်သမားတွေဟာ လူအင်အားအများအပြားနဲ့ ဝင်ရောက်စီးနင်းတိုက်ခိုက်ခဲ့တာဖြစ်ပြီး ဘယ်အဖွဲ့ဆိုတာကို အတည်မပြုနိုင်သေးဘူးလို့လည်း ဆိုပါတယ်။

သေဆုံးမှုနဲ့ လက်နက်ပါသွားတဲ့စာရင်းဟာ ကျီးကန်းပြင်အခြေစိုက် နယ်ခြားစောင့်ရဲကွပ်ကဲမှု ဌာနချုပ်နဲ့ ရဲကင်းစခန်းတိုက်ခိုက်ခံရတဲ့အခြေအနေတွေအရဖြစ်ပြီး ငခူရနဲ့ ကိုးတန်ကောက် ရဲကင်းစခန်းအခြေအနေကို ထုတ်ပြန်ပြောဆိုပေးနိုင်ခြင်းမရှိသေးဘူးလို့လည်း ပြောပါတယ်။

ရသေ့တောင်မြို့နယ် ကိုးတန်ကောက် နယ်ခြားစောင့်ရဲကင်းစခန်း တိုက်ခိုက်မှုမှာပါဝင်ခဲ့တဲ့ အကြမ်းဖက်သမား တစ်ဦးကို ဖမ်းဆီးရမိထားပြီး အကြမ်းဖက်သမားတစ်ဦးရဲ့အလောင်းကို တွေ့ရှိထားတယ်လို့ ဆိုပါတယ်။

ဖမ်းဆီးရမိထားသူဟာ ရခိုင်ပြည်နယ်မှာ နေထိုင်သူလား၊ တခြားနေရာကနေ လာတာလားဆိုတာကို စစ်ဆေးနေဆဲဖြစ်တယ်လို့လည်း ဝန်ကြီးဦးမင်းအောင်က ပြောပါတယ်။

လတ်တလော မောင်တောမြို့နယ်အတွင်း စစ်ဆေးရေးဂိတ်တွေနဲ့ လမ်းအချို့ကို ပိတ်ထားပါတယ်။

ရခိုင်ပြည်နယ် မောင်တောမြို့နယ်မှာ ဖြစ်ပွားခဲ့တဲ့ ပစ်ခတ်တိုက်ခိုက်မှုတွေနဲ့ပတ်သက်ပြီး ဘူးသီးတောင် နဲ့ မောင်တောမြို့နယ်တွေမှာ လူ ၅ ဦးထက်ပိုပြီး စုဝေးတာတွေ မလုပ်ဖို့ နဲ့ ည ၇ နာရီကနေ မနက် ၆ နာရီအထိ ပုဒ်မ ၁၄၄ ညမထွက်ရအမိန့်ကို တိုးမြှင့်ထုတ်ပြန်လိုက်ပါတယ်။

ဒါ့အပြင် မောင်တောမြို့နယ် မောရဝတီ၊ သရေကုန်ဘောင်၊ ရွှေရင်အေး၊ ခရေမြိုင် စတဲ့ လူနည်းစုရခိုင်တိုင်းရင်း သားကျေးရွာတွေက မိသားစုအတော်များများ တခြားကျေးရွာတွေကို ပြောင်းရွှေ့နေကြောင်း မောင်တောမြို့ခံ တစ်ဦးက ပြောပါတယ်။