အနုမြူ ကောလာဟလကြောင့် နယ်စပ်နှင့် ကချင်ပြည်နယ်မှာ ဆားဈေး သုံးဆခုန်တက်

ကချင်ပြည်နယ် မြစ်ကြီးနားမြို့မှာ ဒီဆားဈေးတက်နေတဲ့ အခြေအနေတွေနဲ့ပတ်သက်လို့ မြစ်ကြီးနားမြို့ခံတယောက်က ခုလို ပြောပါတယ်။

“ဆားတွေလည်း ပြတ်နေတယ် တပိဿာကို ၈၀၀ ကျမတို့ မနက်က ဝယ်တာတောင် အရင်က ၃၀၀ ပဲ တရုတ်ပြည်က လာဝယ်လို့တဲ့ ဝယ်လို့တော့ နည်းနည်းပါးပါးပဲ ရတော့တယ် တအားဝယ်ကြတော့လေ။ ဆိုင်တွေက ပြတ်နေတာ ရထားတွဲမှာလည်း ပစ္စည်းက နည်းနည်း တင်ရခက်တယ်လေ ရန်ကုန်ဖက်ကနေ လာတာလေ ပဲခူးတို့ဘာတို့ကနေ။”

ကချင်ပြည်နယ်ဗန်းမော်မြို့မှာလည်း အလားတူ ဆားဈေးတွေ အဆမတန်တက်နေတယ်လို့ ဗန်းမော် ဒေသခံတယောက်က ပြောပါတယ်။

“အရင်က တပိဿာ ၃၀၀၊ ၄၀၀ ပဲရှိတာ အခု မြို့ထဲမှာ ၁၅၀၀ ဖြစ်နေတယ်တဲ့။ တကယ့် ဆားရောင်းတဲ့ ဆိုင် ကုန်စုံဆိုင် လက်ကားရောင်းတဲ့ဆိုင်တွေက ရောင်းစရာ မရှိတော့ဘူးလို့ ပြောတယ်။ တရုတ်ပြည်က ကားကြီးကားငယ်နဲ့ သယ်နေတယ်တဲ့။ တရုတ်ပြည်ပို့နေကြတယ်တဲ့။ တက်တာကတော့ အဲလိုပဲ ကောလာဟလတွေပေါ့ဗျာ။ ဒီမှာတောင် အစိုးရက မိုက်နဲ့ အော်သွားသေးတယ်။ မိုးရွာရင် အပြင်မထွက်နဲ့ ရောဂါတွေ ဖြစ်နိုင်တယ်ပေါ့။ ရေဒီယိုသတ္တိကြွတွေ ဒီဘက်ကို လာမယ်ပေါ့ဗျာ။ နောက် တရုတ်ပြည်ဖက်ကိုလည်း ဗန်းမော်မှာ ရှိတဲ့ဆားတွေကို တရုတ်ပြည်က တော်တော် သိမ်းတယ်လို့ ပြောတယ်။”