စာလုံးပေါင်း သတ်ပုံမှားယွင်းမှု အစိုးရ ကြီးကြပ်သင့်ကြောင်း စစ်တပ်အမတ် အဆိုတင်

စာနယ်ဇင်းများကို ရောင်းချရန် ပြင်ဆင် ခင်းကျင်းနေသော ဈေးသည်တဦး ဖြစ်ပါသည်။

အောက်လွှတ်တော် အမတ်ဖြစ်သူ ဗိုလ်မှူး စိုးဟိန်းနောင်က မြန်မာဘာသာနဲ့ထုတ်ဝေနေတဲ့ ဂျာနယ်တွေ၊ မဂ္ဂဇင်းတွေမှာ စာလုံးပေါင်း သတ်ပုံ မှားယွင်းမှုတွေကို ပြင်ဆင်တာ အားနည်းနေတဲ့ အတွက် စာဖတ်သူတွေ အတွက် အလွန်အန္တရာယ် ကြီးကြောင်း၊ ဒါကြောင့် အစိုးရရဲ့ ကြီးကြပ်မှု လိုအပ်နေကြောင်း လွှတ်တော်မှာ တင်သွင်းခဲ့ပါတယ်။

ဒီကိစ္စနဲ့ပတ်သက်ပြီး ယခင်က မြန်မာစာ သင်ရိုးညွှန်းတမ်း အဖွဲ့ဝင်တစ်ဦးလည်းဖြစ်၊ တက္ကသိုလ် ဘာသာပြန်ဌာန စာကြည့်တိုက်မှူးလည်းဖြစ်သူ စာရေးဆရာ ကဗျာဆရာ မောင်စွမ်းရည်က - စတုထ္တ မဏ္ဍိုင်ဖြစ်တဲ့ မီဒီယာတွေကသာ ဆုံးဖြတ် လုပ်ကိုင်ရမယ့် ကိစ္စကို အစိုးရက ဝင်ရောက် ကြီးကြပ်ဖို့ မလိုကြောင်း၊ အရင်ကလည်း အခုလို ဝင်ရောက် စွက်ဖက်တာတွေ ရှိခဲ့ကြောင်း၊ ဒီမိုကရေစီနိုင်ငံ ဖြစ်ချင်ရင် ဒီမိုကရေစီ လုပ်ရပ်တွေ ရှိရမှာ ဖြစ်ကြောင်း ပြောဆိုပါတယ်။

လက်ရှိ အောက်လွှတ်တော်၊ အထက်လွှတ်တော်နဲ့သက်ဆိုင်ရာ ပြည်နယ် တိုင်း ဒေသကြီး လွှတ်တော်တွေမှာ တင်ပြအဆိုပြုနေတဲ့ ကိစ္စတွေထဲမှာ စာလုံးပေါင်း သတ်ပုံ ကိစ္စတင်မဟုတ်ဘဲ သက်ဆိုင်ရာ မြို့နယ် အဆင့်တွေ၊ ဆိုင်ရာ အဖွဲ့အစည်းတွေမှာ ဆွေးနွေး အဖြေရှာသင့်တဲ့ ကိစ္စတွေကို ပြည်ထောင်စု အဆင့် လွှတ်တော်မှာ တင်ပြ ဆွေးနွေးနေကြတယ် ဆိုတဲ့ သရော် ဝေဖန်ချက်တွေကို ပြည်တွင်း စာနယ်ဇင်းကာတွန်းတွေနဲ့ အင်တာနက် စာမျက်နှာတွေမှာ တွေ့ရှိနေရပါတယ်။