သုံးနှစ်အတွင်း NLD ပါတီဝင်ပေါင်း နှစ်ထောင်ကျော် ဖမ်းဆီးခံရ

အာဏာသိမ်းပြီးချိန်ကနေ သုံးနှစ်အတွင်း အမျိုးသားဒီမိုကရေစီအဖွဲ့ချုပ် (NLD) ပါတီဝင်ပေါင်း ၂၀၄၉ ဦး ဖမ်းဆီးခံခဲ့ရတယ်လို့ လူ့အခွင့်အရေး ချိုးဖောက်မှုများ မှတ်တမ်းတင်ကောက်ယူရေးအဖွဲ့ (HRDT-NLD) က ဖေဖော်ဝါရီလ ၉ ရက်နေ့မှာ ထုတ်ပြန်ပါတယ်။

အာဏာသိမ်းပြီးချိန်ကနေ ၂၀၂၄ ခုနှစ် ဇန်နဝါရီလ ၁၅ ရက်နေ့အတွင်း NLD ပါတီဝင် ၁၉၀၅ ဦးနဲ့ လွှတ်တော်ကိုယ်စားလှယ် ၁၄၄ ဦး တို့ဟာ စစ်ကောင်စီတပ်ရဲ့ ဖမ်းဆီးခံခဲ့ရတယ်လို့ HRDT-NLD က ဖော်ပြထားပါတယ်။

ဒါဟာ ၂၀၂၃ ခုနှစ် စက်တင်ဘာလ စာရင်းတွေအရ ဖမ်းဆီးခံထားရတဲ့ NLD ပါတီဝင်ပေါင်း ၁၉၁၀ ဦးထက် လေးလအတွင်း ၁၃၉ ဦး တိုးလာတာဖြစ်ပါတယ်။

သုံးနှစ်အတွင်း ဖမ်းဆီးသတ်ဖြတ်ခံရသူတွေထဲမှာ ပါတီဝင် တစ်ရာနဲ့ လွှတ်တော်ကိုယ်စားလှယ် နှစ်ဦး စုစုပေါင်း NLD ပါတီဝင်ပေါင်း ၁၀၂ ဦး ပါဝင်နေတယ်လို့ HRDT-NLD က ရေးသားထားပါတယ်။

နောက်ပြီး စစ်ကောင်စီက နေအိမ်နဲ့ ပိုင်ဆိုင်မှုတွေကို ချိပ်ပိတ်သိမ်းဆည်းတာ၊ ဖျက်ဆီးခံရတာတွေကြောင့် ပါတီဝင်ပေါင်း ၄၃၅ ဦးရဲ့ ပိုင်ဆိုင်မှု ၅၄၉ ခု ဆုံးရှုံးခဲ့ရတယ်လို့ ဆိုပါတယ်။

HRDT-NLD ဟာ လူ့အခွင့်အရေးချိုးဖောက်မှုတွေကို မှတ်တမ်းတင် ကောက်ယူတဲ့အဖွဲ့တစ်ခုဖြစ်ပြီး NLD ပါတီက တည်ထောင်ထားတာဖြစ်ပါတယ်။

ဒီအစီရင်ခံစာနဲ့ ပတ်သက်လို့ စစ်ကောင်စီဘက်က တစ်စုံတစ်ရာ ထုတ်ပြန်တာမျိုး မတွေ့ရသေးပါဘူး။

အာဏာသိမ်းကာလအတွင်း NLD ပါတီရဲ့ ရုံးချုပ်ကနေ ရပ်ကျေးရုံးတွေအထိ တိုက်ခိုက်ခံရမှုတွေဟာလည်း ၁၆၄ ကြိမ်အထိ ရှိခဲ့တယ်လို့ HRDT-NLD ရဲ့ စာရင်းတွေမှာ ဖော်ပြထားပါတယ်။