ဧည့်လမ်းညွှန် အမျိုးသမီး ကိုရိုနာဗိုင်းရပ်စ် ကူးစက်ခံရ

ကိုရိုနာဗိုင်းရပ်စ် ကူးစက်ခံထားရတဲ့ လူနာ ရှစ်ဦးကို မြန်မာနိုင်ငံအတွင်းမှာ မနေ့ညကအထိ တွေ့ရှိထားပြီး ပထမဆုံး ပြည်တွင်းကူးစပ်တဲ့လူနာ တစ်ဦးကိုလည်း မနေ့က စတင်တွေ့ရှိခဲ့ပါတယ်။

ကျန်းမာရေးနဲ့ အားကစားဝန်ကြီးဌာနရဲ့ မနေ့ညကထုတ်ပြန်ချက်မှာ ကိုရိုနာဗိုင်းရပ်စ် တွေ့ရှိသူ သုံးဦး ထပ်တိုးခဲ့ပြီး ရောဂါကူးစက်ခံထားရသူ စုစုပေါင်း ရှစ်ဦးအထိ ရှိလာပါတယ်။

မနေ့က တွေ့ရှိသူတွေထဲက အသက် ၆၀ ဧည့်လမ်းညွှန် အမျိုးသမီးတစ်ဦးဟာ ပြည်ပနိုင်ငံတွေကို သွားရောက်ခဲ့တာမရှိဘဲ ပြည်တွင်းမှာပဲနေထိုင်ပြီး ရောဂါကူးစပ်ခံထားရကြောင်း တွေ့ရှိတဲ့ ပထမဆုံးလူနာ ဖြစ်လာပါတယ်။

အဲဒီဧည်လမ်းညွှန် အမျိုးသမီးနေထိုင်တဲ့ ရန်ကုန်တိုင်း ဗဟန်းမြို့နယ် ဆရာစံမြောက်အရှေ့ရပ်ကွက် ကျောက်ရေတွင်းလမ်းရှိ နေအိမ်ကို အသွားအလာပိတ်လိုက်ပြီလို့ ပြည့်သူလွှတ်တော် ကိုယ်စားလှယ် ဦးထွန်းမြင့်က ပြောပါတယ်။

“လောလောဆယ်တော့ သူအိမ်ကို Lock down လုပ်ထားပါတယ်၊ သူနဲ့ ထိတွေ့ဆက်ဆံခဲ့တဲ့လူတွေ၊ သူသွားခဲ့တဲ့နေရာတွေကို သက်ဆိုင်ရာက စောင့်ကြည်ဖို့လုပ်နေပါတယ်”

ရောဂါကူးစက်ခံထားရတဲ့ ဧည်လမ်းညွှန် အမျိုးသမီးဟာ ပြင်သစ်နိုင်ငံသား ခရီးသွားဧည့်သည်တွေနဲ့အတူ ဒီလထဲမှာ မန္တလေး၊ မုံရွာနဲ့ ပုဂံဒေသတွေကို ခရီးသွားခဲ့ပါတယ်။

ဒါကြောင့် အဲဒီဧည့်သည်တွေဆီက ကူးစက်ခံရတာ ဖြစ်နိုင်တယ်လို့လည်း ဦးထွန်းမြင့်က ပြောပါတယ်။

နိုင်ငံခြားကို ခရီးမသွားဘဲ ပြည်တွင်းမှာကူးစက်ခံရတဲ့ ပထမဆုံးလူနာ တွေ့ရှိတာကြောင့် ကိုရိုနာအန္တရာယ်ဟာ စိုးရိမ်စရာဖြစ်လာပြီလို့ ဒေါက်တာ ဥက္ကာကြည်ဝင်းက ပြောပါတယ်။

“တာဝန်ရှိသူတွေ ပြောတာတော့ ပြည်တွင်းကူးစက်မှု စတေ့ွပြီ၊ စတွေ့ပြီဆိုတော့ ပိုပြီးသတိထားရမယ့် အခြေအနေပေါ့လေ၊ တဖက်က စဉ်းစားကြည်တော့လည်း စလို့တွေ့တာလေ၊ မစစ်ဘဲနဲ့ အခြားပျံ့နှံ့နေ တာလည်း ရှိနိုင်တာပဲ၊ ဒီထက်ပိုပြီး ကျယ်ကျယ်ပြန့်ပြန့် စစ်နိုင်ရင်တော့ positive ဖြစ်တဲ့လူနာ ဒီထက် ပိုများများ တွေ့နိုင်တယ်၊ positive ဖြစ်တဲ့လူနာ စတွေ့ပြီဆိုကတည်းက စိုးရိမ်ရတဲ့ အခြေအနေကစပြီ၊ အားလုံးရဲ့ သတိထားမှု၊ သတိပြုမှုက ဒီထက်မလျော့သွားစေချင်ဘူး”

လက်ရှိမှာ အမျိုးသားကျန်းမာရေး ဓာတ်ခွဲခန်းကပဲ ကိုရိုနာဗိုင်းရပ်စ်ပိုး ရှိ၊ မရှိ စစ်ဆေးနိုင်တာကြောင့် အနည်းငယ်ပဲစစ်ဆေးနိုင်ပြီး ဒီထက်ပိုစစ်နိုင်မယ်ဆိုရင် ရောဂါပိုးတွေ့တဲ့ အရေအတွက်လည်း ပိုများနိုင်တယ်လို့ ဒေါက်တာ ဥက္ကာကြည်ဝင်းက ဆိုပါတယ်။

ပြည်တွင်းမှာ ရောဂါပိုး ကူးစက်ခံရသူ တွေ့ရှိတဲ့အပေါ် ကျန်းမာရေးနဲ့ အားကစားဝန်ကြီးဌာန ပြောရေးဆိုခွင့်ရှိသူ ဒေါက်တာ ခင်ခင်ကြီးက ပြောပါတယ်။

“အဓိက စိုးရိမ်တာကို လက်ခံပါတယ်၊ ဘယ်သူမဆို ဒီရောဂါက အသစ်ဆိုတော့ ဘယ်သူမှ ကိုယ်ခံအား မရှိသေးဘူး၊ တခြားကမ္ဘာ့နိုင်ငံတွေမှာ ကူးစက်မှုနှုန်းများနေတော့ စိုးရိမ်တာ လက်ခံပါတယ်၊ သို့သော် စိုးရိမ်နေရုံနဲ့ မပြီးဘဲနဲ့ လုပ်သင့်လုပ်ထိုက်တာကို လုပ်မှသာ ရောဂါကို ကာကွယ်နိုင်မှာဖြစ်ပါတယ်”

ဥရောပနိုင်ငံတွေက ခရီးသွားဧည်သည်တွေဟာ ဒီလပိုင်းအတွင်း ဝင်ရောက်မှုနည်းသွားသလို တချို့ခရီးသွား ကုမ္ပဏီတွေကလည်း ခရီးစဉ်တွေကို ရပ်တန့်လိုက်တာတွေရှိပါတယ်။

လက်ရှိအချိန်မှာလည်း မြန်မာအစိုးရ ဥရောပနိုင်ငံ တချို့ကခရီးသွားတွေကို ကန့်သတ်လိုက်ပါတယ်။

ဒါပေမဲ့ မြန်မာအစိုးရက ကန့်သတ်မှုတွေ မလုပ်ခင်အတွင်း ဝင်ရောက်နေတဲ့ ဧည်သည်တချို့ရှိနေပြီး ဧည်လမ်းညွှန်မပါဘဲ သွားလာနေတာတွေရှိတယ်လို့ ခရီးသွားဧည်လမ်းညွှန်တွေက ဆိုပါတယ်။

ဥရောပနိုင်ငံသား ခရီးသွားတချို့ဟာ ဒီလကုန်အထိ ပြည်တွင်းမှာရှိနေနိုင်ပြီး ဧည်လမ်းညွှန်မပါဘဲ သွားလာနေတာကြောင့် သူတို့ဆီကနေ ကူးစက်မှာလည်း စိုးရိမ်တယ်လို့ စပိန်ဧည့်လမ်းညွှန် တစ်ဦးဖြစ်တဲ့ မချိုတာက ပြောပါတယ်။

“နောက်ဆုံး ဒီလကုန်အထိ စာရင်းပေးထားရတယ်ဆိုတော့ လကုန်တော့ ပြန်ကြရမှာပဲလေ၊ တချို့နိုင်ငံသားတွေက ပြန်ရတော့မယ်ဆိုတော့ ဂိုက်မပါလည်း သွားနေလာနေတာတွေ တွေ့နေတဲ့အခါကျတော့ အစ်မတို့က နည်းနည်းတော့ စိုးရိမ်တယ်”

ကိုရိုနာဗိုင်းရပ်စ် ကူးစက်ခံရသူတွေထဲမှာ ဆွစ်ဇာလန်နိုင်ငံ ဂျနီဗာမြို့ကနေ ပြန်လာတဲ့ ကုလသမဂ္ဂရုံးဝန်ထမ်း အမျိုးသမီးတစ်ဦးလည်း ပါဝင်ပါတယ်။

သူဟာ ရှမ်းပြည်နယ်တောင်ပိုင်းကို သွားရောက်ခဲ့တယ်ဆိုပြီး လူမှုစာမျက်နှာတွေမှာ ပျံ့နှံ့နေပါတယ်။

ကုလသမဂ္ဂရုံး မြန်မာပြည်ပြောရေးဆိုခွင့်ရှိသူ ဦးအေးဝင်းကတော့ သူတို့ဝန်ထမ်းဟာ မြန်မာနိုင်ငံကို ပြန်ရောက်ချိန်ကတည်းက အပြင်ကိုမထွက်ဘဲ ၁၄ ရက် ကိုယ်ဟာကို စောင့်ကြည်လူနာအဖြစ် နေထိုင်ခဲ့တယ်လို့ ပြောပါတယ်။

“သူပြန်လာတဲ့အချိန်မှာ Self-quarantine လုပ်တယ် ပြောတယ်၊ ကျနော်တို့ ဝန်ထမ်းတွေ အားလုံးဟာ UN ရဲ့ စည်းမျဉ်းအရ ဝန်ထမ်းတွေဟာ ပြန်လာရင် Self-quarantine လုပ်ရတာချည်းပဲ၊ လောလောဆယ် ဝန်ထမ်းနဲ့ ပတ်သက်လို့ကတော့ ကျန်းမာရေး အခြေအနေ ကောင်းတယ်ပဲ ဆိုရမှာပေါနော်”

ကျန်းမာရေးဝန်ကြီးဌာန ထုတ်ပြန်ချက်အရ မြန်မာနိုင်ငံမှာ ကိုရိုနာဗိုင်းရပ်စ် ကူးစက်ခံရသူ ရှစ်ဦးရှိပြီး စောင့်ကြည်လူနာ ၆၈ ဦးရှိပါတယ်။

မနေ့ညက ထုတ်ပြန်ချက်အရ မတ်လ ၂၆ ရက်နေ့အထိ ရောဂါပိုးကူးစက်ခံရသူ ငါးဦးထဲက လေးဦးဟာ ကျန်းမာရေး တိုးတက်ကောင်းမွန်နေပြီး ရန်ကုန်ဆေးရုံကြီးမှာ တက်ရောက်ကုသနေတဲ့ လူနာကို ဝေဘာဂီအထူးကုဆေးရုံကို ပြောင်းရွှေ့ပြီး အထူးကြပ်မတ်ကုသဆောင်မှာ ကုသပေးနေတယ်လို့ ဆိုပါတယ်။

ဗိုင်းရပ်စ်ကူးစက်ခံထားရသူတွေရဲ့ အခြေအနေကို ကျန်းမာရေးနဲ့ အားကစားဝန်ကြီးဌာန ပြောရေးဆိုခွင့်ရှိသူ ဒေါက်တာ ခင်ခင်ကြီးက ပြောပါတယ်။

“လူနာ ရှစ်ဦးမှာ နံပါတ်ငါး လူနာကလွဲပြီး ကျန်တဲ့လူတွေက အခြေအနေကောင်းပါတယ်၊ စိုးရိမ်ရတဲ့ အခြေ အနေ မရှိပါဘူး၊ သာမန်လက္ခဏာတွေပါပဲ၊ နံပါတ်ငါး လူနာကတော့ နဂိုကတည်းက နှာခေါင်းကင်ဆာ ဖြစ်တယ်၊ သြစတြေးလျမှာတော့ တစ်လ ဆေးသွားကုတယ်၊ ဓာတ်ရောင်ခြည်ကုတာတွေပါ ခံယူထားတယ်၊ လာကတည်းက သူက အခြေအနေ မကောင်းဘူး၊ ဒါပေမဲ့ လက်ရှိမှာ အသက်ရှင်လျက်ရှိနေသေးတယ်”

လက်ရှိ ကိုရိုနာဗိုင်းရပ်စ် တွေ့ရှိထားတွေဟာ ချင်းပြည်နယ် တီးတိန်ဆေးရုံမှာ တစ်ဦး၊ ရန်ကုန်မြို့ ဝေဘာဂီ ဆေးရုံမှာ ငါးဦး၊ မန္တလေး ကန်တော်နဒီဆေးရုံမှာ တစ်ဦးနဲ့ နေပြည်တော် ကုတင် ၁၀၀၀ ဆေးရုံမှာ တစ်ဦး စုစုပေါင်း ရှစ်ဦးရှိနေတာပါ။

ကိုရိုနာဗိုင်းရပ်စ်ပိုး တွေ့ရှိသူတွေ နေထိုင်ခဲ့တဲ့ ရန်ကုန်တိုင်းမှာ မှော်ဘီမြို့နယ်က ရှင်ဆေကိန္ဒကျောင်း၊ အင်းစိန်၊ မင်္ဂလာတောင်ညွှန်နဲ့ ဗဟန်းမြို့နယ်တွေက နေအိမ်တွေနဲ့ လမ်းတွေကို ဝင်ထွက်သွားလာခွင့်တွေ ပိတ်ပင်ထား ပါတယ်။