အမျိုးသမီးများ စွမ်းရည်ပြဖို့ NLD တိုက်တွန်း

ဒီကိစ္စနဲ့ပတ်သက်လို့ NLD ဗဟို အလုပ်အမှုဆောင်     အဖွဲ့ဝင် ဒေါက်တာ မေဝင်းမြင့်က ခုလို ပြောပါတယ်။

“ကမ္ဘာ့ နိုင်ငံအသီးသီးမှာ ရှိတဲ့ အမျိုးသမီးတွေရဲ့ လူ့အခွင့်အရေး၊ တန်းတူရေး၊ ဒီမိုကရေစီရေး လှုပ်ရှားမှု အားလုံးကို ကျွန်မတို့ရဲ့ လှုပ်ရှားမှုရဲ့ အစိတ်အပိုင်း တခုအဖြစ် ခံယူထားတယ်။ တခြားနိုင်ငံမှာ ဘယ်လိုပဲ အမျိုးသမီးတွေရဲ့ တောင်းဆိုမှုများကိုမဆို ကျွန်မတို့ ထောက်ခံ အားပေးသွားမယ်။ ကျွန်မတို့ တောင်းဆိုနေတဲ့ ရုန်းကန်မှု၊ လှုပ်ရှားမှုတွေကို စာနာ ထောက်ထားပြီးတော့ အားပေး ကူညီကြတဲ့ နိုင်ငံ အသီးသီးမှာ ရှိတဲ့ အစိုးရတွေ၊ ပါတီတွေ၊ အသင်းအဖွဲ့တွေ၊ လူပုဂ္ဂိုလ်တွေ၊ ကမ္ဘာ့ နိုဘယ်လ်ဆုရှင်တွေ၊ ဘာသာစုံ အားလုံးကို ကျွန်မတို့က လေးစား တန်ဖိုးထားရှိပါတယ် ဆိုတဲ့အကြောင်း ကျွန်မတို့ ဒီနေ့ ကြေညာချက် ထုတ်ပြန်တာ ဖြစ်ပါတယ်။”

အထူးသဖြင့် နိုင်ငံရေး ယုံကြည်ချက်ကြောင့် အကျဉ်းကျနေတဲ့ မြန်မာ့အမျိုးသမီး ၅၀ ကျော်အတွက် အထူး စာနာမိသလို၊ နိုင်ငံရေးအကျဉ်းသား ၂၀၀၀ ကျော်ရဲ့ နောက်ကွယ်ကနေ ထောက်ပံ့ကူညီနေတဲ့ မိခင်တွေ၊ ဇနီးသည်တွေ၊ အစ်မနဲ့ နှမတွေရဲ့ ထောင်ဝင်စာ တွေ့ဖို့ ရုန်းကန်နေရတာကိုလည်း အသိအမှတ်ပြု လေးစားမိတယ်လို့ ဒေါက်တာ မေဝင်းမြင့်က ပြောပါတယ်။

“ကျွန်မတို့ အမျိုးသမီး ၅၀ ကျော် အကျဉ်းကျခံနေရတယ်။ ဘယ်လိုပဲ ဒုက္ခဆင်းရဲ ခံနေရသည် ဖြစ်စေ၊ ဘယ်လောက်ပဲ ပေးဆပ်မှုတွေနဲ့ ကြုံတွေ့ရသည် ဖြစ်စေ၊ ဒီ ငြိမ်းချမ်းရေးနဲ့ လူ့အခွင့်အရေး အပြည့်အဝ ရရှိတဲ့ ဒီမိုကရေစီနိုင်ငံ ပေါ်ပေါက်ဖို့အတွက် ကျွန်မတို့ အမျိုးသမီးထုက ဆက်လက်ပြီးတော့ လှုပ်ရှားသွားဖို့ သန္နိဋ္ဌာန် ချထားတယ်ဆိုတဲ့အကြောင်း တင်ပြထားပါတယ်။”