ထားဝယ်မှာ ကျောင်းသားလူငယ် ကိုးဦး အဖမ်းခံထားရ

တနင်္သာရီတိုင်း ထားဝယ်မြို့နယ်မှာ ဒီဇင်ဘာ ၉ နဲ့ ၁၀ နှစ်ရက်အတွင်း ကျောင်းသားလူငယ် ကိုးယောက် စစ်ကောင်စီတပ်ဖွဲ့ဝင်တွေရဲ့ ဖမ်းဆီးတာခံလိုက်ရတယ်လို့ ထားဝယ်တက္ကသိုလ် ကျောင်းသားသမဂ္ဂက ထုတ်ပြန်ပါတယ်။

အဖမ်းခံရတဲ့ လူငယ်တွေဟာ ထားဝယ်တက္ကသိုလ်က ကျောင်းသား၊ ကျောင်းသူ လေးယောက် ပါဝင်တယ်လို့ ထုတ်ပြန်ချက်ထဲမှာ ပါဝင်ပါတယ်။

ဒီဇင်ဘာ ၉ ရက်မှာ ထားဝယ်မြို့နယ် ကညုံကျွန်းရွာမှာ ဓာတုဗေဒဌာန တတိယနှစ်ကျောင်းသူ မဇူးဇူးပြည့် စုံဝင်း၊ ပထဝီဌာန ဒုတိယနှစ် ဂုဏ်ထူးတန်းကျောင်းသူ မစံပါယ်ဖြူ အပြင် တခြား မိန်းကလေး နှစ်ယောက်နဲ့ ယောက်ျားလေးတချို့ကို စစ်ကောင်စီတပ်ဖွဲ့ဝင်တွေက ဖမ်းဆီးခဲ့တယ်လို့ ကျောင်းသားများသမဂ္ဂက ဖော်ပြ ထားပါတယ်။

ဖမ်းဆီးခံရသူတွေကို လောင်းလုံရဲစခန်းနဲ့ ထားဝယ်မြို့မရဲစခန်းကို ခေါ်ဆောင်သွားတယ်လို့လည်း ဆိုပါတယ်။

ဒီဇင်ဘာ ၁၁ ရက်နေ့ မနက်ပိုင်းမှာလည်း ထားဝယ်မြို့ပေါ် ရပ်ကွက်တစ်ခုမှာ ထားဝယ်တက္ကသိုလ် သင်္ချာ ကျောင်းသားဟောင်း ကိုအောင်ကိုလွင်နဲ့ ကိုကောင်းထက်စွမ်း အပါအဝင် လူငယ် ငါးယောက်ကို စစ်ကောင် စီက ဖမ်းဆီးခဲ့တယ်လို့ သတင်းထုတ်ပြန်ပါတယ်။

စစ်ကောင်စီတပ်ဖွဲ့ဝင်တွေဟာ ပြီးခဲ့တဲ့ နိုဝင်ဘာလထဲမှာ ထားဝယ်တက္ကသိုလ်က ကျောင်းသားတွေနဲ့ မိသားစုဝင် စုစုပေါင်း ၁၃ ယောက်ကို ဖမ်းဆီးခဲ့ပြီး အခု ဒီဇင်ဘာလထဲမှာလည်း ဆက်လက်ဖမ်းဆီးနေတာ ဖြစ်ပါတယ်။