ငြိမ်းချမ်းရေးနဲ့ ဒီမိုကရေစီ လုမ္ဗနီက တဆင့်ပျံ့နှံ့စေလို

ဂေါတမဗုဒ္ဓ ဖွားမြင်တော်မူရာ လုမ္ဗနီ အင်ကြင်းတော ကနေ ကမ္ဘာတစ်ဝှမ်းလုံးကို  ငြိမ်းချမ်းရေးနဲ့ ဒီမိုကရေစီ ပျံ့နှံ့စေလိုကြောင်း အမျိုးသားဒီမိုကရေစီ ဥက္ကဌ ဒေါ်အောင်ဆန်းစုကြည်က  ပြောပါတယ်။

တနင်္ဂနွေနေ့မနက်က ကပ္ပိလဝတ်မြို့ လုမ္ဗနီကို ရဟတ်ယာဉ်နဲ့ ရောက်ရှိလာခဲ့ပြီး၊ လုမ္ဗနီကို လည်ပတ်ကြည်ညိုခဲ့ပြီးတဲ့နောက် ကျင်းပခဲ့တဲ့ သတင်းစာရှင်းလင်းပွဲမှာ ပြောကြားခဲ့တာပါ။

ဗုဒ္ဓဓမ္မနဲ့ ပတ်သက်ပြီးတော့လည်း ကျမအတွက်တော့ ဗုဒ္ဓဓမ္မက ငြိမ်းချမ်းရေးပါပဲ၊ လောကဟာ စဉ်ဆက်မပြတ် ပြောင်းလဲနေတာပါ၊ ဘာတစ်ခုမှ ထာဝစဉ်တည်တံ့မနေပါဘူး၊ ကျမအတွက်တော့ အဲဒီအသိကိုက ငြိမ်းချမ်းမှုနဲ့ အင်အားတွေကို ရရှိပါတယ်လို့ ပြောကြားခဲ့ပါတယ်။

ဒေါ်အောင်ဆန်းစုကြည်ဟာ လုမ္ဗနီမှာရှိတဲ့ မြန်မာဘုန်တော်ကြီးကျောင်းမှာ မြန်မာသံဃာတော်တွေကို ဝင်ရောက်ဖူးမြော်ခဲ့ပါတယ်။