နေအိမ်တစ်လုံး ဗုံးသီးနဲ့ပစ်ခတ်ခံရလို့ လေးဦးဒဏ်ရာရ

ရခိုင်ပြည်နယ် မြောက်ဦးမြို့နယ် အုတ်ဖိုကန်ကျေးရွာထဲကို ဒီနေ့ညနေ သုံးနာရီခွဲလောက်က ဗုံးသီးနဲ့ ပစ်ခတ်ခံရလို့ ကလေး သုံးဦးနဲ့ လူကြီး တစ်ဦး ထိခိုက်ဒဏ်ရာရခဲ့ကြပါတယ်။

မြောက်ဦးမြို့နယ် မြောက်ဘက် ရန်ကုန်-စစ်တွေ ကားလမ်းမကြီးဘေးက အုတ်ဖိုကန်ကျေးရွာထဲက နေအိမ်တစ်လုံးဟာ ဗုံးသီးတစ်လုံးနဲ့ လှမ်းပစ်ခံရပြီးနောက် ကလေး သုံးဦးနဲ့ လူကြီး တစ်ဦး ထိခိုက်ဒဏ်ရာရပြီး မြောက်ဦးဆေးရုံကို ပို့ဆောင်လိုက်ရပါတယ်။

ထိခိုက်ဒဏ်ရာရသွားသူတွေဟာ အသက် ၁ နှစ်ခွဲအရွယ် မခိုင်စုဌေး၊ အသက် ၁၂ နှစ်အရွယ် မောင်သန်းဇော်ဦး၊ အသက် ၁၃ နှစ်အရွယ် မောင်ညီညီလင်းနဲ့  အသက် ၅၀ အရွယ် ဦးအောင်သိန်းထွန်းတို့ ဖြစ်ပြီး အားလုံးဟာ မိသားစုဆွေမျိုးတွေဖြစ်ကြပါတယ်။

ဒဏ်ရာရသွားတဲ့ အသက် တစ်နှစ်ခွဲအရွယ် မခိုင်စုဌေးရဲ့ မိခင် ဒေါ်ဦးဝင်းကြည်က အဲဒီဗုံးသီးဟာ အိမ်ကို တည့်တည့်ကျရောက်လာခဲ့တာလို့ ပြောပါတယ်။

“ရွာထဲကိုကျတာနဲ့ ကျည်ကအိမ်ခေါင်မိုးကိုဖောက်ပြီးဆင်းလာတာ။ ကျွန်မက အိမ်ပေါ်မှာရှိတယ်။ ကလေးတွေက အောက်မှာဆော့နေကြတာ။ ကလေးကိုပဲအဓိကထိတာ။ ကျွန်မကိုတော့ မထိခဲ့ဘူး။ ကျွန်မသမီးလေးဆို ဒဏ်ရာနည်းနည်းပြင်းတယ်”

တပ်မတော်စစ်ကြောင်းတစ်ခုက ရွာနဲ့မလှမ်းမကမ်းကိုရောက်လာချိန်မှာ ဗုံးသီးနဲ့နှစ်ချက်ပစ်ခတ်ခဲ့တဲ့အနက် ဒုတိယအချက်က ရွာထဲကိုကျရောက်လာခဲ့တာလို့ ရွာသားတွေကဆိုပါတယ်။

လုံခြုံရေးအရ အမည်မဖော်လိုတဲ့ ကျေးရွာရပ်မိရပ်ဖတစ်ဦးက တပ်မတော်စစ်ကြောင်းက သူတို့လမ်းကြောင်း အတွက် ရှင်းလင်းပစ်ခတ်ရာမှာ ရွာထဲကိုပါ ပစ်ခတ်ခဲ့တာလို့ပြောပါတယ်။

“မြန်မာ့တပ်မတော်က စစ်ကြောင်းထွက်လာတဲ့အချိန်မှာ သူတို့ဆီမှာပါလာတဲ့ လက်နက်နဲ့လှမ်းပစ်လို့ ရွာထဲကျပြီး ၄ ဦးဒဏ်ရာရတာ။ ရွာနားကိုလာတဲ့ စစ်ကြောင်းကပစ်တာလို့ လူအများကြီးက ပြောနေကြတယ်။ အဲဒီစစ်ကြောင်းက သူတို့လမ်းကြောင်းရှေ့ကို ရှင်းလင်းပြီးသွားတဲ့အခါမှာ ပစ်လိုက်တာလို့ ယူဆတယ်”

ဒီနေ့ပစ်ခတ်မှုဟာ နှစ်ဘက်အပြန်အလှန်အလှန် ပစ်ခတ်တာမျိုးမဟုတ်ဘူးလို့ ရွာသားတွေကပြောပါတယ်။

ရက္ခိုင့်တပ်တော် AA ရဲ့ပြောခွင့်ရသူ ခိုင်သုခက အခုလိုပြောပါတယ်။

“အဲဒီနေရာမှာတော့ ကျွန်တော်တို့နဲ့တိုက်ပွဲဖြစ်တာ လုံးဝမရှိဘူးဗျ။ အဲဒီမှာ ကျွန်တော်တို့သိရသလောက်ကတော့ မြန်မာစစ်ကြောင်းတစ်ခုကနေပြီးတော့မှ သူတို့ ဒီ မသင်္ကာလို့ ရမ်းသမ်း ပစ်တာပေါ့ဗျာ။ သူတို့လမ်းရှင်းတဲ့အနေနဲ့ ရမ်းသမ်းပစ်တာလို့သိရတယ်။ ဆိုတော့ အဲဒီမှာ ရွာကအိမ်ကိုထိတာပေါ့နော်။ အဲလိုထိတဲ့အခါ ကလေးတွေ၊ နောက် လူကြီးတစ်ယောက်၊ ကလေးသုံးယောက် ဒဏ်ရာရတယ်လို့တော့သိရတယ်”

တပ်မတော်စစ်ကြောင်း ပစ်ခတ်တယ်ဆိုတဲ့ ပြောဆိုချက်တွေနဲ့ ပတ်သက်လို့ အနောက်ပိုင်းတိုင်း စစ်ဌာနချုပ် တိုင်းဦးစီး ဗိုလ်မှူးကြီးဝင်းဇော်ဦးက အခုလိုတုံ့ပြန်ပါတယ်။

“မြောက်ဦးမှာ တိုက်ပွဲဖြစ်တာမရှိဘူးခင်ဗျ။ ဒီကိစ္စက သူတို့ဟာသူတို့လျှောက်ပြောနေတာ။ အဲဒီဘက်မှာ ဒီလိုမျိုးမရှိဘူးဗျ။ ကျွန်တော်ကတော့ မကြားမိဘူး”

ဒဏ်ရာရသူတွေကတော့ အသက်အန္တရာယ်အတွက် စိုးရိမ်စရာမရှိကြောင်း မြို့နယ်ဆရာဝန်က ပြောဆိုတယ်လို့ မိသားစုဝင်တွေကပြောပါတယ်။

မြောက်ဦး၊ ကျောက်တော်၊ ဘူးသီးတောင်မြို့နယ်တွေမှာ ပြီးခဲ့တဲ့ ဇန်နဝါရီလ ၅ ရက်နေ့ကနေ ဒီနေ့အထိ အချိန် ငါးရက်အတွင်းမှာ လက်နက်တွေကြောင့် သေဆုံးသူ လေးဦးနဲ့ ထိခိုက်ဒဏ်ရာရသူက ၁၁ ဦးအထိ ရှိပါတယ်။