ကာကွယ်ရေးဦးစီးချုပ်နဲ့ ကချင်နှစ်ခြင်းအသင်းဥက္ကဋ္ဌ တွေ့ဆုံ

2020.12.01
ကာကွယ်ရေးဦးစီးချုပ်နဲ့ ကချင်နှစ်ခြင်းအသင်းဥက္ကဋ္ဌ တွေ့ဆုံ ဗိုလ်ချုပ်မှူးကြီး မင်းအောင်လှိုင်နဲ့ ကချင်နှစ်ခြင်းအသင်းတော် KBC ဥက္ကဋ္ဌ ‌ဒေါက်တာ ခလမ်ဆမ်ဆွန် ဦးဆောင်တဲ့အဖွဲ့ ၂၀၂၀ ဒီဇင်ဘာ ၁ ရက်နေ့က မြစ်ကြီးနားမှာတွေ့ဆုံစဉ်
KBC Photo
တပ်မတော်ကာကွယ်ရေး ဦးစီးချုပ်ဗိုလ်ချုပ်မှူးကြီး မင်းအောင်လှိုင်နဲ့ ကချင်နှစ်ခြင်းအသင်းတော် KBC ဥက္ကဋ္ဌ ‌ဒေါက်တာ ခလမ်ဆမ်ဆွန်ဦးဆောင်တဲ့အဖွဲ့နဲ့ ဒီကနေ့ ကချင်ပြည်နယ် မြစ်ကြီးနားမြို့မှာတွေ့ဆုံခဲ့ပြီး မြစ်ဆုံ စီမံကိန်းအပါအဝင် ကိုဗစ်ရောဂါကူးစက်မှု၊ ငြိမ်းချမ်းရေးနဲ့ ဒုက္ခသည် နေရပ်ပြန်လည်အခြေချရေးကိစ္စတွေကို ဆွေးနွေးခဲ့တယ်လို့ KBC ဥက္ကဋ္ဌက RFA ကို ပြောပါတယ်။
 
ပြည်သူတွေကန့်ကွက်မှုကြောင့် ဦးသိန်းစိန်အစိုးရ လက်ထက်ကတည်းက ရပ်ဆိုင်းထားရတဲ့ မြစ်ဆုံစီမံကိန်း ကိစ္စအကြောင်း ဆွေးနွေးရာမှာ မြစ်ဆုံမှာမဟုတ်ဘဲ မြစ်အထက်ပိုင်းမှာ စီမံကိန်းလုပ်မယ်ဆိုရင် ကန့်ကွက် မှုတွေ မရှိနိုင်ဘူးလို့လည်း ဆွေးနွေးခဲ့တယ်လို့ RFA နဲ့ သီးသန့်မေးမြန်းခန်းမှာ သိက္ခာတော်ရ ဆရာတော် ဒေါက်တာခလမ်ဆမ်ဆွန်က ပြောပါတယ်။
 
"မြစ်ဆုံစီမံကိန်းကိစ္စဆွေးနွေးခဲ့တာရှိပါတယ်၊ ကာကွယ်ရေးဦးစီးချုပ်ကလည်း ဧရာဝတီမြစ်အထက်ပိုင်း မှာ စီမံကိန်းတွေအများကြီးလုပ်နိုင်တယ်ဆိုတဲ့အကြောင်းကိုပြောပါတယ်။ ကျနော်တို့ဘက်ကလည်း မြစ်ဆုံကိုသာမထိဘဲ အထက်ဘက်ဖြစ်တဲ့ မေခ၊ မလိခဘက်မှ ာရေအားလျှပ်စစ် စီမံကိန်းလုပ်မယ်ဆိုရင် ပြည်သူတွေအနေနဲ့ ဘာမှပြောစရာမရှိဘူးဆိုတဲ့ သဘောတူညီမှုတစ်ခုတော့ ပြောခဲ့ပါတယ်၊ ကျနော် ကြည့်ရသလောက် ကာကွယ်ရေးဦးစီးချုပ်ကလည်း မြစ်ဆုံကို တခြားနေရာမှာလုပ်တဲ့ စီမံကိန်းမျိုးဆိုရင် ပိုပြီးမှ နှစ်သက်တယ်ဆိုတဲ့ သဘောလက္ခဏာ အရိပ်အရောင်တွေ့ရတယ်"လို့ ဆရာတော် ဒေါက်တာ ခလမ်ဆမ်ဆွန် က ပြောပါတယ်။
 
ကချင်စစ်ဘေးဒုက္ခသည်တွေ လုံလုံခြုံခြုံနေရပ်ပြန်နိုင်ဖို့ အဓိကအခက်အခဲဖြစ်နေတဲ့ မြေမြုပ်မိုင်းကိစ္စတွေ ရှင်းလင်းရေးကို တပ်မတော်ဘက်က လုပ်ဆောင်ပေးမယ်လို့ သဘောတူညီခဲ့သလို၊ ဒုက္ခသည်တွေ နေရပ် ပြန်ဖို့ ကချင်လူသားချင်းစာနာထောက်ထားမှုအဖွဲ့ KHCC က တပ်မတော်နဲ့ KIA ကြား ပါဝင်ကူညီပေးဖို့လည်း ကာကွယ်ရေးဦးစီးချုပ်ဘက်က မေတ္တာရပ်ခံခဲ့တယ်လို့သိရပါတယ်။
 
ဗိုလ်ချုပ်မှူးကြီး မင်းအောင်လှိုင် လာမယ့် ၂၀၂၁ ခုနှစ်ထဲမှာ ၆၅ နှစ်ပြည့်ပြီး ရာထူးကနေ အနားယူရဖို့ရှိ တာကြောင့် နိုင်ငံရေးမှာ ဘယ်လိုပြန်ပါဝင်လာမလဲလို့ စိတ်ဝင်စားနေကြတဲ့အချိန်မှာ ကချင်ပြည်နယ်က အရပ်ဘက်၊ စစ်ဘက်အဖွဲ့တွေနဲ့ တွေ့ဆုံခဲ့တာဖြစ်ပါတယ်။ ပြီးခဲ့တဲ့ နိုဝင်ဘာလထဲမှာလည်း လက်နက်ကိုင် အင်အားကြီးအဖွဲ့တစ်ဖွဲ့ဖြစ်တဲ့ ဝ တပ်ဖွဲ့ ခေါင်းဆောင်တချို့နဲ့ တွေ့ဆုံခဲ့တာရှိပါတယ်။
 
ဒီလိုကာကွယ်ရေးဦးစီးချုပ်ကနေ အနားယူရတော့မယ့်အချိန်မှာ လာရောက်တွေ့ဆုံတာနဲ့ ပတ်သက်ပြီး ‌ဒေါက်တာ ခလမ်ဆမ်ဆွန်ရဲ့ သဘောထားကို RFA ကမေးမြန်းရာမှာတော့ "ဒီနေ့ပြောသွားတဲ့အထဲမှာ တစ်ခုတော့စဉ်းစားစရာပါတယ်။ဗိုလ်ချုပ်မှူးကြီးက တပ်မတော်မှာ တာဝန်ထမ်းဆောင်ရာမှာ နှစ် ၄၀၊ အပေါင်း ၁၀ နှစ်က ကာကွယ်ရေးဦးစီးချုပ်တာဝန်ထမ်းဆောင်ခဲ့တော့ တိုင်းပြည်ရဲ့လိုအပ်ချက်တွေ၊ စီးပွားရေး၊ နိုင်ငံရေး၊ ဒီမိုကရေစီပီပြင်ရေးတွေကို အမြင်ရှိနေပုံပြောတယ်၊ သူ့ပြောပုံဆိုပုံအရတော့ သူလည်း စိတ်ထဲမှာ တထောင့်တစ်နေရာကနေပါဝင်ဖို့ စိတ်ကူးနေတယ်လို့ ကျနော်ခန့်မှန်းတယ်" လို့ RFA ကို ပြောပါတယ်။
 
ဒီနေ့တွေ့ဆုံမှုနဲ့ KBC ဥက္ကဋ္ဌရဲ့ပြောကြားချက်တွေနဲ့ပတ်သက်လို့ တပ်မတော်ဘက် တစ်စုံတစ်ရာ ထုတ်ပြန်ပြောကြားတာ မရှိသေးပါဘူး။ တပ်မတော်ကာကွယ်ရေးဦးစီးချုပ် ရာထူးကနေ အနားယူရေး မယူရေးဆိုတာဟာ ဥပဒေအတိုင်း လိုက်နာဆောင်ရွက်သွားမယ့်ကိစ္စဖြစ်တယ်လို့ နိုဝင်ဘာလ ၂၇ ရက်နေ့က သတင်းစာရှင်းလင်းပွဲမှာ တပ်မတော် သတင်းမှန် ပြန်ကြားရေးအဖွဲ့ ဥက္ကဋ္ဌ ဗိုလ်ချုပ်ဇော်မင်းထွန်းက ပြောကြားထားပါတယ်။
ဆက်နွယ်သောသတင်းများ
သတင်းများ
မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။