ကာကွယ်ရေးဦးစီးချုပ် ရေဘေး ကူဖို့ စစ်တွေရောက်

ရခိုင်ပြည်နယ်မှာ ရေဘေးဒဏ်ကြုံခဲ့ရတဲ့ မြို့နယ်တွေကို စားသောက်ကုန်နဲ့ လူသုံးကုန်ပစ္စည်းတွေ လှူဒါန်းဖို့ အတွက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်ဟာ ဒီနေ့ စစ်တွေမြို့ကို ရောက်ရှိလာ ပါတယ်။

ရန်ကုန်မြို့ကနေ တပ်မတော်လေယာဉ်နဲ့ သယ်ယူလာတဲ့ ကယ်ဆယ်ရေးပစ္စည်းတွေကို ရေဘေးဒဏ်ကြုံခဲ့ ရတဲ့ ကျောက်တော်၊ မြောက်ဦး၊ မင်းပြားမြို့နယ်တွေကို စစ်တွေမြို့ကနေ ရဟတ်ယာဉ်တွေနဲ့ ဒီနေ့ ပို့ဆောင်ပေးနေပြီး မနက်ဖြန်သွားရောက်လှူဒါန်းမှာ ဖြစ်ပါတယ်။

ဗိုလ်ချုပ်မှူးကြီး မင်းအောင်လှိုင်ဟာ ဒီနေ့ မြောက်ဦးမြို့ အလိုတော်ပြည့်ကျောင်းမှာ ဒေသခံတွေ နဲ့ တွေ့ဆုံဖို့စီစဉ်ထားပေမယ့် တွေ့ဆုံပွဲကို ဖျက်သိမ်းလိုက်တယ်လို့လည်း ဒေသခံတွေက ပြောပါတယ်။

ရခိုင်ပြည်နယ် ကျောက်တော်၊ မြောက်ဦး၊ မင်းပြားမြို့နယ်တွေမှာ ပြီးခဲ့တဲ့ အပတ်က လူပေါင်း ၂ သောင်းလောက် ရေလွှမ်းမိုးမှု ဒဏ်ကြုံခဲ့ရတာဖြစ်ပါတယ်။