မန္တလေးမှာ အရက်ဝိုင်းဖွဲ့သောက်သူ ၁၈၂ ဦးကို အရေးယူ

မန္တလေးမြို့က အထင်ကရနေရာတွေဖြစ်တဲ့ ကျုံးပတ်လည်နဲ့ မန္တလေးမြို့အဝင် တံခွန်တိုင်အဝိုင်းမှာ ညဘက် ဝိုင်းဖွဲ့အရက်သောက်နေသူတွေကို  အထူးစီမံချက်နဲ့ ပြီးခဲ့တဲ့ အောက်တိုဘာ ၇ ရက်နေ့ကနေ စပြီးအမှုဖွင့် အရေးယူခဲ့ရာမှာ လူဦးရေ ၁၈၂ ဦးကို ထောင်ဒဏ်နဲ့ ငွေဒဏ်တွေ အသီးသီး ချမှတ်ခဲ့တယ်လို့ မန္တလေးခရိုင် ရဲတပ်ဖွဲ့မှူး ဒုတိယရဲမှူးကြီး မျိုးအောင်က ပြောပါတယ်။

အများပြည်သူ အပန်းဖြေတဲ့နေရာတွေမှာ အများပြည်သူ စိတ်အနှောင့်အယှက် အဟန့်အတားဖြစ်အောင် ဆောင်ရွက်ရင် အရေးယူနိုင်တဲ့ ရဲအက်ဥပဒေနဲ့  အောက်တိုဘာလ ၇ ရက်နေ့ကနေ ၁၃ ရက်နေ့ထိ အရေးယူ ခဲ့ရာမှာ စုစုပေါင်း  ၂၆၀ မှု ရှိခဲ့တယ်လို့ ဒုရဲမှူးကြီး မျိုးအောင်က ပြောပါတယ်။

"အားလုံးစုစုပေါင်း နောက်ဆုံးအခြေအနေက ၇ ရက်ကနေ မနေ့ညထိ ၂၆၀ ပေါ့၊ လူကလည်း ၂၆၀ အမှုကလည်း ၂၆၀ ၊ ထောင် ၇ ရက်ကျတာလည်းရှိတယ်၊ ပထမဆုံး စွဲတင်တာတွေက ဒဏ်ငွေ ၅၀ ဒဏ်ရိုက်တာတွေလည်းရှိတယ်"

အမှုပေါင်း ၂၆၀ ထဲက ၁၁၃ ယောက်ကို ငွေဒဏ် ကျပ် ၅၀ စီချမှတ်ခဲ့ပြီး ၆၉ ယောက်ကို ထောင်ဒဏ် ၇ ရက်စီ ချမှတ်ခဲ့တယ်လို့ သိရပါတယ်။

မန္တလေးမြို့တော်လုံခြုံရေးနဲ့ တရားဥပဒေစိုးမိုးရေးအတွက် မှုခင်းတွေမဖြစ်အောင်  ကြိုတင်ကာကွယ်တဲ့အနေနဲ့ အရေးယူဆောင်ရွက်တာဖြစ်ပြီး မန္တလေးမြို့ရဲ့ အထင်ကရနေရာတွေမှာ ဝိုင်းဖွဲ့အရက်သောက်နေတာတွေ ပျောက်ကွယ်သွားတဲ့အထိ စီမံချက်နဲ့ အဆက်မပြတ် အရေးယူသွားမယ်လို့ ဒုတိယရဲမှူးကြီး မျိုးအောင်က ပြောပါတယ်။