ဈေးထဲ နှာခေါင်းစည်းတပ်ကြဖို့ နေပြည်တော်မှာ ညွှန်ကြား

နေပြည်တော် ကောင်စီနယ်မြေက စည်ပင်သာယာရေး ကော်မတီဈေးတွေမှာ ဈေးရောင်းသူ၊ ဝယ်သူအားလုံး နှာခေါင်းစည်း Mask တပ်ဖို့နဲ့ နှာခေါင်းစည်းမပါရင် ဈေးထဲကို မဝင်ဖို့ ညွှန်ကြားထားပါတယ်။

မျှဝေသောလက်များ ပရဟိတအဖွဲ့က ပျဉ်းမနားမြို့နယ်မှာ အကြီးဆုံးဈေးတစ်ခုဖြစ်တဲ့ အဟာရသုခဈေးမှာ ကိုရိုနာဗိုင်းရပ်စ် ကာကွယ်ရေး အိမ်တွင်းလက်လုပ် အဝတ်နှာခေါင်းစည်း တစ်ထောင်ကို ဒီနေ့ အခမဲ့ လိုက်လံဝေငှခဲ့ပါတယ်။

ရန်ကုန်နဲ့ မန္တလေးမြို့ကြီးတွေမှာလို သင်္ကြန်ကာလအတွင်း မလိုအပ်ဘဲ အပြင်မထွက်ဖို့၊ လူစုလူဝေးမလုပ်ဖို့ နေပြည်တော်မှာ ညွှန်ကြားထားတာမရှိပေမယ့် ဈေးတွေမှာ ဈေးသည် ဈေးဝယ် အားလုံးနှာခေါင်းစည်းတပ်ကြဖို့် စည်ပင်သာယာရေးကော်မတီက မနေ့ကစပြီး ညွှန်ကြားချက် ထုတ်ပြန်ခဲ့ပါတယ်။

အဟာရသုခဈေး တာဝန်ခံ ဦးကျော်နိုင်ဦးက နှာခေါင်းစည်းမပါဘဲ ဘယ်သူမှ ဈေးထဲကို ဝင်ရောက်ခွင့်မရှိဘူးလို့ ပြောပါတယ်။

“ဒီနေ့ လူကြီးတွေရဲ့ လမ်းညွှန်ကြားချက်၊ အထက်က လမ်းညွှန်မှုနဲ့ပါ။ ကျတော်တို့ ဈေးဝယ် အထဲကို ဝင်တဲ့သူတွေကို ဈေးဝယ်လာတဲ့သူများ မည်သူမဆို နှာခေါင်းစည်း Mask မပါရင် ဝင်ရောက်ခွင့် မရှိပါဘူး။ ကျန်းမာရေးအရ ဈေးသူ၊ ဈေးသားတွေရော၊ ဝယ်တဲ့သူတွေရော Mask တပ်ပြီးမှ ရောင်းမယ်။ Mask တပ်ပြီးမှ ဈေးဝယ်ခွင့်ပြုပါတယ်”

ဈေးဆိုင်ခန်းတွေကိုလည်း ၆ ပေခြားပြီး ရောင်းချနိုင်ဖို့ စီစဉ်နေတယ်လို့ ပြောပါတယ်။

နေပြည်တော် ပျဉ်းမနားမြို့က အဟာရသုခဈေးဟာ နေပြည်တော်နယ်မြေမှာရှိတဲ့ ဈေးတွေကို ကုန်စိမ်း၊ ကုန်ခြောက်တွေ ပြန်လည်ဖြန့်ဝေတဲ့ လက်ကားဈေးကြီးတစ်ခုဖြစ်ပါတယ်။

နေပြည်တော် ပျဉ်းမနားမြို့အခြေစိုက် မျှဝေသောလက်များ ပရဟိတအဖွဲ့က လျှော်ဖွတ်နိုင်တဲ့ အိမ်တွင်းချုပ် အဝတ်နှာခေါင်းစည်း အခု တစ်ထောင်ကို အဟာရသုခဈေးက ဈေးသည်တွေကို ဒီနေ့ လိုက်လံဝေငှပါတယ်။

မျှဝေသောလက်များ ပရဟိတအဖွဲ့က ဦးကျော်သူရက တစ်ခုကို ငွေကျပ် လေး၊ ငါးရာအထိရှိတဲ့ တစ်ခါသုံး နှာခေါင်းစည်း Maskတွေ ဝယ်မသုံးနိုင်တဲ့ ဈေးသည်တွေကို အခမဲ့ဖြန့်ဝေတာလို့ ပြောပါတယ်။

“အဝတ် Mask တွေ ပေးတဲ့အခါမှာ တစ်ဦးကို ဒီအထုတ်လေးထဲမှာ နှစ်ခုပါပါတယ်။ အဲတော့ အဲဒီ နှစ်ခုထဲမှာ ကျတော်တို့က ရည်ရွယ်တာက ဒီနေ့ တစ်ခုသုံး၊ ပြန်လာလို့ရှိရင် လျော်ထား၊ နောက်နေ့ကျ နောက်တစ်ခုတပ်၊ အလဲအလှယ်နဲ့ လုပ်လို့ရအောင် နှစ်ခုပါတဲ့ အကြောင်းကို ဈေးသည်တွေကို သေချာရှင်းပြပါတယ်။ ဒါလေးက လဲလှယ်ပြီး သုံးလို့ရတယ်။ ပြီးတော့ သူတို့ တစ်ခါသုံး Mask တွေကို သုံးမယ်ဆိုရင် နေ့စဉ်ဝင်ငွေထဲက ထိခိုက် မှာစိုးတဲ့အတွက် ဒီအဝတ် Mask နှာခေါင်းစည်းတွေကို ပေးတယ်ဆိုတဲ့အကြောင်း သေချာရှင်းပြပါတယ်”

မျှဝေသောလက်များ ပရဟိတအဖွဲ့က လျှော်ဖွတ် နေပူလှန်း၊ မီးပူတိုက်၊ ပိုးသတ်ထားတဲ့ အိမ်တွင်းချုပ် အဝတ်နှာခေါင်းစည်း အခု တစ်သောင်းကို အခမဲ့ဖြန့်ဝေဖို့ စီစဉ်ထားတယ်လို့ သိရပါတယ်။

ဈေးသည် တစ်ဦးဖြစ်တဲ့ မအေးအေးခိုင်က ဗိုင်းရပ်စ်ပြန့်နှံ့မှုအပေါ် အလွန်အကျွံ စိုရိမ်ပူပန်တာမျိုး မရှိဘူးလို့ ပြောပါတယ်။

“အရမ်းကြီးတော့ မစိုးရိမ်ပါဘူး၊ ဒါပေမဲ့ စိုးရိမ်တဲ့ အတိုင်းအတာအထိတော့ စိုးရိမ်တာပေါ့။ အလွန်အကျွံ ကြီးတော့ မစိုးရိမ်ပါဘူး။ ဈေးမှာက ဘယ်လိုပြောရမလဲဆိုရင် ဈေးရောင်းတဲ့သူ တော်တော်များများက ကိုယ်ခံအားလည်း ကောင်းကြတယ်လေ။ ဘာပဲပြောပြော လေဝင်လေထွက်လည်း ကောင်းတယ်။ အစားအသောက်ဆိုရင်လည်း အဟာရဖြစ်တဲ့ အစာတွေပဲ စားတာဆိုတော့၊ လက်ဆတ်တဲ့ သီးနှံတွေပဲ စားတာဆိုတော့လေ”

ဈေးသည်နောက်တစ်ဦးဖြစ်သူ မကေကေ ကတော့ နေပြည်တော်ကို လူတွေအများအပြား ရွှေ့ပြောင်းလာတယ်လို့ သတင်းတွေကြားရတဲ့အတွက် ရောဂါကူးစက်မှာကို စိုးရိမ်တယ်လို့ ပြောပါတယ်။

“ကြောက်တော့ ကြောက်တယ်၊ နေပြည်တော်ဘက် ကူးလာမှာကို။ နေစရာမရှိဘူး အဲလို လူဦးရေ တစ်နေ့တခြား တိုးတိုးလာဆိုတဲ့ အသံကြားတော့ စိုးရိမ်တယ်။ လူတွေကို ကူးစက်လာမှာ စိုးရိမ်တယ်”

နေပြည်တော်ကောင်စီ ဒုတိယမြို့တော်ဝင် ဦးရဲမင်းဦးက စည်ပင်သာယာရေး ကော်မတီဈေးတွေကို ပိတ်ဖို့မရှိသေးဘဲ အခြေအနေကို စောင့်ကြည့် လေ့လာနေတယ်လို့ ပြီးခဲ့တဲ့ ဧပြီလ ၆ ရက်နေ့က သတင်းထောက်တွေကို ပြောထားပါတယ်။
နေပြည်တော်မှာ ကိုရိုနာဗိုင်းရပ်စ်ပိုး တွေ့ရှိခဲ့တဲ့ ကုလသမဂ္ဂဝန်ထမ်း ဆွစ်ဇာလန်နိုင်ငံသူ အမျိုးသမီးဟာ ကျန်းမာရေးကောင်းမွန်လာတဲ့အတွက် ဆေးရုံကဆင်းပြီး ဟိုတယ်မှာပဲ သီးခြားစောင့်ကြည့်သူအဖြစ် နေထိုင်နေရပါတယ်။

လက်ရှိအချိန်အထိ နေပြည်တော် အမှတ် ၁ စည်ပင်ဧည့်ရိပ်သာ၊ တပ်မတော် အမှတ် ၃ စစ်ကြောရေးနဲ့ တည်းခိုရေးစခန်းမှာ ပြည်ပနဲ့ နယ်စပ်က ပြန်လာသူ ၈၀၀ ကျော် စောင့်ကြည့်သူတွေအဖြစ် ရှိနေပါတယ်။