သံမဏိစက်ရုံ အလုပ်သမားတွေ အစာငတ်ခံဆန္ဒပြ

ရန်ကုန်တိုင်း မှော်ဘီမြို့နယ် မြောင်းတကာစက်မှုဇုန်မှာရှိတဲ့ Pacific Steel Enterprise သံမဏိစက်ရုံက သံရည်ကြိုတဲ့ဖိုမှာ အလုပ်လုပ်တဲ့ အလုပ်သမားတွေဟာ အလုပ်သမားအခွင့်အရေး ဆုံးရှုံးနေလို့ စက်ရုံရှေ့မှာ ဖေဖော်ဝါရီလ ၁၃ ရက်နေ့ကစပြီး အစာအငတ်ခံ ဆန္ဒထုတ်ဖော်နေကြပါတယ်။

သံမဏိစက်ရုံရှေ့ အရိပ်မရှိတဲ့နေရာ နေပြင်းပြင်းမှာ ထိုင်နေကြတဲ့သူတွေကတော့ Pacific Steel Enterprise သံမဏိစက်ရုံက သံရည်ကြိုတဲ့ဖိုမှာ အလုပ်လုပ်တဲ့ အလုပ်သမားတွေ အစာအငတ်ခံဆန္ဒပြနေကြတာ ဖြစ်ပါတယ်။

အလုပ်သမားတွေ တောင်းဆိုကြတဲ့ထဲမှာ စက်ရုံထဲမှာ ထိခိုက်ဒဏ်ရာရတဲ့ အလုပ်သမားတွေကို စက်ရုံဘက်က တာဝန်ယူပေးဖို့၊ စက်ရုံဘက်က အလုပ်ပိတ်တဲ့အချိန်တွေမှာ လုပ်ခလစာ အပြည့်အဝပေးဖို့၊ ထမင်းစားချိန် အနားပေးဖို့၊ အလုပ်ချိန် ၈ နာရီကျော်နေတာကို အလုပ်သမားတွေ သဘောမတူရင် အဓမ္မစေခိုင်းတာ မလုပ်ဖို့ စတဲ့အချက်တွေ အပါအဝင် အချက် ၈ ချက်ပါဝင်ပါတယ်။

သူတို့တောင်းဆိုနေကြတဲ့ အချက် ၈ ချက်ကို စက်ရုံဘက်က လိုက်လျောတာမရှိရင် အသက်သေတဲ့အထိ ဆန္ဒပြသွားမယ်လို့ စက်ရုံမှာ ၁ နှစ်ခွဲလောက် အလုပ်လုပ်လာတဲ့ ကိုမြတ်မင်းက ပြောပါတယ်။

အစာအငတ်ခံဆန္ဒပြတာဟာ အသက်အန္တရာယ်အတွက် စိုးရိမ်ရပေမယ့် ဆန္ဒပြတာကိုတော့ ရပ်မှာမဟုတ်ဘူးလို့ ပြောကြပါတယ်။

သံရည်ကြိုဖိုမှာအလုပ်လုပ်ကိုင်းရင်း ခြေထောက်ဒဏ်ရာရရှိသွားတဲ့ ကိုသက်လွင်ဆိုသူက စက်ရုံတွေမှာ အလုပ်သမားအခွင့်အရေး ဆုံးရှုံးမှုတွေနဲ့ ပတ်သက်ပြီး တိုင်စရာနေရာမရှိဖြစ်နေတယ်လို့ ပြောပါတယ်။

ဒီစက်ရုံမှာလုပ်ကိုင်နေတဲ့ အလုပ်သမား ၁၆၀ လောက်ရှိနေပြီး အဲဒီထဲကသံရည်ကြိုတဲ့ဖိုမှာ လုပ်ကိုင်နေတဲ့ အလုပ်သမားတွေ ဆန္ဒပြကြတာဖြစ်ပါတယ်။ စက်ရုံကတော့ မြန်မာနိုင်ငံသားနဲ့ တရုတ်နိုင်ငံသား ဖက်စပ်လုပ်ကိုင်တဲ့စက်ရုံဖြစ်ပါတယ်။ တရုတ်နိုင်ငံသား ပညာရှင်တွေလည်း ခေါ်ယူအသုံးပြုနေတယ်လို့ စက်ရုံရဲ့ အထက်မြန်မာပြည် အရောင်းတာဝန်ခံ ကိုနောင်နောင်မျိုးရဲ့ ပြောပြချက်အရ သိရပါတယ်။

စက်ရုံစတင်လည်ပတ်တာ ၅ လပိုင်းက စတင်လည်ပတ်တာဖြစ်ပြီး ဆန္ဒပြအလုပ်သမားတွေရှိနေတဲ့အတွက် စက်ရုံကိုရပ်ဆိုင်းထားရပါတယ်။ စက်ရုံရပ်ဆိုင်းထားတဲ့အတွက် တစ်ရက်ကို မြန်မာငွေကျပ်သိန်း ၇၀၀ လောက် ဆုံးရှုံးမှုရှိတယ်လို့ ပြောပါတယ်။