အကြမ်းဖက်မှုတွေ ချက်ချင်းရပ်ဖို့ အာဆီယံနိုင်ငံခြားရေးဝန်ကြီးတွေ တိုက်တွန်း

မြန်မာနယ်စပ်က အကြမ်းဖက်မှုတွေ ချက်ချင်းရပ်တန့်ပြီး တွေ့ဆုံဆွေးနွေးဖို့ အာဆီယံနိုင်ငံခြားရေးဝန်ကြီးတွေက ဧပြီ ၁၈ ရက်နေ့မှာ တိုက်တွန်းလိုက်ပါတယ်။

အာဆီယံနိုင်ငံခြားရေးဝန်ကြီးတွေရဲ့ ကြေညာချက်မှာ ထိုင်း-မြန်မာနယ်စပ် ကရင်ပြည်နယ် မြဝတီမြို့က တိုက်ပွဲတွေနဲ့ ရခိုင်ပြည်နယ်က တိုက်ပွဲတွေကြောင့် ပြည်သူတွေ အိုးအိမ်စွန့်ခွာထွက်ပြေးနေရတယ်လို့ ဖော်ပြထားပါတယ်။

ပဋိပက္ခတွေနဲ့ အကြမ်းဖက်မှုအားလုံး ရပ်တန့်ဖို့၊ နိုင်ငံတကာလူသားချင်းစာနာထောက်ထားမှုဆိုင်ရာ ဥပဒေတွေကို လိုက်နာဖို့နဲ့ အရပ်သားတွေရဲ့ လုံခြုံရေးအတွက် လိုအပ်တဲ့ အစီအမံအားလုံးကို လိုက်နာဖော်ဆောင်ဖို့ သက်ဆိုင်သူအားလုံးကို တိုက်တွန်းထားပါတယ်။

ကရင်ပြည်နယ် မြဝတီမြို့မှာရှိတဲ့ စစ်ကောင်စီရဲ့ သင်္ဃန်းညီနောင်ဗျူဟာကုန်းနဲ့ မြို့စောင့်တပ် ခလရ (၂၇၅) တို့ကို ကရင်အမျိုးသားလွတ်မြောက်ရေးတပ်မတော် (KNLA) နဲ့ မဟာမိတ်တပ်တွေ ပူးပေါင်းသိမ်းပိုက်ထားတာကြောင့် တိုက်ပွဲတွေပြင်းထန်နေပြီး ထိုင်းနိုင်ငံဘက်ခြမ်းကို မြဝတီမြို့က အရပ်သားတွေ ထွက်ပြေးတိမ်းရှောင်နေကြတာဖြစ်ပါတယ်။

အဲဒီနယ်စပ်က တိုက်ပွဲတွေ၊ မတည်ငြိမ်မှုတွေကြောင့် ထိုင်းစစ်တပ်ကလည်း နယ်စပ်လုံခြုံရေးကို တင်းကျပ်ထားပါတယ်။