ဒုက္ခသည်စခန်းကို တိုက်ခိုက်မှု စစ်ရာဇဝတ်မှုမြောက်တယ်လို့ မြောက်ပိုင်းလက်နက်ကိုင်သုံးဖွဲ့ ထုတ်ပြန်

ကချင်လွတ်မြောက်ရေးအဖွဲ့ (KIO/KIA) ဌာနချုပ်ရှိရာ လိုင်ဇာမြို့အနီးက မုန်လိုင်ခက် ဒုက္ခသည်စခန်းကို စစ်ကောင်စီက လက်နက်ကြီးနဲ့ပစ်ခတ်တိုက်ခိုက်တာဟာ စစ်ရာဇဝတ်မှု ကျူးလွန်တာလို့ မြောက်ပိုင်းလက်နက်ကိုင် သုံးဖွဲ့ဖြစ်တဲ့ တအာင်းအမျိုးသားလွတ်မြောက်ရေးတပ်မတော် (TNLA)၊ မြန်မာအမျိုးသား ဒီမိုကရက်တစ်မဟာမိတ်တပ် (MNDAA)၊ ရက္ခိုင့်တပ်တော် (AA) တို့က အောက်တိုဘာ ၁၀ ရက်နေ့မှာ ကြေညာချက်ထုတ်လိုက်ပါတယ်။

စစ်ကောင်စီက မုန်လိုင်ခက် ဒုက္ခသည်စခန်းကို ပစ်ခတ်တဲ့ တစ်ချိန်တည်းမှာပဲ လိုင်ဇာမြို့က ရက္ခိုင့်တပ်တော် (AA) တပ်စခန်းတစ်ခုကို လက်နက်ကြီးနဲ့ ပစ်ခတ်တိုက်ခတ်ခဲ့တာကြောင့် AA တပ်ဖွဲ့ဝင် တစ်ဦးသေဆုံးပြီး ၁၀ ဦး ဒဏ်ရာရရှိခဲ့တယ်လို့လည်း ထုတ်ပြန်ချက်မှာ ဖော်ပြထားပါတယ်။

စစ်ကောင်စီရဲ့ စစ်ရာဇဝတ်မှုကျူးလွန်ခံရပြီး အသက်ဆုံးရှုံးခဲ့ရသူတွေအတွက် တရားမျှတမှုနဲ့ အမှန်တရားရရှိဖို့ ကချင်လူထု၊ KIO/KIA တို့နဲ့အတူ မဟာမိတ်သုံးဖွဲ့က တစ်သားတည်းရှိကြောင်း ပါရှိပါတယ်။

ဒါ့အပြင် နိုင်ငံရေး၊ စစ်ရေးအရ အဘက်ဘက်က ရှုံးနိမ့်နေတဲ့ စစ်ကောင်စီက သူတို့ကို မထောက်ခံတဲ့ ပြည်သူတွေအပေါ် လေကြောင်းကနေ လက်နက်ကြီးတွေနဲ့ ပစ်ခတ်တိုက်ခိုက်တာ၊ တရားလက်လွတ် သတ်ဖြတ်တဲ့လုပ်ရပ်တွေကို နိုင်ငံအနှံ့အပြားမှာ ကျူးလွန်နေတယ်လို့လည်း ဆိုပါတယ်။

တစ်ဆက်တည်းမှာပဲ အဲဒီလုပ်ရပ်တွေဟာ လူသားမျိုးနွယ်အပေါ် ကျူးလွန်တဲ့ပြစ်မှုတွေဖြစ်သလို စစ်ရာဇဝတ်မှုတွေကို ဗြောင်ကျကျကျူးလွန်တာဖြစ်တယ်လို့ ဝေဖန်ထားပါတယ်။

အမျိုးသားညီညွတ်ရေးအစိုးရ (NUG) ကလည်း စစ်ကောင်စီဟာ စစ်ရေးပစ်မှတ်မဟုတ်တဲ့ အရပ်သားပြည်သူတွေ နေထိုင်တဲ့ ဒုက္ခသည်စခန်းကို ရည်ရွယ်ချက်ရှိရှိ ပစ်မှတ်ထား တိုက်ခိုက်ခဲ့တာဖြစ်ပြီး လူသားမျိုးနွယ်စုအပေါ် ကျူးလွန်တဲ့ ရာဇဝတ်မှုနဲ့ စစ်ရာဇဝတ်မှုတွေကို ပြောင်ပြောင်တင်းတင်းကျူးလွန်တာ ဖြစ်တယ်လို့ ထုတ်ပြန်ထားပါတယ်။

ဒီလုပ်ရပ်ကို ပြင်းပြင်းထန်ထန် ရှုတ်ချပြီး ကချင်တိုင်းရင်းသားတွေရဲ့ ထိခိုက်ဆုံးရှုံးမှုအပေါ် အမျိုးသားညီညွတ်ရေးအစိုးရအနေနဲ့ ထပ်တူ ခံစားရသလို အတူရပ်တည်သွားမှာ ဖြစ်ပြီး ထိခိုက်ဆုံးရှုံးရသူတွေအတွက် တရားမျှတမှု ပြန်လည်ရယူပေးနိုင်ဖို့ ကြိုးစားသွားမယ်လို့လည်း ဆိုပါတယ်။

စစ်ကောင်စီတပ်ရဲ့ တိုက်ခိုက်မှုကြောင့် မုန်လိုင်ခက် ဒုက္ခသည်စခန်းက ကလေးငယ် ၁၁ ဦးအပါအဝင် စစ်ဘေးဒုက္ခသည် ၂၉ ယောက် သေဆုံးခဲ့ရပါတယ်။ စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကတော့ စစ်တပ်ရဲ့ လေယာဉ်နဲ့ ပစ်ခတ်မှု၊ လက်နက်ကြီးနဲ့ ပစ်ခတ်မှုမဟုတ်ဘူးလို့ ငြင်းဆိုထားပါတယ်။