စစ်ကိုင်းတိုင်းအစိုးရက ဧပြီ ၇ ရက်နေ့ကနေ ၂၁ အထိ အပြင်မထွက်ရ အမိန့်ထုတ်ပြန်

ဧပြီ ၇ ရက်နေ့ မနက်ဖြန်ကစပြီး ၂၁ ရက်နေ့အထိ မလိုအပ်ဘဲ အိမ်အပြင်မထွက်ကြဖို့နဲ့ စားသောက်ကုန်၊ စက်သုံးဆီနဲ့ ဆေးရုံဆေးခန်းတွေကလွဲပြီး ကျန်တာတွေအကုန်ပိတ်ဖို့ စစ်ကိုင်းတိုင်းဒေသကြီး အစိုးရအဖွဲ့က ညွှန်ကြားချက် ထုတ်ပြန်လိုက်ပါတယ်။

ဧပြီ ၇ ရက်နေ့ မနက် ၀၀:၀၁ နာရီကနေစပြီး ၂၁ ရက်နေ့ ည ၂၄:၀၀ နာရီအထိ မလိုအပ်ဘဲ အိမ်ထဲကနေ အိမ်ပြင်မထွက်ကြဖို့ စစ်ကိုင်းတိုင်းဒေသကြီး အစိုးရအဖွဲ့က ဧပြီ ၅ ရက်နေ့မှာ ကြေညာချက်ထုတ်ပြန်လိုက်တာ ဖြစ်ပါတယ်။

အပြင်မထွက်ရတဲ့ ရက်တွေအတွင်း စားသောက်ရေးအဆင်ပြေအောင် စစ်ကိုင်းတိုင်းအတွင်းက မြို့နယ်ကြီး လေးခုကို ကျပ်သိန်း ၈၀ နဲ့ ကျန်တဲ့မြို့နယ်တွေကို ကျပ်သိန်း ၅၀ နှုန်းထောက်ပံ့ဖို့ စီစဉ်ထားတယ်လို့ စစ်ကိုင်းတိုင်း အစိုးရအဖွဲ့ ချင်းတိုင်းရင်းသားရေးရာ ဝန်ကြီး ဦးလာလ်ထောင်ထန်း ကဆိုပါတယ်။

“စားရေးသောက်ရေး စီစဉ်ထားတယ် မြို့နယ် တစ်မြို့နယ်ကို သိန်း ၅၀ နဲ့ မြို့ကြီးတွေကို သိန်း ၈၀ စီစဉ်ထားတယ်။ အလှူခံဌာနကိုလည်း မြို့နယ်တွေမှာ တစ်နေရာတည်း သတ်သတ်မှတ်မှတ်လုပ်မယ်။ မြို့နယ်အလိုက် သူတို့ဘာသာ စီစဉ်လိမ့်မယ်”

စစ်ကိုင်း၊ မုံရွာ၊ ရွှေဘို၊ ကလေး စတဲ့မြို့နယ် လေးခုကို ကျပ်သိန်း ၈၀ ထောက်ပံ့မှာဖြစ်ပါတယ်။

စစ်ကိုင်းတိုင်းအတွင်း စက်သုံးဆီအရောင်းဆိုင်၊ ပုဂ္ဂလိက ဆေးရုံဆေးခန်း၊ ဘဏ်၊ လျှပ်စစ်ဓါတ်အားပေးလုပ်ငန်း၊ အစားအသောက်နဲ့ ဆေးဝါးထုတ်လုပ်ရောင်းချတဲ့ လုပ်ငန်းတွေကို ပုံမှန်အတိုင်း လည်ပတ်သွားမှာဖြစ်ပြီး ခရီးသည်ပို့ဆောင်ရေး မော်တော်ယာဉ်လိုင်း၊ ရေယာဉ်လိုင်းတွေ၊ ဟိုတယ်၊ မိုတယ်နဲ့ အင်းတွေ၊ ပန်းခြံ၊ ကစားကွင်းတွေကို ယာယီပိတ်သွားမှာဖြစ်တယ်လို့ ထုတ်ပြန်ထားတာပါ။

မနက်ဖြန်ကစပြီး ကားလိုင်းပြေးဆွဲတာရပ်လိုက်ပြီး ရောင်းထားပြီးသား လက်မှတ်ရောင်းထားပြီးသားတွေကို ငွေပြန်အမ်းသွားမယ်လို့ ရွှေစင်စက်ြာ မုံရွာဂိတ်တာဝန်ခံ ဦးဟန်လင်းအောင်က ပြောပါတယ်။

“ဒီနေ့ နောက်ဆုံးပါ မနက်ဖြန် စပိတ်ပါမယ်။ စစ်ကိုင်းတိုင်း စာထုတ်ထားတဲ့အတိုင်းပါ။ လက်မှတ်ဝယ်ထားတဲ့ သူတွေကိုတော့ ပြန်အမ်းပါမယ်။ သူတို့ဝယ်ထားတဲ့ဂိတ်တွေမှာ ငွေပြန်ထုတ်နိုင်ပါတယ်။ တစ်နေ့ကို ငါးစီးဆွဲပါတယ်။ ရန်ကုန်လေးစီး နေပြည်တော်တစ်စီးပါ”

အခြားပြည်နယ်နဲ့ တိုင်းတွေကို ကျန်းမာရေးကိစ္စ၊ နာရေးကိစ္စကလွဲပြီး မဖြစ်မနေသွားရမယ်ဆိုရင် သက်ဆိုင်ရာ ကိုရိုနာဗိုင်းရပ်စ်ကာကွယ်၊ ထိန်းချုပ် ၊ကုသရေး မြို့နယ်အဆင့် လုပ်ငန်းကော်မတီတွေရဲ့ ခွင့်ပြုချက်နဲ့သာ သွားလာဖို့ ထုတ်ပြန်ချက်မှာ ဖော်ပြထားပါတယ်။

အိမ်မှာပဲနေဖို့ ညွှန်ကြားချက်အတွက် စားသောက်စရာတွေ ကြိုတင်စုဆောင်းထားပြီး ရက်ထပ်တိုးမှာတော့ စိုးရိမ်တယ်လို့ စစ်ကိုင်းမြို့ဒေသခံ ကိုသော်ဇင်အောင် ကပြောပါတယ်။

“တိုင်းဒေသကြီး အစိုးရ လော့ဒေါင်းမလုပ်ခင် အိမ်မှာစားရေးသောက်ရေး စီစဉ်ထားတယ် အပြင်မထွက် ရအောင်။ လော့ဒေါင်းလုပ်တဲ့ရက်က ဘယ်လောက်ကြာမယ် မသိသေးဘူးလေ။ အလုပ်တော့နည်းနည်း ရှုတ်သွားတာပေါ့၊ ရပ်ကျေးအုပ်ချုပ်ရေးမှူးတွေဆီက ခွင့်ပြုချက် ယူရမယ်ဆိုတာ။ မလွဲမသွေသွားမှ ရမယ်ဆိုရင်တော့ လုပ်ရမှာပေါ့”

စစ်ကိုင်းတိုင်းနည်းတူ မန္တလေးတိုင်းက မနက်ဖြန် ဧပြီလ ၇ ရက်နေ့ကနေ စတင်ပိတ်လိုက်ပြီး ၂၁ ရက်နေ့အထိ ဖြစ်ပါတယ်။ ရန်ကုန်တိုင်းမှာတော့ ဧပြီလ ၁၀ ရက်နေ့မှာ စတင်မှာဖြစ်ပြီး ဧပြီ  ၁၉ ရက်နေ့အထိ ထုတ်ပြန် ထားပါတယ်။

ကိုရိုနာဗိုင်းရပ်စ်ပိုး ပျံ့နှံ့မှုအပေါ်မူတည်ပြီး အစိုးရအဖွဲ့အသီးသီးက ရက်အတိုးအလျှော့ လုပ်ဆောင်သွားမှာ ဖြစ်တယ်လို့ ဆိုပါတယ်။