စစ်ကိုင်းတိုင်း မြို့သစ်မြို့ကို NUG နဲ့ မဟာမိတ်အဖွဲ့တွေ ပူးပေါင်းသိမ်းယူ

စစ်ကိုင်းတိုင်း တမူးမြို့နယ် မြို့သစ်မြို့ကို မေလ ၁၁ ရက်နေ့က သိမ်းပိုက်နိုင်ခဲ့တယ်လို့ အမျိုးသားညီညွတ်ရေး အစိုးရ ကာကွယ်ရေးဝန်ကြီးဌာန အမှတ် (၁) စစ်ဒေသက သတင်းထုတ်ပြန်ပါတယ်။

မြို့သစ်မြို့ကို မေလ ၇ ရက်နေ့က စတင်တိုက်ခိုက်ခဲ့တာဖြစ်ပြီး ၁၁ ရက်နေ့မှာ သိမ်းယူနိုင်ခဲ့တာဖြစ်တယ်လို့ အမျိုးသားညီညွတ်ရေးအစိုးရ NUG ကာကွယ်ရေးဝန်ကြီးဌာန ဒုတိယအတွင်းဝန် ဦးမောင်မောင်ဆွေက ပြောပါတယ်။

"မြို့သစ်မှာက ခလရ- ၂၂၈ တပ်ရင်းရှိတယ်၊ အဲတပ်ရင်းမှာက ကျန်တဲ့အဖွဲ့တွေရော၊ ရဲတွေရော၊ ပျူတွေရော ပူးပေါင်းအင်အား ၂၀၀ ကျော်လောက်ရှိတာပေါ့၊ အဲဒါကို အမှတ် (၁) စစ်ဒေသ တမူးခရိုင် စစ်ဒေသကွပ်ကဲရေးမှူးက ဦးဆောင်ပြီး မဟာမိတ်အဖွဲ့တွေ ပူးပေါင်းပြီးတိုက်ခဲ့တာ၊ မေလ ၇ ရက်နေ့ကနေတိုက်တာ ၁၁ မနက်မှာတော့ ကျွန်တော်တို့ သိမ်းဆည်းရမိတာရှိတယ်၊ သိမ်းဆည်းရမိတဲ့အခြေအနေ အသေးစိတ်ကိုတော့ အမှတ် (၁) စစ်ဒေသကနေ ထုတ်ပြန်ပါလိမ့်မယ်"

စစ်ကောင်စီရဲ့ ခြေလျင်တပ်ရင်း ခလရ - ၂၂၈ ရှိတဲ့ အခိုင်အမာစခန်းကုန်းကို ပြည်သူ့ကာကွယ်ရေးတပ်ဖွဲ့တွေက မေလ (၇) ရက်နေ့ကတည်းက ထိုးစစ်ဆင်တိုက်ခိုက်ခဲ့တာဖြစ်ပြီး တိုက်ပွဲအတွင်း ရဲ (၂၁) ဦး အလံဖြူထောင် လက်နက်ချခဲ့တယ်လို့လည်း ဆိုပါတယ်။ စစ်ကောင်စီဘက်က သေဆုံးသူနဲ့ ဒဏ်ရာရတဲ့စာရင်းကိုတော့ အတည်မပြုနိုင်သေးဘူးလို့ ပြောပါတယ်။

မြို့သစ်မြို့အခြေအနေနဲ့ ပတ်သက်ပြီး စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကို RFA က ဖုန်းနဲ့ဆက်သွယ်ခဲ့ပေမဲ့ လက်ခံဖြေဆိုတာ မရှိပါဘူး။

မြို့သစ်မြို့မှာရှိတဲ့ စစ်ကောင်စီတပ် ခလရ- ၂၂၈၊ SNA တပ်မဟာ-၈၉၁ (တပ်ရင်း-၃)၊ ကသည်းတပ်ဖွဲ့၊ ရဲ၊ ပျူစောထီးစတဲ့ ပူးပေါင်းအင်အား (၂၅၀) ခန့်ကို NUG ရဲ့ အမှတ် (၁) စစ်ဒေသ တမူးခရိုင် ကွပ်ကဲရေးအဖွဲ့က ဦးစီးပြီး တမူးခရိုင် တပ်ရင်း-၂၊ အထူးလှုပ်ရှား တပ်ရင်း-၉၊ ကူကီးအမျိုးသားတပ်မတော် KNA(B)၊ အမျိုးသားလွတ်မြောက်ရေးတပ်တော် (NLA) စတဲ့ မဟာမိတ်အဖွဲ့တွေ ပူးပေါင်း တိုက်ခိုက်ခဲ့တာလို့ NUG က ထုတ်ပြန်ထားပါတယ်။

အိန္ဒိယ- မြန်မာနယ်စပ် တမူးမြို့နယ် ခါမ်းပါတ်မြို့ကိုလည်း ၂၀၂၃ ခုနှစ်၊ နိုဝင်ဘာ ၅ ရက်မှာ တော်လှန်ရေးအင်အားစုတွေ သိမ်းပိုက်ခဲ့ပြီး ပြည်သူ့အုပ်ချုပ်ရေးစနစ် လည်ပတ်‌နေတာ ဖြစ်ပါတယ်။