ကိုရိုနာဗိုင်းရပ်စ်ကြောင့် မြန်မာလုပ်သား ကိုးထောင်လောက် အလုပ်လက်မဲ့ဖြစ်
2020.03.10
ရန်ကုန်မြို့ အထည်ချုပ်စက်ရုံတစ်ခုမှာ အလုပ်လုပ်နေသူတွေကို တွေ့ရစဉ်
Photo: Aung Thain Kha/RFA
တရုတ်နိုင်ငံက ကိုရိုနာဗိုင်းရပ်စ်ရောဂါကြောင့် ဧရာဝတီတိုင်း၊ ရန်ကုန်တိုင်း လှိုင်သာယာစက်မှုဇုန်တို့ ကုန်ကြမ်း ပြတ်လပ်ပြီး နှစ်လအတွင်း လုပ်သား ကိုးထောင်နီးပါး အလုပ်လက်မဲ့ဖြစ်သွားပြီလို့ အလုပ်သမားသမဂ္ဂများ အဖွဲ့ချုပ်က ပြောပါတယ်။
၂၀၂၀ ခုနှစ် ဇန်နဝါရီလ ၂၄ ရက်နေ့ကနေ မတ်လ ၁၀ ရက်နေ့ အထိကောက်ယူထားတဲ့ စာရင်းအရပိတ်သိမ်း သွားတဲ့ စက်ရုံ ၂၁ ရုံရှိပြီး အလုပ်သမား စုစုပေါင်း ၈၉၀၀ ကျော် ရှိနေပြီလို့ မြန်မာနိုင်ငံလုံးဆိုင်ရာ အလုပ်သမား သမဂ္ဂများအဖွဲ့ချုပ် CTUM က မဖြိုးစန္ဒာစိုးက ပြောပါတယ်။
အခုအလုပ်လက်မဲ့စာရင်းမှာ ပဲခူးတိုင်း၊ မန္တလေးတိုင်းနဲ့ အခြားစက်မှုလုပ်ငန်းတွေက စာရင်းတွေမပါသေးဘူးလို့ ဆိုပါတယ်။ အခုလို အလုပ်လက်မဲ့ဦးရေ အချိန်တိုအတွင်း သိသိသာသာ တိုးလာနေတာနဲ့ ပတ်သက်ပြီး သတင်း အချက်အလက်အတိအကျကို အစိုးရဘက်က ထုတ်ပြန်အသိပေးတာ မရှိသေးပါဘူး။
"အခုအနေအထားကတော့ ကျွန်မတို့က ပြောဖို့တော်တော်လေးည်း ခက်တယ်။ ဘာလို့လဲဆိုတော့ အလုပ်ရှင်ဆီ ကလည်း သတင်းအချက်အလက်ရမနေဘူး။ အစိုးရဆီက၊ အလုပ်သမားဝန်ကြီးဌာနဆီကလည်း သတင်းအချက် အလက်ရမနေသေးဘူး။ မြေပြင်မှာပဲ အဖွဲ့ချုပ်တွေက စုဆောင်းနေတဲ့စာရင်းပဲရှိနေတော့ ကျွန်မလည်း အဲဒီ ကိန်းဂဏန်းကိုတော့ ပြောဖို့ခက်နေပါတယ်။"
ကိုရိုနာဗိုင်းရပ်စ်ကြောင့် တရုတ်နိုင်ငံနဲ့ နယ်မြေချင်းထိစပ်နေတဲ့ မြန်မာနိုင်ငံမှာ စီးပွားရေးအရအထိနာမှုတွေ လည်း တနေ့တခြား သိသာလာနေပါပြီ။ အထည်ချုပ်လုပ်ငန်းတင်မက နယ်စပ် ကုန်သွယ်ရေး၊ ခရီးသွားလုပ်ငန်း၊ ရေထွက်ကုန်ပစ္စည်းတင်ပို့မှုနဲ့ တရုတ် - မြန်မာဆက်စပ်ပြီး လုပ်ကိုင်နေတဲ့ အခြားစီးပွားရေးလုပ်ငန်းတွေလည်း ထိခိုက်နစ်နာမှုတွေ ရှိလာနေပါတယ်။
ဖတ်ရှုသူအများဆုံး သတင်းများ။
သတင်းများ
