သီဟသူရ ဦးတင်အောင်မြင့်ဦး သတင်း ပုံနှိပ်ထုတ်ဝေလျှင် အရေးယူခံရမည်

အခုတစ်ပတ် ထုတ်ဝေမယ့် Venus ဂျာနယ်မှာ ရေးသားထားတဲ့ ဒီသတင်းကို ပုံနှိပ်ထုတ်ဝေရင် အရေးယူခံရမယ်ဆိုပြီး စာပေစိစစ်ရေးဌာနက ဆက်သွယ်အကြောင်းကြားပြီး ပိတ်ပင် ဟန့်တားလိုက်တာ ဖြစ်တယ်လို့ Venus ဂျာနယ်ရဲ့ တာဝန်ခံအယ်ဒီတာ ကိုသာလွန်ဇောင်းထက်က RFA ကို ဒီကနေ့ အတည်ပြု ပြောကြား ပါတယ်။

" ဦးတင်အောင်မြင့်ဦး ကျန်းမာရေး မကောင်းဘူး။ ရာထူးက နုတ်ထွက်သွားတယ်ဆိုတဲ့ သတင်းတွေ ထွက်ပေါ်လာတယ်ဆိုပြီး ကျွန်တော်တို့က ကိုးကားပြီးရေးလိုက်တဲ့ အခါကျတော့ သူတို့က ကျွန်တော်တို့ကို ပထမတော့ ကျွန်တော်တို့လည်း တင်ထားတာပေါ့။ လွတ်မယ် ထင်ပြီးတော့၊ တင်ထားတဲ့ အချိန်မှာ နောက်ကျတော့ မနေ့ညက ကျွန်တော်တို့ နောက်ဆုံးဖောင်ကို နောက်ဆုံးဂျာနယ်ရိုက်တဲ့ အချိန်မှာ ဒီဗိုလ်မှူးတင့်ဆွေနဲ့ ဗိုလ်မှူး မျိုးမြင့်မောင်ကနေပြီး ဖုန်းဆက်တယ်။ ဒီသတင်းကို လုံးဝထည့်လို့ မရဘူး။ ဒီသတင်းကိုထည့်လို့ရှိရင် ဒါအရေးယူခံရမယ် ဆိုတာမျိုးထက်ကိုဗျာ၊ ဒီသတင်းထည့်တဲ့ ဂျာနယ်ကို ခေါ်ပြီးအရေးယူဖို့ ရှိတယ်"

ဦးတင်အောင်မြင့်ဦး နုတ်ထွက်တဲ့သတင်းကို ပြီးခဲ့တဲ့ တနင်္လာနေ့ထုတ် Myanmar Post ဂျာနယ်က စာပေစိစစ်ရေးကို မတင်ပြဘဲ ထုတ်ဝေခဲ့တဲ့အတွက် ဂျာနယ်တာဝန်ရှိသူတွေကို အရေးယူမယ်လို့ စာပေစိစစ်ရေး အာဏာပိုင်တွေက ခေါ်ယူ သတိပေးထားကြောင်းလည်း သိရပါတယ်။

ဦးတင်အောင်မြင့်ဦး နုတ်ထွက်ကြောင်း သတင်းတွေ ရေးသားခွင့် ပိတ်ပင်ထားတဲ့ အခြေအနေတွေနဲ့ ပတ်သက်လို့ စာပေစိစစ်ရေးဌာန တာဝန်ရှိသူတွေကို RFA က တယ်လီဖုန်းနဲ့ အကြိမ်ကြိမ် ဆက်သွယ်ခဲ့ပေမယ့် ဖြေကြားမှု မရှိပါဘူး။

ဒီအတောအတွင်းမှာပဲ ၂၀၁၅ ခုနှစ်နောက်ပိုင်းမှာ သမ္မတ ဦးသိန်းစိန် အနားယူလိမ့် မယ်ဆိုတဲ့ နိုင်ငံရေးအကြံပေး ပုဂ္ဂိုလ် ဦးကိုကိုလှိုင်ရဲ့ ပြောကြားချက်ကို ကိုးကားပြီး Venus ဂျာနယ်က ဒီကနေ့ ဖော်ပြခဲ့တဲ့အတွက် စာပေစိစစ်ရေးရုံးက ခံဝန်လက်မှတ်ထိုးဖို့ ဆင့်ခေါ်ခံထားရတယ်လို့ Venus ဂျာနယ် တာဝန်ခံအယ်ဒီတာ ကိုသာလွန်ဇောင်းထက်က ပြောပါတယ်။