စစ်တပ်နယ်မြေ မင်္ဂလာဒုံမြို့နယ်ထဲက တရားရုံးထဲမှာ ဗုံးပေါက်ကွဲ

စစ်တပ်နယ်မြေဖြစ်တဲ့ ရန်ကုန်တိုင်း မင်္ဂလာဒုံမြို့နယ် အမှတ် (၃) လမ်းမအနီးက တရားရုံး တစ်ခုမှာ ဇူလိုင် ၅ ရက် ဒီနေ့မနက် ၈ နာရီခွဲခန့်က ဗုံးတစ်လုံးပေါက်ကွဲခဲ့တယ်လို့ အဲဒီအနီးအနားမှာ နေထိုင်သူ တချို့က ပြောပါတယ်။

"အသံတော့ကျယ်တယ်။ အထဲမှာ ဘယ်သူမှမရှိတဲ့အချိန် ပေါက်တာ။ မနက် ၈ နာရီခွဲနဲ့ ၉ နာရီ ဝန်းကျင် မှာပေါက်တာ။ မနက်ပိုင်းကတော့ အဲဒီနားမှာ အစစ်ဆေးတွေ များပြီးတော့ တရားရုံးထဲကိုလည်း မင်္ဂလာဒုံ မြို့နယ်ထဲမှာရှိတဲ့ စစ်တပ်တစ်ခုက ဝင်တပ်စွဲပြီး စစ်ဆေးတာမျိုးတွေ ရှိတယ်။"

တရားရုံး မဖွင့်သေးတဲ့အချိန်မှာ ဗုံးပေါက်ကွဲခဲ့တာကြောင့် လူတွေ ထိခိုက်ဒဏ်ရာရတာမျိုး မရှိခဲ့ဘူးလို့လည်း ပြောပါတယ်။

ပေါက်ကွဲပြီးတဲ့နောက်မှာတော့ စစ်ကောင်စီ တပ်ဖွဲ့ဝင်တွေ ရောက်လာပြီး လမ်းသွား လမ်းလာတွေကို စစ်ဆေးရေး တင်းတင်းကျပ်ကျပ် လုပ်ဆောင်ခဲ့တယ်လို့ ပြောပါတယ်။

ဒီရက်ပိုင်းအတွင်း ရန်ကုန်တိုင်းထဲက တာမွေ၊ သင်္ဃန်းကျွန်း၊ သာကေတစတဲ့ မြို့နယ်တွေမှာလည်း ဗုံးပေါက်ကွဲတာတွေ ဆက်တိုက်ဖြစ်ပွားခဲ့ပါတယ်။